PaMateus
17 Konima yomasiku gahamano, Jesus okwa kutha Petrus, Jakob nomumwayina Johannes e ta yi nayo kondundu ondeendeka, ye li oyo ayeke. 2 Opo nduno okwa shituluka montaneho yawo; oshipala she osha adhima ongetango, nonguwo ye yokombanda oya li ya yela ya fa uuyelele.* 3 Ihe tala! Moses naElia oya holoka taya kundathana naJesus. 4 Opo ihe Petrus okwa ti kuJesus: “Omuwa, oshe tu opalela okukala mpaka. Ngele owa hala, otandi vulu okudhika omatsali gatatu mpaka, limwe olyoye, limwe olyaMoses, nekwawo olyaElia.” 5 Manga a li ta popi, ohaluka, oshikogo tashi adhima oshe ya siikile, nomwa zi ewi tali ti: “Nguka Omumwandje, omuholike, ngoka nde mu hokwa, pulakeneni kuye.” 6 Aalongwa sho ye shi uvu, oya li ya tila noonkondo e taya sizimike iipala yawo pevi. 7 Opo nduno Jesus okwa hedha popepi nayo, naasho e ya gumu, okwa ti kuyo: “Thikameni, inamu tila.” 8 Sho ya thikama, oya mono owala Jesus oye awike. 9 Omanga ya li taya londoloka kondundu, Jesus okwe ya lombwele ta ti: “Emoniko ndika inamu li lombwela nando omuntu, sigo oosho Omuna gwomuntu a yumudhwa kuusi.”
10 Ihe aalongwa oye mu pula taya ti: “Omolwashike nduno aalongimpango haya ti, Elia oye e na okuya tango?” 11 Okwe ya yamukula a ti: “Elia oku na okuya shili, nota ka ukitha iinima ayihe. 12 Ihe ngame otandi mu lombwele kutya Elia okwa li e ya nale, noinaye mu dhimbulula, ihe oya ungaunga naye ngaashi ya hala. Momukalo gwa faathana, nOmuna gwomuntu otaye ke mu hepeka.” 13 Sho a popi ngawo, aalongwa oya thiki pehulithodhiladhilo kutya ota popi kombinga yaJohannes Omuninginithi.
14 Sho ya li taya ende ya uka kongundu yaantu, omulumentu gumwe okwe ya kuJesus, te mu tsile oongolo e ta ti: 15 “Omuwa, sila omumwandjemati ohenda, oshoka oku na oshintona, nota ehama. Olundji oha gwile momulilo nosho wo momeya. 16 Onda li nde mu eta kaalongwa yoye, ihe inaya vula oku mu aludha.” 17 Jesus okwe mu yamukula a ti: “Yakwetu epipi ndika kaali na eitaalo nolya yonuka, sigo uunake ndi na okukala nane? Sigo uunake ndi na oku mu idhidhimikila? Mu eteni huka kungame.” 18 Opo nduno Jesus okwa ganda ondemoni e tayi zi mo momumati, nopethimbo opo tuu mpoka, okwa aluka. 19 Opo ihe aalongwa oye ya kuJesus ye li oyo ayeke e taye mu pula taya ti: “Omolwashike tse inaatu vula oku yi tidha mo?” 20 Okwe ya yamukula a ti: “Oshoka omu na eitaalo eshona. Oshili tandi mu lombwele, andola omwa li mu na eitaalo li thike owala nando opomuma yosinapi, ando otamu vulu okulombwela ondundu ndjika: ‘Itumba po mpaka, wu ye mpeyaka,’ oyo notayi itumbu po, nokapu na shoka tashi ke mu nyenga.” 21 ——
22 Omanga ya li ya gongala pamwe muGalilea, Jesus okwa ti kuyo: “Omuna gwomuntu ota ka gwaalekwa e ta gandjwa miikaha yaantu, 23 notaye ke mu dhipaga, nomesiku etitatu, ota ka yumudhwa.” Aalongwa sho ye shi uvu, oya li ya nika oluhodhi noonkondo.
24 Konima sho ya thiki muKapernaum, aalumentu mboka haya futitha iifendela yotempeli,* oye ya kuPetrus, noya ti: “Omuhongi gweni oha futu ngaa iifendela yotempeli?” 25 Okwa ti: “Oha futu.” Ihe sho Petrus e ya megumbo, Jesus okwa thikile te mu pula ta ti: “Mbela ngoye, Simon, oto ti ngiini? Aakwaniilwa yokombanda yevi ohaya pula kulye oompale, nenge iifendela? Okoyana, nenge okaantu yalwe?” 26 Sho Simon e mu yamukula a ti: “Okaantu yalwe,” Jesus okwa ti kuye: “Nena osha yela kutya oyana ihaya futu iifendela. 27 Ihe opo kaatu ya geyithe, inda kefuta e to umbile mo ondjolo, to kutha ohi ndjoka to ndjolola tango, nongele owa makula okana kayo, oto adha mo oshimaliwa shoshisiliveli.* Shi kutha mo e to shi ya pe, shi ninge iifendela yetu nangoye.”