PaMateus
11 Sho Jesus a mana okupa aalongwa ye 12 omalombwelo, okwa yi kiilando yopuushiinda, opo a ka longe aantu noku ya uvithila.
2 Manga Johannes a li mondholongo, okwa uvu iilonga yaKristus, nokwa tumu aalongwa ye, 3 ye ke mu pule taya ti: “Ongoye ngaa ngoka wa li wu na okuya, nenge otu na okutegelela gumwe i ili?” 4 Jesus okwe ya yamukula a ti: “Indeni mu ka lombwele Johannes shoka mwa uvu naashono mu wete: 5 Aaposi ngashingeyi oye wete ko, iilema otayi ende, aanashilundu otaya aludhwa, oombolo odhi uvite ko, aasi otaya yumudhwa noohepele otadhi uvithilwa onkundana ombwanawa. 6 Ngoka itaa pundukithwa kusha omolwandje, ota kala a nyanyukwa.”
7 Omanga ya li ye li mondjila taya shuna, Jesus okwa tameke okulombwela oongundu dhaantu kombinga yaJohannes ta ti: “Mombuga omwa yile mo mu ka tale shike? Enenge tali falwafalwa kombepo? 8 Omwa yile mo ano mu ka tale shike? Omulumentu a zala oonguwo dhondilo? Mboka haya zala oonguwo dhondilo ohaya kala momagumbo gaakwaniilwa. 9 Omolwashike ano mwa yile mombuga? Mbela hamuhunganeki mwa ka talele? Eeno, ihe otandi mu lombwele, ye, okwa simana e vule omuhunganeki. 10 Nguka oye a li ta popiwa sho kwa nyolwa taku ti: ‘Tala! Otandi tumu omutumwa gwandje e ku tetekele, ngoka te ke ku longekidhila ondjila.’ 11 Oshili tandi mu lombwele, mokati kaamboka ya valwa kaakiintu kamu na nando ogumwe e vule Johannes Omuninginithi, ihe omuntu ngoka omushuushuka mUukwaniilwa womegulu, omunene e mu vule. 12 Okuza pethimbo lyaJohannes Omuninginithi, sigo ongashingeyi, aantu oya kala taya lalakanene Uukwaniilwa womegulu, naamboka taye wu lalakanene otaye ke wu mona. 13 Oshoka Ompango nosho wo Aahunganeki ayehe oya hunganeke, sigo omuJohannes; 14 Kutya nduno otamu shi itaale, nenge hasho, Johannes oye ‘Elia ngoka a popiwa kaahunganeki kutya ote ke ya.’ 15 Ngoka e na omakutsi, na uve ko.
16 “Epipi* ndino otandi li faathanitha nashike? Olya fa aanona ye li pomalandithilo taya igidha aanona ooyakwawo, 17 taya ti: ‘Otwe mu hikile okafiloli, ihe inamu dhana. Otwe mu imbile omaimbilo goosa, ihe inamu lila.’ 18 Sha faathana, Johannes okwe ya itaa li, ye ita nu, ihe aantu oya ti: ‘Oku niwe kondemoni.’ 19 Omuna gwomuntu okwe ya ta li nota nu, ihe aantu oya ti: ‘Tala, omulumentu omufukedhi nonkolwe,* ye okuume kaafendelithi nokaalunde.’ Nonando ongawo, uunongo ohawu hololwa kiilonga yawo ya uka.”
20 Opo nduno Jesus okwa tameke okupa uusama iilando moka a longele iikumithalonga, oshoka inayi itedhulula, ta ti: 21 “Yayee, ngoye Korasin! Yayee, ngoye Betsaida! Oshoka andola muTiro nomuSidon omo mwa ningilwe iikumithalonga mbyoka ya longelwe mune, andola iilando mbyoka oyi itedhulula nale, mokuzala omahahi nokukuutumba momutoko. 22 Ihe otandi mu lombwele, mEsiku lyEpangulo, egeelo lyeni otali ka kala enene li vule lyaTiro nolyaSidon. 23 Mbela ngoye, Kapernaum, oto ka yelwa wu ye megulu? Oto ka kulukila mOmbila;* oshoka ando muSodom omo mwa ningilwe iikumithalonga, mbyoka ya longwa mungoye, ando oko shi li sigo onena. 24 Ihe otandi ku lombwele, mEsiku lyEpangulo, egeelo lyoye otali ka kala enene, li vule lyaSodom.”
25 Opo nduno pethimbo opo tuu mpoka, Jesus okwa ti: “Otandi ku hambelele montaneho, Tate, Omuwa gwegulu nogwevi, oshoka iinima mbika owe yi holeke aanandunge naalongwantu, ihe owe yi hololele aanona. 26 Eeno, Tate, molwaashoka shika osho she ku opalela. 27 Iinima ayihe onde yi pewa kuTate, nokapu na ngoka e shi Omwana nawa, kakele kaHe; nokapu na ngoka e shi He nawa, kakele kOmwana, nakehe ngoka, Omwana, a hala oku mu hololela He. 28 Ileni kungame, amuhe, mboka mwa vulwa nomwa humbatekwa uudhigu, ngame notandi mu pe epepelelo. 29 Itsikeni ondjoko yandje nokwiilonga kungame, oshoka ngame ondi na omwenyo omwaanawa nomomutima ondi ishonopeka, opo nduno otamu ka imonena epepelelo. 30 Oshoka ondjoko yandje ombwanawa,* nomutenge gwandje omupu.”