Timoteus gwotango

4 Ihe oohapu, dha nyolwa mewiliko lyaKalunga,* odha popya sha yela kutya aantu yamwe monakuyiwa otaya ka thiga po eitaalo, notaya ka gandja eitulomo koohapu tadhi pukitha* nosho wo komalongo goondemoni, 2 nokupulakena koohapu dhaalumentu aafudhime, mboka haya fundju, noye na eiyuvo lya sa, onga lya fikwa noshihako shoshiyela sha hanya. 3 Ohaya indike wo aantu kaaya hokane, nohaya lombwele aantu yi idhilike iikulya, mbyoka Kalunga a shita, opo yi liwe nolupandu kwaamboka ye na eitaalo, noye shi oshili nawa. 4 Oshoka kehe shoka Kalunga a shita oshiwanawa, nokapu na shoka tashi vulu okutindwa, ngele osha taambiwa ko nolupandu, 5 molwaashoka osha yapulwa okupitila moohapu dhaKalunga, nosha galikanenwa.

6 Ngele omayele ngaka owe ga pe aamwatate, oto ka kala omuyakuli omwaanawa gwaKristus Jesus, wa paluthwa noohapu dheitaalo nonelongo ewanawa, ndyoka ho landula thiluthilu. 7 Ino pulakena komitotolombo, ngaashi ndhoka hadhi popiwa kaakiintu aakokele. Mepingathano naashono, shi ninga elalakano lyoye wu idheule, wu kale nesimanekokalunga. 8 Oshoka eidheulo lyopalutu oli na owala ekwatho eshona, ihe esimanekokalunga otali kwathele miinima ayihe, molwaashoka otali eta omalalekonuuyamba monkalamwenyo yongashingeyi nosho wo ndjoka tayi ke ya. 9 Oohapu ndhoka odhoshili, nodhi shi okwiinekelwa thiluthilu; 10 nomolwaashono tatu longo nuudhiginini, nokwiidhipagela po, oshoka otu na einekelo muKalunga omunamwenyo, ngoka e li Omuhupithi gwaantu yomaludhi agehe, unene tuu mboka aadhiginini.

11 Tsikila oku ya pa omalombwelo ngaka, noku ya longa. 12 Ino etha nando ogumwe e ku dhine, molwaashoka wu li omugundjuka. Ihe pehala lyaashono, kala oshiholelwa kwaamboka aadhiginini, mokupopya, meihumbato, mohole, meitaalo nomuuyogoki. 13 Tsikila okulongitha ethimbo lyoye mokulesha montaneho, mokukumagidha* nosho wo mokulonga aantu, sigo tandi ya. 14 Ino ekelahi omagano, ngoka wa pewa okupitila mehunganeko, sho olutu lwaakuluntugongalo lwe ku tenteke iikaha yalwo. 15 Tedhatedha kombinga yiinima mbika, kala wi itula mo muyo, opo ehumokomeho lyoye li kale li iwetikile thiluthilu kaantu ayehe. 16 Itonatela aluhe nosho wo omukalo gwoye gwokulonga aantu. Dhiginina iinima mbika, oshoka ngele owe shi ningi, oto ihupitha ngoye mwene nosho wo mboka taye ku pulakene.