KuTitus
3 Tsikila oku ya dhimbulukitha, ya kale haya vulika komapangelo nosho wo kwaamboka ye na oonkondopangelo, ya kale yi ilongekidha okulonga oshilonga kehe oshiwanawa, 2 kaaya popile nando omuntu muuwinayi, kaaya kale ye hole oontamanana, ihe naya kale ye na ondjele, noye na ombili lela naantu ayehe. 3 Oshoka natse nale katwa li tu na oondunge, katwa li hatu vulika, otwa li hatu pukithwa, twa li aapika yomahalo gi ili nogi ili, twa li owala hatu longo uuwinayi, tu na efupa, hatu longo iilonga iinyanyalithi, notwa li tu tondathane.
4 Ihe sho Kalunga, Omuhupithi gwetu, a ulukile aantu ohenda nohole, 5 (hamolwaashoka andola twa longa iilonga yuuyuuki, ihe omolwohenda ye mwene), okwe tu hupitha, sho e tu pe omwenyo moku tu yoga, noku tu ninga aape okupitila mombepo ondjapuki. 6 Okwe tu tilile ombepo ndjoka okupitila muJesus Kristus, Omuhupithi gwetu, 7 opo ngele otwa talika ko tu li aayuuki okupitila muuwanawahenda we, tu vule okuninga aathigululi yomwenyo gwaaluhe, ngoka twa tegelela.
8 Oohapu ndhika odhi shi okwiinekelwa, nonda hala wo wu tsikile okutsa omuthindo iinima mbika, opo mboka yi itaala Kalunga ya vule okutsikila okugandja eitulomo kokulonga iilonga iiwanawa. Iinima mbika otayi opalele, notayi etele aantu uuwanawa.
9 Ihe yanda okutompathana kwa nika uugoya, oondjokonona dhomazimo nosho wo oontamanana dhi na ko nasha nOmpango, oshoka iinima mbyoka kayi na oshilonga, nokayi na ekwatho lyasha. 10 Omuntu, ngoka ta humitha komeho iimpaga, mu kumagidha* oshikando shotango noshitiyali, ihe ngele ine ku pulakena, mu etha, 11 wu shi shi kutya omuntu ngoka okwa puguma mo mondjila yoshili, nota yono, nokwi ipangula ye mwene.
12 Ngele onda tumu Artemas, nenge Tikikus kungoye, ninga ashihe shoka to vulu wu ye kungame kuNikopolis, oshoka huka oko nda tokola okukala okufu akuhe. 13 Ninga oonkambadhala wu kwathele Zenas, ngoka e shi nawa Ompango, nosho wo Apollos, opo ya kale ye na kehe shoka ya pumbwa molweendo lwawo. 14 Ihe etha wo aantu yetu yi igilile okulonga iilonga iiwanawa, ya kale haya kwathele mpoka pu na ompumbwe ya endelela, opo iilonga yawo yi imike iiyimati.
15 Ayehe mboka ndi li nayo otaye mú kundile po. Kundila po mboka ye tu hole, noye na eitaalo.
Uuwanawahenda nawu kale pamwe nane amuhe.