PaLukas

6 Sho Jesus a li ta taakana momapya mesiku lyEsabati, aalongwa ye oya li taya polola iilya noku yi thengela pomake gawo e taya li oomuma dhayo. 2 Opo ihe yamwe yomAafarisayi oya ti: “Omolwashike tamu ningi shoka inaashi pitikwa pampango mEsabati?” 3 Ihe Jesus okwe ya yamukula a ti: “Mbela inamu lesha nani shoka David nosho wo aalumentu, mboka ya li naye, ya ningile, sho ya li ya sa ondjala? 4 Inamu lesha nani kutya okwa yi megumbo lyaKalunga e ta pewa iikwiila yeuliko e ta li, yimwe e te yi pe wo aalumentu, mboka ya li pamwe naye, nonando aayambi owala ye yi pitikilwa?” 5 Opo nduno okwa ti kuyo: “Omuna gwomuntu oye Omuwa gwEsabati.”

6 Mesiku lilwe lyEsabati, okwa yi mosinagoga e ta tameke okulonga aantu, nomwa li omulumentu e na oshikaha shokolulyo sha sa. 7 Aalongimpango nAafarisayi oya li taya konenene Jesus, ya tale ngele ota aludha mEsabati, opo ya mone etompelo lyoku mu tamaneka. 8 Ihe molwaashoka okwa li e shi shoka taya dhiladhila, okwa lombwele omulumentu, ngoka e na oshikaha sha sa, a ti: “Thikama e to ya pokati mpaka.” Opo nduno okwa yambuka po e ta thikama pokati. 9 Opo ihe Jesus okwa ti kuyo: “Aalumentu ne, nandi mu pule: Oshike sha pitikwa pampango okulongwa mEsabati? Okulonga uuwanawa, nenge okulonga uuwinayi? Okuhupitha omwenyo, nenge oku gu hanagula po?” 10 Konima sho a tala kuyo ayehe, okwa ti komulumentu ngoka: “Ukililitha oshikaha shoye.” Sho e shi ningi, osha aluka. 11 Ihe yo oya geye noonkondo noya tameke okukundathana kutya Jesus naye mu ninge ngiini.

12 Esiku limwe, Jesus okwa yi kondundu a ka galikane, nokwa kala hoka uusiku awuhe ta galikana kuKalunga. 13 Sho kwa shi, okwa ithana aalongwa ye kuye, muyo e ta hogolola mo 12, mboka wo a luku aayapostoli. 14 Oyo: Simon, ngoka wo e mu luku Petrus, nomumwayina Andreas, Jakob, Johannes, Filippus, Bartolomeus, 15 Mateus, Tomas, Jakob, omuna gwaAlfeus, Simon, ngoka ha ithanwa “omulaadhi,” 16 Judas, omuna gwaJakob, nosho wo Judas Iskariot, ngoka e ke mu gwaaleka.

17 Opo nduno sho a kuluka kondundu pamwe nayo e taye ya pehala lya yelekana, opwa li ongundu onene yaalongwa ye yamwe nosho wo aantu yalwe oyendji, mboka ye ya okupulakena kuye noku ya aludhe komauvu gawo, ya za muJudea nomuJerusalem ashihe nosho wo koshitopolwa shokomunkulofuta shaTiro naSidon. 18 Nokuli naamboka ya li taya hepekwa koombepo dha nyata* okwe ya aludha. 19 Molwaashoka muye omwa li tamu zi oonkondo tadhi aludha kehe gumwe ngoka e mu gumu, ongundu ayihe yaantu oya li ya halelela oku mu guma.

20 Opo nduno okwa tala kaalongwa ye, nokwa tameke okupopya ta ti:

“Ne, mboka oohepele omwa nyanyukwa, oshoka Uukwaniilwa waKalunga oweni.

21 “Ne, mboka ngashingeyi mwa sa ondjala, omwa nyanyukwa, oshoka otamu ka kutithwa.

“Ne, mboka ngashingeyi tamu lili, omwa nyanyukwa, oshoka otamu ka yola.

22 “Kaleni mwa nyanyukwa, uuna aantu ye mu tonde, taye mu tidhagana, taye mu sheke noku mu popila muuwinayi omolwOmuna gwomuntu. 23 Nyanyukweni nokunyanyukililwa, oshoka taleni, ondjambi yeni onene megulu. Oohekulululwa nayo oya li haya ningile aahunganeki iinima ya tya ngaaka.

24 “Ihe yayee, ne, mboka aayamba, oshoka omwa hekelekwa nale sha gwana.

25 “Yayee, ne, mboka mwa kuta ngashingeyi, oshoka otamu ka sa ondjala.

“Yayee, ne, mboka tamu yolo ngashingeyi, oshoka otamu ka sa oluhodhi notamu ka lila.

26 “Yayee, ngele aantu ayehe taye mu popile muuwanawa, oshoka shika osho wo oohekulululwa ya li ya ningile aahunganeki aafundja.

27 “Ihe ngame otandi mu lombwele, ne, mboka mwa pulakena: Tsikileni okukala mu hole aatondi yeni, okulongela uuwanawa mboka ye mu tonde, 28 okuyambeka mboka taye mu thingi nokugalikanena mboka taye mu tuku. 29 Ngoka te ku dhenge nenkawa kolupanda, mu etha wo e ku dhenge kolukwawo; naangoka te ku kutha onguwo yoye yokombanda, ino tinda e ku kuthe ndjoka wo yokohi. 30 Pa kehe ngoka te ku pula sha, naangoka te ku kutha iinima yoye, ino yi mu pula.

31 “Shimwe ishewe, shoka wa hala aantu ye ku ningile, osho wo ya ningila.

32 “Otashi mu etele uuwanawa washike, ngele omu hole owala mboka ye mu hole? Aalunde nayo oye hole owala mboka ye ya hole. 33 Otashi mu kwatha wo shike, ngele ohamu longele owala uuwanawa mboka haye mu longele uuwanawa? Nokuli naalunde ohaya ningi sha faathana. 34 Shimwe ishewe, otashi mu etele uuwanawa washike, ngele ohamu gandja owala kwaamboka mu shi kutya otaye ke mu galulila shoka ye mu indila? Aalunde nayo ohaya gandja owala kaalunde ooyakwawo, opo ya galulilwe shi thike pwaashoka ya gandjele. 35 Mepingathano naashono, tsikileni okukala mu hole aatondi yeni, okulonga uuwanawa nokugandja kaapu na okutegelela mu galulilwe sha. Opo nduno otamu ka mona ondjambi onene notamu ka ninga oyana* yOmukombandambanda, oshoka oha sile ohenda aakolokoshi naamboka ihaaya pandula. 36 Tsikileni okukala aanahenda, ngaashi owala Ho yeni e li omunahenda.

37 “Shimwe ishewe, hulithii po okupangula yalwe, opo nane kaamu ka pangulwe. Inamu pa wo yalwe uusama, opo nane kaamu ka pewe uusama. Tsikileni okudhimina po, opo nane wo mu dhiminwe po. 38 Kaleni hamu gandja, opo wo aantu ya kale haye mu pe. Otaye ke mu tilila moondjato dhoonguwo dheni oshiyelekitho sha yeleka, sha thindwa notashi hunga; oshoka oshiyelekitho shoka tamu shi yelekitha, osho wo tamu ka yelekithwa.”

39 Opo nduno okwe ya lombwele ethaneko, ta ti: “Omuposi ota vulu ngaa okukwata keti omuposi omukwawo? Mbela ayehe itaya ka gwila owala melambo? 40 Omulongwa ke vule omulongi gwe, ihe kehe ngoka a longwa nawanawa ota kala ngaashi omulongi gwe. 41 Omolwashike nduno wu wete okahozi, hoka ke li meho lyomumwaho, ihe ku wete endangalati, ndyoka li li meho lyoye? 42 Ongiini to vulu okulombwela omumwaho, ‘Omumwatate, andiya ndi ku kuthe okahozi meho lyoye,’ omanga ngoye mwene kuu wete endangalati, ndyoka li li meho lyoye? Mufudhime ngoye, kutha mo tango endangalati, ndyoka li li meho lyoye, opo nawa wu vule okukutha mo okahozi, hoka ke li meho lyomumwaho.

43 “Kapu na omuti omwaanawa hagu imi iiyimati iiwinayi, nokapu na omuti omwiinayi hagu imi iiyimati iiwanawa; 44 oshoka omuti kehe ohagu dhimbululwa kiiyimati yagwo. Pashiholelwa, aantu ihaya likola oonkwiyu, nenge omandjembele komano. 45 Omuntu omwaanawa oha pititha mo iinima iiwanawa mompungulilo ye yiinima iiwanawa yomomutima gwe, nomuntu omwiinayi oha pititha mo iinima iiwinayi mompungulilo ye yiinima iiwinayi; oshoka okana ohaka popi shoka sha udhilila momutima.

46 “Omolwashike nduno hamu ithana ndje ‘Omuwa! Omuwa!’ ihe ihamu ningi shoka tandi mu lombwele? 47 Kehe ngoka te ya kungame, ta pulakene oohapu dhandje e ta vulika kudho, otandi mu lombwele kutya ota faathanithwa nashike: 48 Okwa fa omulumentu a tungila egumbo lye kemanya, nokwe li fulila ekankameno lya ya muule. Sho efundja lye ya, omeya oga idhenge megumbo ndyoka, ihe inaga vula oku li teya po, oshoka olya tungwa lya kola. 49 Mepingathano naashono, kehe ngoka ta uvu oohapu dhandje, ihe ita vulika kudho, okwa fa omulumentu a tunga egumbo kaali na ekankameno. Sho omeya ga idhenge mulyo, olya kumuka po nziya, nekumukopo lyalyo olya li enene.