Yotango kAakorinto
2 Onkee ano, aamwatate, sho nde ya kune, inandi ya ko tandi mú uvithile oshiholekwa oshiyapuki shaKalunga noohapu, nenge nuunongo waanandunge. 2 Oshoka sho nda li mokati keni, onda tokola kaandi kale ndi shi sha kombinga yiinima yilwe, kakele kuJesus Kristus, nokombinga yokwaalelwa kwe komuti. 3 Onde ya kune kaandi na oonkondo, ndi na uumbanda, notandi kakama unene. 4 Oohapu dhandje naashoka tandi uvitha kadhi shi oohapu dhuunongo wopantu tadhi tompo aantu, ihe otadhi holola ombepo nosho wo oonkondo, 5 opo eitaalo lyeni kaali kale lya kankamena kuunongo wopantu, ihe okoonkondo dhaKalunga.
6 Ohatu popi kombinga yuunongo mokati kaamboka ya koka pambepo, ihe haunongo wuuyuni mbuka,* nenge uunongo waaleli yuuyuni mbuka, mboka taya ka hula po. 7 Ihe ohatu popi kombinga yuunongo waKalunga, ngaashi wu li oshiholekwa oshiyapuki, ano uunongo, mboka Kalunga a kala a holeka, manga uuyuni mbuka* kaawa li po, omolweadhimo lyetu. 8 Kapu na nando ogumwe gwomaaleli yuuyuni mbuka* a tseya uunongo mbuka, oshoka andola oya li ye wu tseya, ando inaya dhipaga* Omuwa gweadhimo. 9 Ihe ongaashi owala kwa nyolwa taku ti: “Kapu na nando eho lya mona, nokutsi kwa uva, nenge omuntu a dhiladhila momwenyo gwe kombinga yiinima, mbyoka Kalunga a longekidhila mboka ye mu hole.” 10 Oshoka Kalunga otse e yi hololela okupitila mombepo ye, oshoka ombepo ohayi konakona iinima ayihe, nokuli niinima yomuule yaKalunga.
11 Mbela olye e shi omadhiladhilo gomuntu, kakele komuntu ye mwene?* Sha faathana, kapu na nando omuntu e shi omadhiladhilo gaKalunga, kakele kombepo ye. 12 Ihe tse inatu pewa ombepo yuuyuni, ihe oondjoka ya za kuKalunga, opo tu vule okutseya iinima, mbyoka Kalunga e tu pa pasilohenda lye. 13 Iinima mbika otatu yi popi wo, ihe hanoohapu dha za melongo lyuunongo wopantu, ihe oondhoka dha za melongo lyombepo yaKalunga, sho tatu yelitha iinima yopambepo, noohapu dhopambepo.
14 Ihe omuntu ngoka ha dhiladhila panyama, ita vulu okutaamba ko iinima yombepo yaKalunga, oshoka kuye oya nika uugoya; noita vulu oku yi tseya, oshoka ohayi konakonwa pambepo. 15 Mepingathano naashono, omuntu ngoka ha wilikwa kombepo yaKalunga, oha konakona iinima ayihe, ihe ye mwene iha konakonwa nando okomuntu. 16 Oshoka “olye a tseya omadhiladhilo gaJehova, opo a vule oku mu longa?” Ihe tse ohatu dhiladhila ngaashi Kristus.*