paMarkus

12 Opo nduno Jesus okwa tameke okupopya nayo ta longitha omathaneko ta ti: “Omulumentu gumwe okwa tsike omandjembele moshikunino she, te shi ningile enkolo e ta fulile mo oshilambo shokukolela mo omaviinu, nokwa tungile mo oshungo. Opo ihe okwa kongele mo aaniilonga* e ta yi kondje yoshilongo. 2 Sho omandjembele ga tiligana, okwa tumu ko omupiya gwe gumwe kaaniilonga yomoshikunino she e ke mu talele ko iiyimati yimwe kuyo. 3 Ihe oye mu kwata e taye mu dhenge, noye mu shunitha ko e li iikaha yowala. 4 Opo ihe okwa tumu ko ishewe omupiya gumwe kuyo e taye mu dhenge ombole momutse noye mu sitha ohoni. 5 Natango okwa tumu ko gulwe, ihe ngoka oye mu dhipaga, nolwanima okwa tumu ko yalwe oyendji. Yamwe oye ya dhenge, nayamwe oye ya dhipaga. 6 Hugunina, mwene gwoshikunino shomandjembele okwa tumu ko omwanamati omuholike, ta ti: ‘Otaya ka pulakena komumwandjemati.’ 7 Ihe aaniilonga mboka oya lombwelathana taya ti: ‘Nguka oye omuthigululi, natu mu dhipageni, opo uuthiga we wu ninge wetu.’ 8 Onkee ano oye mu kwata e taye mu dhipaga, noye mu umbu mo moshikunino. 9 Mbela mwene gwoshikunino shomandjembele ota ka ninga po shike? Uuna a galuka, ota ka dhipaga aaniilonga mboka, oshikunino e te shi kongele aaniilonga yalwe. 10 Nani inamu lesha enyolo ndyoka tali ti: ‘Emanya, ndyoka aatungi ya tindi, olyo lya ningi emanya lyomohuke lya simanenena kwaagehe?* 11 Emanya ndyoka olya za kuJehova, nekumithi okutala.’”

12 Sho aapataneki ye shi dhimbulula kutya Jesus oyo ta popi methaneko ndyoka, oya li ya hala oku mu kwata po, ihe oya li ya tila ongundu yaantu. Onkee ano oye mu thigi po e taya yi.

13 Opo ihe kuye oya tumu ko Aafarisayi yamwe naayambidhidhi yaHerodes, opo ye mu yule moohapu ndhoka ta popi. 14 Sho ya thiki, oya ti kuye: “Muhongi, otu shi kutya ngoye omunashili, noiho lalakanene okupandika kaantu, oshoka iho tala keholokopo lyomuntu lyokombanda, ihe oho longo oshili kombinga yaKalunga. Mbela osha uka* ngaa okufuta iifendela kOmukesari, nenge inashi uka? 15 Natu fute, nenge inatu futa?” Sho Jesus a dhimbulula uufudhime wawo, okwa ti kuyo: “Omolwashike tamu makele ndje? Etelii ndje ondenari ndi yi tale.” 16 Oye mu etele yimwe e te ya pula ta ti: “Ethano nedhina ndika li li ko olyalye?” Oya ti kuye: “OlyOmukesari.” 17 Opo nduno Jesus okwa ti: “Ano shOmukesari shi peni Omukesari, ihe shoka shaKalunga shi peni Kalunga.” Opo ihe oya li ye mu kuminwa.

18 Opo nduno Aasadukayi, mboka haya ti kutya kaku na eyumuko, oye ya kuye taye mu pula taya ti: 19 “Muhongi, Moses okwe tu nyolele kutya ngele gumwe okwa silwa omumwayinamati, ye okwa thiga ko omukulukadhi, nokwa si kee na aanona, mumwayina oku na okukutha po omukulukadhi gwe, opo a valele mumwayina aanona. 20 Opwa li aamwayinamati yaheyali. Gwotango okwa hokana, ihe okwa si kee na aanona. 21 Opo ihe omutiyali okwa hokana po omukulukadhi ngoka, ihe naye ina mona naye aanona, naashoka osho wo sha ningilwa omutitatu. 22 Ayehe yaheyali oya si kaaye na aanona. Hugunina, omukulukadhi ngoka naye okwa si. 23 Sho aasi taya ka yumudhwa, omukulukadhi ngoka ota ka ninga gwalye, ngele ayehe yaheyali oya li ye mu hokana?” 24 Jesus okwe ya yamukula ta ti: “Ne omwa puka, oshoka kamu shi Omanyolo nosho wo oonkondo dhaKalunga. 25 Uuna aasi taya ka yumudhwa, aalumentu itaya ka hokana, naakiintu itaya ka hokanwa, ihe otaya ka kala ongaayengeli megulu. 26 Ihe shi na ko nasha nokuyumudhwa kwaasi, inamu lesha nani membo lyaMoses kombinga yoshihwa sheno, sho Kalunga e mu lombwele a ti: ‘Ongame Kalunga kaAbraham, Kalunga kaIsak naKalunga kaJakob’? 27 Oye Kalunga kaanamwenyo, ihe ke shi Kalunga kaasi. Ne omwa puka, mwa pukilila lela.”

28 Gumwe gwomaalongimpango okwe ya po, nokwa uvu sho taya ludhikathana, nokwa ndhindhilike kutya Jesus okwe ya yamukula momukalo omwaanawa. Opo nduno okwa pula Jesus ta ti: “Oshipango shotango* oshinipo?” 29 Jesus okwa yamukula a ti: “Oshipango shotango osho, ‘Israel, pulakena, Jehova Kalunga ketu oye awike Jehova, 30 nowu na okuhola Jehova Kalunga koye nomutima gwoye aguhe, nomwenyo* gwoye aguhe, nomadhiladhilo goye agehe nosho wo noonkondo dhoye adhihe.’ 31 Oshitiyali osho shika: ‘Hola mukweni, ngaashi wu ihole mwene.’ Kapu na oshipango oshinene shi vule iipango mbika.” 32 Omulongimpango ngoka okwa ti kuye: “Muhongi, shoka wa popi oshoshili, ‘Oye awike, nokapu na ngoka e mu fa.’ 33 Okukala wu mu hole nomutima gwoye aguhe, nomadhiladhilo goye agehe, noonkondo dhoye adhihe nosho wo okukala wu hole mukweni ngaashi wu ihole mwene, okwa simana ku vule omafikiloyambo nomayambo agehe.” 34 Sho Jesus a mono kutya omulumentu ngoka okwa yamukula nawa, okwa ti kuye: “Ngoye ku li kokule nUukwaniilwa waKalunga.” Ihe okuza mpono, kapu na we gumwe a li e na omukumo gwoku mu pula sha.

35 Nonando ongawo, sho Jesus a tsikile okulonga aantu motempeli, okwa pula a ti: “Omolwashike aalongimpango taya ti kutya Kristus omuna gwaDavid? 36 Kekwatho lyombepo ondjapuki, David okwa popi ye mwene ta ti: ‘Jehova okwa lombwele Omuwa gwandje a ti: “Kuutumba kolulyo lwandje, sigo nda tula aatondi yoye kohi yoompadhi dhoye.”’ 37 Ano ngele David okwe mu ithana Omuwa, ongiini nduno e li omwana gwe?”

Ongundu onene yaantu oya li ya nyanyukwa okupulakena kuJesus. 38 Opo ihe okwa tsikile oku ya longa ta ti: “Kotokeleni aalongimpango, mboka ye hole okweenda ya zala oonguwo oondeendeka noye hole okupopithwa momukalo gwa ikalekelwa pomahala gomalandithilo. 39 Oye hole wo okukuutumba kiipundi yokomeho* moosinagoga, nopiituthi oye hole okukuutumba pomahala, ngoka ga nuninwa aayenda, mboka ya simana. 40 Ohaya yugu aaselekadhi iinima yawo,* nohaya galikana omagalikano omaleeleeka, opo ya pandike kaantu. Aantu ya tya ngaaka otaya ka mona epangulo edhigu noonkondo.”

41 Opo nduno Jesus okwa kuutumba a taalela kiiketha yomayambidhidho ta tala nkene ongundu yaantu tayi tula mo iimaliwa, naayamba oyendji oya li taya tula mo iimaliwa oyindji. 42 Opo ihe opwe ya omuselekadhi ohepele e ta tula mo uumaliwa uyali, waa na naanaa ongushu.* 43 Onkee ano Jesus okwa ithana aalongwa ye kuye e ta ti kuyo: “Oshili tandi mu lombwele, omuselekadhi nguka ohepele okwa tula mo oshindji e vule ayehe yalwe mboka ya tula mo iimaliwa miiketha yomayambidhidho. 44 Ayehe oya kutha muuyamba wawo, ihe omuselekadhi nguka, nonando ohepele, okwa tula mo ashihe shoka a li e na, ano iimaliwa ye ayihe.”