PaJohannes

2 Opo nduno mesiku etitatu, muKana shomuGalilea omwa li mu na oshituthihango, nayina yaJesus oko a li. 2 Jesus naalongwa ye nayo oya li ya hiywa koshituthihango shoka.

3 Sho omaviinu ga li ge li pokupwa po, yina okwa ti kuye: “Kaye na omaviinu.” 4 Ihe Jesus okwa ti kuye: “Mukiintu ngoye, shoka oshi na shike nangame nosho wo nangoye?* Ethimbo lyandje inali thika natango.” 5 Yina okwa lombwele mboka taya yakula a ti: “Ningeni kehe shoka te mu lombwele.” 6 Opwa li pu na iiyuma ihamano yomamanya yokukwatela omeya, omolwoonkuluhedhi dhOshijuda dhokwiiyoga. Kehe oshiyuma osha li hashi yi oolitela 44, nenge 66 lwaampono. 7 Jesus okwa ti kuyo: “Udheni iiyuma mbika omeya.” Onkee ano oye yi udha sigo okomilungu. 8 Opo nduno okwa ti kuyo: “Pindii mo gamwe e tamu ga fala komuwiliki gwoshituthi.” Onkee ano oye ga fala. 9 Sho omuwiliki gwoshituthi a lolo omeya ngoka ga li ga shitukithwa omaviinu, nonando ka li e shi kutya oga za peni, (ihe aayakuli mboka ye ga eta oya li ye shi shi), okwa ithana ombushiki* 10 nokwa ti kuyo: “Kehe gumwe oha gandja tango omaviinu ngoka omawanawa, opo nduno ngele aantu ya kolwa, te ya pe ngoka omawinayi. Ihe ngoye owa kala wa pungula omaviinu ngoka omatoye sigo ongashingeyi.” 11 Jesus oshikumithalonga she shika shotango okwe shi longele muKana shomuGalilea, naashoka osha holola oonkondo dhe,* naalongwa ye oya kala ye na eitaalo muye.

12 Konima yaashika, ye, yina, aamwayinamati nosho wo aalongwa ye oya yi kuKapernaum, ihe inaya kala ko omasiku ogendji.

13 Opaasa yAajuda sho ya li yi li popepi, Jesus okwa yi kuJerusalem. 14 Sho a yi motempeli, okwa adha mo aantu taya landitha oongombe, oonzi noonguti nosho wo aapingakanithi yiimaliwa ya kuutumba. 15 Onkee ano konima sho a ningi ongola yoongodhi, okwa tidha mo ayehe motempeli pamwe noonzi noongombe dhawo, nokwa tilehi iimaliwa yaapingakanithi yiimaliwa, iitaafula yawo e te yi undulile pevi. 16 Opo nduno okwa lombwele mboka ya li taya landitha oonguti ta ti: “Iinima mbika yi kuthii mo muka! Inamu ninga egumbo lyaTate ehala lyomalandithilo.” 17 Opo ihe aalongwa ye oya dhimbulukwa kutya okwa nyolwa taku ti: “Mungame otamu kala mwa udhilila uulaadhi omolwegumbo lyoye.”

18 Onkee ano Aajuda oya ti kuye: “Tu ulukila endhindhiliko, ndyoka tali ulike kutya owu na uuthemba wokuninga iinima mbika?” 19 Jesus okwe ya yamukula ta ti: “Kumunii po otempeli ndjika, notandi ke yi tungulula muule womasiku gatatu.” 20 Opo nduno Aajuda oya ti kuye: “Otempeli ndjika oya tungwa muule womimvo 46; oto ka vula ngiini oku yi tungulula muule womasiku gatatu?” 21 Ihe otempeli ndjoka Jesus a li ta popi, olutu lwe. 22 Sho Jesus a ka yumudhwa kuusi, aalongwa ye oya dhimbulukwa kutya okwa li ha popi oohapu ndhoka, noya itaale enyolo naashoka a li a popi.

23 Ihe sho a li muJerusalem poshituthi shOpaasa, aantu oyendji oya li ye mu itaale, sho ya mono iikumithalonga, mbyoka a longo. 24 Ihe Jesus ka li e ya inekela thiluthilu, molwaashoka okwa li e ya shi nawanawa, 25 noka li a pumbwa omuntu e mu lombwele kombinga yaantu, oshoka oku shi shoka shi li momitima dhawo.