Ontiyali kAakorinto
2 Inandi hala we oku mú yemateka, sho tandi ya oku mú talela po oshikando oshitiyali. 2 Oshoka ngele onde mú yemateke, olye ta ka nyanyudha ndje, kee shi ne, mboka nda yemateka? 3 Onda nyola shoka nda ninga, opo ngele nde ke ya kune, kaandi yematekwe kwaamboka ye na okunyanyudha ndje, molwaashoka ondi na einekelo kutya shoka hashi nyanyudha ndje osho wo hashi mu nyanyudha amuhe. 4 Oshoka sho nde mú nyolele, onda li ndi uvite uudhigu, tandi luluma unene komwenyo, nonda nika oluhodhi noonkondo. Inandi shi ninga ndi mú yemateke, ihe ondi mú tseyithile kutya ondi mú hole noonkondo.
5 Ngele opu na gumwe e mú yemateka, hane amuke a yemateka, ihe okwa yemateka ndje wo; inandi hala okupopya oshindji kombinga yasho. 6 Epukululo, ndyoka omulumentu ngoka a pewa koyendji, olya gwana; 7 ngashingeyi mu dhiminii po nehalo ewanawa noku mu hekeleka, opo kaa kale a gwililwa po* unene koluhodhi. 8 Onkee ano otandi mú kumagidha mú mu shilipaleke kutya omu mu hole. 9 Ndika olyo wo etompelo nde mú nyolele, opo ndi tseye kutya ohamu vulika miinima ayihe. 10 Ngele omwa dhimine po gumwe, nangame omuntu ngoka otandi mu dhimine po wo. Kehe shoka nda dhimine po gumwe, (ngele onda li nda pumbwa oku mu dhimina po) onde shi ningi omolweni koshipala shaKristus, 11 opo kaatu pukithwe* kuSatana, oshoka omakoto ge* otu ga shi.
12 Sho nda thiki muTroas, ndi uvithe onkundana ombwanawa kombinga yaKristus, ompito oya li ya egulukila ndje,* ndi longe iilonga yOmuwa, 13 ihe onda li ndi uvite nayi, molwaashoka inandi mona omumwatate Titus. Onkee ano onde ya laleke e tandi yi kuMakedonia.
14 Ihe Kalunga na pandulwe, ngoka he tu wilike aluhe molweendo lwesindano pamwe naKristus, nongaashi ezimba ewanawa tali taandele koombinga adhihe, osho wo Kalunga he tu longitha tu tseyithile aantu kehe pamwe kombinga yaKristus. 15 Oshoka kuKalunga otu li ezimba lya nika nawa lyaKristus mokati kaamboka taya ka hupithwa, naamboka taya ka hanagulwa po; 16 kwaamboka taya ka hanagulwa po, otu li ezimba lyeso, ndyono tali fala meso, omanga kwaamboka taya ka hupithwa, otu li ezimba lyomwenyo, ndyono tali fala momwenyo. Ihe olye a gwana okulonga iilonga mbika? 17 Otse, oshoka tse ihatu shingitha* oohapu dhaKalunga, ngaashi aantu oyendji haya ningi, ihe tu li aalanduli yaKristus ohatu popi oshili koshipala shaKalunga, ngaashi mboka twa tumwa kuKalunga.