Ontiyali kAakorinto
11 Onda hala andola mu idhidhimikile ndje, nonando otandi monika nda fa omuntu kee na oondunge. Ihe otamu idhidhimikile ndje tuu shili! 2 Oshoka ngame ondi na ko nasha nane,* ngaashi owala Kalunga e na ko nasha nane.* Oshoka onde mú uvanekela ndi mú gandje mu hokanwe komusamane gumwe, ano kuKristus, nonda hala ndi mú fale kuye mwa yogoka.* 3 Ihe ngaashi eyoka lya li lya pukitha Eva moku mu kotokela, onda tila kutya pamwe nane omadhiladhilo geni otaga vulu okunyatekwa, e tamu kala kaamu holelela we Kristus, nokukala kaamu shi aayogoki. 4 Otandi popi ngeyi, oshoka ngele opwe ya omuntu te mú uvithile kombinga yaJesus gulwe, kee shi ngoka hatu mú uvithile, nenge mwa etelwa ombepo yimwe yi ili, kaayi shi ndjoka mu na nale, nenge tamu uvithilwa onkundana ombwanawa, kaayi shi ndjoka mwa taamba ko nale, ohamu mú taamba ko owala nuupu. 5 Oshoka kandi wete pu na sha shoka tashi ulike kutya ondi vulike kaayapostoli yeni, mboka haya iningitha ya fa ye li nawa. 6 Ihe nokuli nonando kandi na uunkulungu wokupopya, ondi na ontseyo; shika onde shi mú ulukila sha yela momukalo kehe nomiinima ayihe.
7 Nenge onda yona, sho nde mú uvithile nenyanyu onkundana ombwanawa yaKalunga oshali nosho wo sho nda ifupipike, opo mu nenepekwe? 8 Onda yugu omagongalo galwe mokutaamba ko iikwatha, opo ndi mú yakule. 9 Sho nda li nane, onda li ndi na ompumbwe, ihe inandi tsika nando ogumwe omutenge, oshoka aamwatate, mboka ya zi kuMakedonia, oya li ya pe ndje ashihe shoka nda li nda pumbwa. Eeno, momukalo kehe, onda kala tandi kambadhala kaandi kale omutenge kune, notandi tsikile okuninga ngaaka. 10 Ihe manga oshili yaKristus yi li mungame, kapu na shoka tashi imbi ndje ndi itangele oshinima shoka miitopolwa yaAkaia. 11 Onetompelo lyashike? Mbela omolwaashoka ando kaandi mú hole? Kalunga oku shi shi kutya ondi mú hole.
12 Ihe shoka tandi ningi otandi tsikile oku shi ninga, opo aayapostoli mboka yalwe kaaya vule okumona etompelo lyokwiitanga kutya otaya longo ngaashi tse. 13 Oshoka aantu ya tya ngaaka aayapostoli yiifundja, aakotokeli, nohaya ifethitha ya fa aayapostoli yaKristus. 14 Onkee ano itashi kumitha, sho Satana ha kala ta ifethitha a fa omuyengeli gwuuyelele. 15 Itashi kumitha wo sho aapiya ye haya kala taya ifethitha ya fa aalongi yuuyuuki. Ihe ehulilo lyawo otali ka uthwa kiilonga yawo.
16 Otandi mú lombwele ishewe tandi ti: Inapu kala nando ogumwe ta dhiladhila kutya kandi na oondunge. Ihe nokuli ngele osho tamu dhiladhila, taambii ndje ko ongomuntu ngoka kee na oondunge, opo ndi vule ngaa okwiitanga. 17 Shoka tandi popi ngashingeyi itandi popi nda fa tandi landula oshiholelwa shOmuwa, ihe onga omuntu kee na oondunge, ngoka a inekela moondunge dhe mwene, nota itanga. 18 Molwaashoka oyendji otaya itangele iinima yopantu,* nangame otandi yi itangele wo. 19 Molwaashoka ohamu iti kutya ne “aanandunge,” ohamu kala mwa panda okwiidhidhimikila omagoya. 20 Niishewe, ohamu idhidhimikile kehe ngoka te mu ningi aapika, kehe ngoka te mú yugu omaliko geni, kehe ngoka te mú kutha shoka mu na, kehe ngoka te mú itangele, nakehe ngoka te mú dhenge moshipala.
21 Otashi sitha ohoni kutse okupopya ngawo, molwaashoka sho twa li mokati keni, otwa li tatu monika twa fa twa tila.
Ihe yalwe ngele inaya sa ohoni okwiitanga, nangame itandi si ohoni okwiitanga, nonando yalwe oye wete nda fa kaandi na oondunge. 22 Mbela yo Aahebeli? Nangame wo Omuhebeli. Mbela yo Aaisraeli? Nangame wo Omuisraeli. Mbela yo oluvalo* lwaAbraham? Nangame wo oluvalo lwaAbraham. 23 Mbela yo aayakuli yaKristus? Otandi popi onga omuntu a fa kee li nawa momutse kutya ondi ya vule ayehe: Onda longa iilonga oyindji ndi ya vule, nda tulwa mondholongo lwiikando ndi ya vule, nda dhengwa lwiikando, niikando oyindji okonyala ndi se. 24 Onda dhengwa lwiikando itano kAajuda oongola dhi thike pomilongo ndatu nomugoyi, 25 onda dhengwa lwiikando itatu nolunwa, onda dhengelwe oshikando shimwe nomamanya, onda li lwiikando itatu moshiponga shetekosikepa, noshikando shimwe, onda kala mokati kefuta uusiku nomutenya; 26 onda kala momalweendo lwiikando, miiponga yomomilonga, miiponga tayi ziilile ndje kaayugi, miiponga tayi ziilile ndje kaantu yomoshigwana shetu, miiponga tayi ziilile ndje kaantu yomiigwana yilwe, onda li nda taalela iiponga moshilando, nda taalela iiponga mombuga, onda li miiponga yomefuta, miiponga tayi ziilile ndje maamwatate yiifundja, 27 onda longo nuudhiginini nopwaa na oluthuwo, olundji onda li nda londokwa koomposi, onda li nda sa ondjala nenota, olundji, kanda li ndi na iikulya, onda li nda si uutalala, nonda li ndi na onkayi.*
28 Kakele kiinima mbyoka, esiku kehe, onda li nda thiminikwa meni lyandje: onda li wo handi kala ndi na oshimpwiyu omolwomagongalo agehe. 29 Ngele gumwe omunkundi, mbela nangame kandi shi omunkundi? Ngele gumwe okwa pundukithwa, mbela kandi na okugeya?
30 Ngele otandi itanga, onda itangele iinima, mbyoka tayi holola uunkundi wandje. 31 Kalunga, He yOmuwa Jesus, ngoka e na okutangwa sigo aluhe, oku shi kutya itandi fundju. 32 MuDamaskus, ngoloneya, ngoka a li kohi yewiliko lyomukwaniilwa Aretas, okwa li ta tonatele oshilando, opo a kwate ndje po, 33 ihe onda kulukithwa pevi ndi li moshimbamba okupitila mekende lyekuma lyoshilando, nonda hupu miikaha ye.