KuFilemon
1 Ngame, Paulus, ngoka ndi li mondholongo omolwaKristus Jesus, ondi li pamwe nomumwatate Timoteus, otandi ku nyolele, omulongi pamwe natse, Filemon, 2 nomumwameme Apia nosho wo Arkippus, omukwiita omukwetu, negongalo, ndyoka hali gongalele megumbo lyoye:
3 Uuwanawahenda nombili, ndjoka hayi zi kuKalunga, Tate yetu, nosho wo kOmuwa Jesus Kristus, nayi kale pamwe nane.
4 Ohandi pandula aluhe Kalunga kandje, uuna tandi ku tumbula momagalikano gandje, 5 sho handi uvu kombinga yeitaalo nohole yoye yokuhola Omuwa Jesus naayapuki ayehe. 6 Otandi galikana, opo eitaalo, ndyoka tu neni atuheni, li ku inyengithe wu taambe ko iinima ayihe, mbyoka twa pewa okupitila muKristus. 7 Oshoka ngame onda nyanyukwa noonkondo, nonda hekelekwa, sho nda uva kombinga yohole yoye, molwaashoka oomwenyo dhaayapuki odha talalekwa omolwoye, omumwatate.
8 Omolwetompelo ndyoka, nonando ondi na emanguluko enene lyokupopya, ndi li omuyapostoli gwaKristus, lyoku ku lombwela wu longe shoka sha uka, 9 pehala lyaashono, otandi ku indile nesimaneko omolwohole, ngame Paulus omulumentu omukokele, eeno, ngoka ngashingeyi ndi li wo mondholongo omolwaKristus Jesus. 10 Otandi ku indile nesimaneko shi na ko nasha nomumwandje Onesimus, ngoka nda kala onga he kuye, sho ndi li mondholongo.* 11 Nale, ka li e na oshilonga kungoye, ihe ngashingeyi oku na oshilonga kungoye nokungame. 12 Onkee ano Onesimus, ngoka ndi hole noonkondo, otandi mu shunitha kungoye.
13 Onda hala andola a kale pamwe nangame, opo a yakule ndje pehala lyoye, sho ndi li mondholongo omolwonkundana ombwanawa. 14 Ihe inandi hala okuninga nando osha inoo shi zimina, opo iilonga yoye iiwanawa kuu yi longe kethiminiko, ihe onehalo ewanawa. 15 Otashi vulika ndyoka olyo etompelo, sho a li a topoka nangoye uule wokathimbo,* opo wu mu galulilwe wu kale naye sigo aluhe, 16 hangaashi we omupika, ihe ongaashi omumwatate omuholike, e holike shili kungame, na unene tuu kungoye, ngoka wu na ekwatathano naye panyama nomOmuwa. 17 Onkee ano ngele owa tala ndje ko ndi li kuume koye, naye mu taamba ko wo nombili, ngaashi andola to taamba ndje ko. 18 Kakele kaashono, ngele okwa yona sha kungoye, nenge e na oongunga dhoye, iinima mbyoka ongame wu yi pula. 19 Ngame, Paulus, otandi nyola noshikaha shandje mwene kutya otandi dhi futu. Ngoye mwene owu shi shi kutya owu na oongunga dhomwenyo gwoye kungame. 20 Eeno, omumwatate, kwathela ndje medhina lyOmuwa; talaleka omwenyo gwandje omolwaKristus.
21 Ondi na lela einekelo kutya oto ke shi zimina, nomolwaashono, tandi ku nyolele, ndi shi shi kutya oto ka ninga nokuli shi vulithe pwaashoka tandi ku lombwele. 22 Ihe kakele kaashono, longekidhila ndje wo ehala lyokukala, oshoka ondi na einekelo kutya omolwomagalikano geni, otandi ka galulilwa kune.*
23 Epafras, onkwatwa onkwetu omolwaKristus Jesus, ote ku kundile po, 24 nosho wo Markus, Aristakus, Demas naLukas, mboka ye li aalongi pamwe nangame.
25 Uuwanawahenda wOmuwa Jesus Kristus nawu kale pamwe nane omolwombepo ombwanawa, ndjoka hamu ulike.