Timoteus omutiyali
4 Otandi ku ganitha koshipala shaKalunga noshaKristus Jesus, ngoka ta ka pangula aanamwenyo naasi pokuholoka kwe, naasho ta ka pangela mUukwaniilwa we. 2 Uvitha oohapu dhaKalunga; dhi uvitha neendelelo pomathimbo omawanawa nopomathimbo omadhigu; pukulula, ganda, kumagidha nokutala thiluthilu onteni,* nokulonga aantu nawanawa. 3 Oshoka otaku ke ya ethimbo, uuna aantu itaaya ka pulakena we kelongo lya uka,* ihe otaya ka landula omahalo gawo yene, otaye ki ikongela aalongi, mboka taye ke ya lombwela oohapu, ndhoka tadhi nywitha omakutsi gawo.* 4 Otaya ka etha po okupulakena koshili, notaya ka gandja eitulomo komahokololo giifundja. 5 Ihe ngoye, kala wu na oondunge miinima ayihe, idhidhimikila omaudhigu, longa oshilonga shomuuvithi,* gwanitha po thiluthilu uukalele woye.
6 Oshoka otandi tilwahi nale ongoshikunwayambo, nethimbo lyokumangululwa kwandje oli li pokuthika. 7 Onda kondja ekondjo ewanawa, onda matuka methigathano sigo okethikilo, nonda dhiginina eitaalo. 8 Okuza ngashingeyi, onda pungulilwa oshishani shuuyuuki, shoka Omuwa, omupanguli omuyuuki, te ke shi pa ndje shi li ondjambi mesiku ndyoka, hangame awike, ihe naamboka wo ya kala ya tegelela nondjuulukwe okuholoka kwe.
9 Ninga ashihe shoka to vulu wu ye kungame nziya. 10 Oshoka Demas okwa thiga ndje po, molwaashoka oku hole uuyuni mbuka,* nokwa yi kuTessalonika, omanga Kreskes a ya kuGalatia, naTitus okuDalmatia. 11 Lukas oye awike a thigala po nangame. Etelela Markus, oshoka oku li ekwatho enene kungame miilonga yaKalunga. 12 Tikikus onde mu tumu kuEfeso. 13 Sho to ya, etelela ombaikitha yandje, ndjoka nda thigile megumbo lyaKarpus muTroas, nosho wo oondhingambo, unene tuu ndhoka dha longwa moshipa.*
14 Aleksander, omuhambudhi gwongopolo okwa uvitha ndje nayi shili. Jehova ote ke mu galulila shi thike piilonga ye. 15 Nangoye kala we mu kotokela, oshoka oku li ompinge netumwalaka lyetu noonkondo.
16 Mokwiipopila kwandje oshikando shotango, kapwa li nando ogumwe ta popile ndje, ihe ayehe oya thigi ndje po. Otandi galikana Kalunga kee ya galulile uuwinayi. 17 Ihe Omuwa okwa kala pamwe nangame, nokwa pe ndje oonkondo, opo etumwalaka li vule okuuvithwa nawanawa okupitila mungame, niigwana ayihe yi vule oku li uva; nonda hupithwa mokana konime. 18 Omuwa ota ka hupitha ndje kuuwinayi awuhe, nokugamena ndje, sigo a fala ndje mUukwaniilwa we womegulu. Onkee ano okwa gwana okusimanekwa aluhe sigo aluhe. Amen.
19 Kundila po Priskila naAkula nosho wo yaandjaOnesiforus.
20 Erastus okwa kala muKorinto, ihe Trofimus onde mu thigi muMileto, ta ehama. 21 Ninga ashihe shoka to vulu, wu ye kungame, manga okufu inaaku thika.
Eubulus, Pudens, Linus, Klaudia nosho wo aamwatate ayehe otaye ku kundile po.
22 Omuwa na kale pamwe nangoye omolwombepo ombwanawa, ndjoka ho ulike. Uuwanawahenda we nawu kale pamwe nangoye.