PaJohannes

4 Sho Jesus* a dhimbulula kutya Aafarisayi oye shi kutya oku na aalongwa oyendji, nokwa ninginitha oyendji e vule Johannes— 2 nonando Jesus ye mwene ina ninginitha nando omuntu, ihe aalongwa ye oyo ye ya ninginitha— 3 okwa zi mo muJudea e ta shuna ishewe kuGalilea. 4 Ihe okwa li e na okupitila muSamaria. 5 Onkee ano okwa yi moshilando shomuSamaria shedhina Sikar, popepi nepya, ndyoka Jakob a pele omwana Josef. 6 Moshitopolwa moka omo nokuli mwa li ondungu yaJakob. Sho Jesus a zi molweendo ndwoka a vulwa, okwa kuutumba pondungu* ndjoka, nosha li lwopotundi ontihamano.*

7 Opo ihe omukiintu Omusamaria okwe ya okuteka omeya. Jesus okwa ti kuye: “Pe ndje, ndi nwe mo.” 8 (Aalongwa ye oya adhika ya ya koshilando, ya ka landa iikulya.) 9 Onkee ano omukiintu Omusamaria okwa ti kuye: “Ngele ngoye Omujuda, omolwashike to indile ndje omeya gokunwa, nonando ngame omukiintu Omusamaria?” (Aajuda kaya li ye na ekwatathano nAasamaria.) 10 Jesus okwe mu yamukula a ti: “Andola owa li wu shi omagano gaKalunga nosho wo kutya olye ta ti kungoye, ‘Pe ndje, ndi nwe mo,’ ando owe mu indile e te ku pe omeya gomwenyo.” 11 Okwa ti kuye: “Omusimanekwa, ku na nokuli oshitekitho shokuteka omeya, nondungu onde. Openi nduno to adha omeya ngoka gomwenyo? 12 Mbela ngoye owu vule tatekulululwa Jakob, ngoka e tu pa ondungu, moka ye, oyana nosho wo oongombe dhe ya kala haya nu?” 13 Jesus okwe mu yamukula a ti: “Kehe ngoka ta nu omeya ngoka ota ka sa enota natango. 14 Ihe kehe ngoka ta nu omeya, ngoka tandi mu pe, ita ka sa we enota nandonando, ihe omeya, ngoka tandi mu pe, otaga ka kala ngaashi omeya gothithiya muye, taga fuluka, ge mu pe omwenyo gwaaluhe.” 15 Omukiintu okwa ti kuye: “Omusimanekwa, pe ndje omeya ngoka, opo kaandi se we enota, nokaandi kale we handi ya okuteka omeya kehala ndika.”

16 Jesus okwa ti kuye: “Inda, e to ka ithana omusamane gwoye, mu ye naye kehala huka.” 17 Omukiintu okwe mu yamukula ta ti: “Kandi na omusamane.” Jesus okwa ti kuye: “Owu li mondjila, sho wa ti: ‘Kandi na omusamane.’ 18 Oshoka owa li wu na aasamane yatano, nomulumentu ngoka wu na ngashingeyi ke shi omusamane gwoye. Onkee ano shoka wa popi oshoshili.” 19 Omukiintu okwa ti kuye: “Omusimanekwa, ondi wete kutya ngoye omuhunganeki. 20 Ootatekulululwa oya li haya longele Kalunga kondundu ndjika, ihe ne ohamu ti kutya aantu oye na oku ka longela Kalunga kuJerusalem.” 21 Jesus okwa ti kuye: “Mukiintu ngoye, itaala shoka tandi ku lombwele. Ethimbo otali ya, uuna itaamu ka longela we Tate kondundu ndjika, nenge kuJerusalem. 22 Ne ohamu longele shoka kaamu shi, ihe tse ohatu longele shoka tu shi, oshoka ehupitho otali tameke nAajuda. 23 Ihe ethimbo otali ya, nolya thika, uuna aalongelikalunga yashili taya ka longela* Tate mombepo nomoshili, oshoka aantu ya tya ngaaka oyo Tate a hala ye mu longele. 24 Kalunga Ombepo, naamboka taye mu longele* oye na oku mu longela mombepo nomoshili.” 25 Omukiintu okwa ti kuye: “Ondi shi shi kutya Mesiasa ote ya, ngoka ha ithanwa Kristus. Uuna e ya, ote ke tu fatululila iinima ayihe.” 26 Jesus okwa ti kuye: “Ongame nguka, ngoka tandi popi nangoye.”

27 Opo nduno aalongwa ye oye ya, noya li ya kumwa, sho ye mu adha ta popi nomukiintu. Ihe kapu na nando ogumwe e mu pula ta ti: “Owa hala shike?” nenge “Omolwashike to popi naye?” 28 Onkee ano omukiintu okwa thigi po oshiyuma she, nokwa yi moshilando e ta lombwele aantu ta ti: 29 “Ileni mu ka tale omulumentu, ngoka a lombwele ndje iinima ayihe mbyoka nda ninga. Pamwe oye Kristus?” 30 Opo nduno aantu oya zi moshilando e taye ya kuJesus.

31 Pethimbo opo tuu mpoka, aalongwa ye oya kala taye mu ladhipike taya ti: “Muhongi,* lya.” 32 Ihe okwa ti kuyo: “Ngame ondi na iikulya, mbyoka kaamu shi.” 33 Onkee ano aalongwa oya pulathana taya ti: “Mbela opu na ngoka e mu etela iikulya?” 34 Jesus okwa ti kuyo: “Iikulya yandje oyo okulonga ehalo lyaangoka a tuma ndje nokumanitha iilonga ye. 35 Mbela shito pethimbo ndika ihamu ti oku na owala oomwedhi ne, eteyo li thike? Taleni, ngame otandi mu lombwele, yelutheni omeho geni, mu tale kutya omapya oga adha nale okuteywa. 36 Omuteyi ota mono nale ondjambi nota gongele iiyimati mbyoka tayi ka kala nomwenyo sigo aluhe, opo omukuni a nyanyukwe pamwe nomuteyi. 37 Oshoka oohapu ndhika odhoshili, ndhoka tadhi ti: Gumwe omukuni, nagulwe omuteyi. 38 Onde mu tumu mu ka teye mpoka inaamu longa. Yalwe oya longa, nomwa mona mo uuwanawa miilonga yawo.”

39 Aasamaria oyendji yomoshilando shoka oya itaale Jesus omolwoohapu dhomukiintu ngoka, sho a ti: “Okwa lombwela ndje iinima ayihe mbyoka nda ninga.” 40 Onkee ano sho Aasamaria ye ya kuye, oye mu indile a kale pamwe nayo, nokwa kala puyo uule womasiku gaali, 41 naashoka osha ningitha oyendji ya itaale omolwoohapu ndhoka a popile, 42 noya ti komukiintu ngoka: “Ngashingeyi, inatu itaala owala, molwaashoka we tu lombwele, ihe otwe shi i uvila tse yene, notu shi kutya omulumentu nguka oye omuhupithi gwuuyuni shili.”

43 Konima yomasiku gaali, okwa zi mo moka e ta yi kuGalilea. 44 Jesus ye mwene okwa li a popi kutya omuhunganeki iha kala a simanekwa moshilando shaandjawo. 45 Onkee ano sho a thiki muGalilea, Aagalilea oye mu taamba ko, molwaashoka oya li ya mono iinima ayihe, mbyoka Jesus a longo koshituthi muJerusalem, oshoka nayo koshituthi hoka oko ya li.

46 Opo nduno okwa shuna ishewe kuKana shomuGalilea, hoka a li a shitukitha omeya omaviinu. Opo ihe opwa li elenga lyontumba lyokuKapernaum, nolya li li na omwanamati ta ehama. 47 Sho omulumentu ngoka a uvu kutya Jesus okwe ya muGalilea a zi kuJudea, okwe ya kuye e te mu pula, a ye naye a ka aludhe omwanamati, oshoka okwa li e li pokusa. 48 Ihe Jesus okwa ti kuye: “Ne ihamu itaale nando, manga inaamu mona omandhindhiliko niikumithalonga.” 49 Elenga olya ti kuye: “Omuwa, ila tu ye, omanga okamwandje inaaka sa.” 50 Jesus okwa ti kulyo: “Shuna kegumbo, omumwoyemati okwa aluka.” Omulumentu ngoka okwa itaale shoka Jesus e mu lombwele, nokwa yi. 51 Ihe manga a li mondjila, aapiya ye oye mu tsakaneke, noye mu lombwele kutya omwanamati okwa aluka. 52 Onkee ano okwe ya pula kutya okwa aluka ethimbo peni. Oye mu yamukula ya ti: “Okwa aluka ohela, potundi ontiheyali.”* 53 Opo nduno he yomumati ngoka okwa ndhindhilike kutya potundi ndjoka opo naanaa Jesus a li e mu lombwele ta ti: “Omumwoyemati okwa aluka.” Opo ihe ye nuukwanegumbo we awuhe oya itaale muJesus. 54 Shoka osho sha li oshikumithalonga oshitiyali, shoka Jesus a longo, sho e ya muGalilea, a zi kuJudea.