Ontumwafo ya nyolelwa Aakolossa
2 Onda hala mu tseye nkene tandi longo nda mana mo omolweni, nomolwamboka yomuLaodikea nosho wo ayehe mboka inaaya mona ndje nando onale.* 2 Shika otandi shi ningi, opo omitima dhawo dhi vule okuhekelekwa, noya vule okukala ya hangana thiluthilu mohole, ya mone omayambeko, ngoka haga zi mokukala ya tompwa thiluthilu kombinga yeuvoko lyawo, opo ya mone ontseyo yashili yoshiholekwa oshiyapuki shaKalunga, ano Kristus. 3 Omaliko agehe guunongo nontseyo oga siikililwa nawa muye. 4 Otandi popi ngeyi, opo kaapu kale nando ogumwe te mú pukitha noohapu dhomaheka. 5 Nonando otwa topoka palutu , pambepo otu li pamwe; onda nyanyukwa okumona kutya omu na elandulathano nosho wo eitaalo lya kola muKristus.
6 Onkee ano ngaashi owala mwa taamba ko Kristus Jesus, Omuwa, tsikileni okweenda muukumwe naye, 7 meneni omidhi muye nokutungila kuye nosho wo okukala mu na eitaalo lya kola, ngaashi owala mwa longwa, noinamu etha po okupandula.
8 Kotokeni kaapu kale nando ogumwe te mú pukitha* nuufilosofi nosho wo noohapu dhowala, ndhoka dha kankamena koonkuluhedhi dhaantu, komadhiladhilo gomuuyuni,* ihe inadhi ikolelela kuKristus; 9 molwaashoka omaukwatya gaKalunga oge iwetikile thiluthilu muye. 10 Onkee ano omu na kehe shimwe, omolwangoka e li omutse gwomapangelo nogwoonkondopangelo adhihe. 11 Nane wo omwa kenkwa, sho mu na ekwatathano naye, hanekenko lyopalutu, ndyoka hali ningwa niikaha, ihe onekenko, ndyoka lyaKristus, ndyono tali mú mangulula mo molutu ndoka olulunde. 12 Oshoka omwa fumvikwa pamwe naye, sho mwa ninginithwa ngaashi ye, nomwa yumudhwa wo omolwekwatathano, ndyoka mu na naye, nomolweitaalo lyeni miilongankondo yaKalunga, ngoka a yumudha Jesus kuusi.
13 Nonando omwa li mwa sa omolwoondjo dheni, nosho wo sho inaamu kenkwa, Kalunga okwe mú yumudha pamwe naJesus. Okwa dhimi po oondjo dhetu adhihe nehalo ewanawa, 14 nokwa hulitha po* ompango, ndjoka ya li yi na omalombwelo, ya nyolwa niikaha, ndjoka ya li hayi aneke pomutenya omayono getu. Okwe yi kandula mo mondjila yetu moku yi alela komuti gwomahepeko.* 15 Okwa sindi omapangelo naamboka ye na oonkondopangelo, nokwe shi ulike montaneho kutya okwe ya sinda thiluthilu, sho a alelwa komuti gwomahepeko.
16 Onkee ano inamu etha nando omuntu gumwe e mú pe uusama kombinga yaashoka tamu li, nenge tamu nu, nenge kombinga yokudhimbulukwa oshituthi shontumba, nenge omwedhi omupe, nenge esabati. 17 Oshoka iinima mbyoka oyi li omuzizimba gwiinima tayi ke ya, ihe oshinima sho sheneshene oKristus. 18 Inamu etha nando omuntu e mú imbe mu ka mone ondjambi, ngoka ha iningitha a fa omwiifupipiki, ha galikana aayengeli,* “noha itangele” iinima, mbyoka a mona. Eitango lyomuntu a tya ngaaka kali na shoka tali ti, oshoka muye omwa udhilila owala omadhiladhilo gopantu. 19 Ina ikolelela kuKristus, ngoka e li omutse gwetu, ngoka ha gandja shoka olutu aluhe lwa pumbwa, opo lu longe nawa, nokukala lwa kwatelwa kumwe komatsakaneno gomasipa nokoothipa, nohe lu ningitha lu koke ngaashi Kalunga a hala.
20 Ngele omwa sa pamwe naKristus, nomwa tindi omadhiladhilo guuyuni, omolwashike tamu tsikile okukala mwa fa oshitopolwa shuuyuni, sho hamu vulika komalombwelo ngaka taga ti: 21 “Ino shi kwata, ino shi lola, ino shi guma,” 22 mbela iinima ayihe mbyoka itayi hulu po nokulongithwa kwayo, sho ya ikolelela kiipango nokomalongo gopantu? 23 Omalombwelo ngoka otaga monika ga fa taga ningi aantu aanongo, ihe itaga kwathele nando aantu ya kondjithe omahalo gawo gopanyama. Shono osho shi li ngawo, molwaashoka aantu oya hogolola yo yene omukalo gwawo gwokulongela Kalunga, haya iningitha ya fa aaifupipiki, nohaya hepeke omalutu gawo yene.