Ontiyali kAakorinto
10 Ngame Paulus, ngoka yamwe yomune hamu ti kutya ohandi ifupipike owala, uuna ndi li pune, ihe uuna kaandi po, ihandi mú yaalele, otandi mú kumagidha nombili nonomwenyo omwaanawa gwaKristus. 2 Onda inekela kutya sho tandi ka thika kune, mboka haya dhiladhila kutya ohatu ende panyama otandi ka adha ya lundulula etaloko lyawo, opo kaandi ya katukile onkatu. 3 Oshoka nonando ohatu ende panyama, ihatu kondjo iita yopanyama. 4 Oshoka iikondjitho, mbyono tatu longitha molugodhi lwetu kayi shi yopanyama, ihe oya za kuKalunga, noyi na wo oonkondo dhokuhanagula po iinima, mbyoka yi na omakankameno ga kola. 5 Oshoka otatu hanagula po omadhiladhilo nakehe shimwe shoka tashi imbi omuntu a tseye Kalunga, nedhiladhilo kehe otatu li tula muukwatwa,* opo tu li vulikithe kuKristus; 6 notatu ka kala twa ilongekidha okugeela kehe gumwe, ngoka ihaa vulika, konima ngele mwa ulike kutya ohamu vulika thiluthilu.
7 Ne ohamu tokola iinima sha ikolelela keholokopo lyayo. Ngele gumwe okwa itaala kutya ye ogwaKristus, na dhiladhile ishewe kombinga yoshinima shika. Ngaashi owala ye gwaKristus, natse wo oyaKristus. 8 Oshoka nokuli nonando ondi itangele owala kashona oonkondopangelo, ndhoka Omuwa e tu pa, tu mú tunge, nokaatu mú teye po, itandi ka sithwa ohoni. 9 Oshoka inandi hala okukala nda fa ando tandi mú tilitha noontumwafo dhandje. 10 Oshoka ohaya ti: “Oontumwafo dhe odha popya iinima ya simana noyi na eityo, ihe eholokopo lye oli dhinitha, nokupopya kwe itaku tompola sha.” 11 Omuntu ngoka na kale e shi shi kutya shoka hatu nyola* moontumwafo, uuna kaatu po, osho wo hatu ningi,* uuna tu li pune. 12 Ihe inatu hala okukala twa fa mboka haya itanga, nenge tu iyelekanithe nayo. Oshoka ohaya iyeleke, nohaya ifaathanitha nomithikampango dhawo yene, nokungawo, ohaya ulike kutya kaye na ontseyo yasha.
13 Nonando ongawo, ihatu itangele shoka inaatu uthilwa tu longe, ihe ohatu itangele oshinakugwanithwa, shoka Kalunga e tu uthila, nane wo mwa kwatelwa mo. 14 Odhoshili kutya sho twe ya kune, inatu ninga sha shoka Kalunga inee tu lombwela tu longe, ihe otse yotango twe mú uvithile onkundana ombwanawa kombinga yaKristus. 15 Aawe, itatu itangele iilonga, mbyoka ya longwa kuyalwe, mboka ya konda shoka ya lombwelwa kuKalunga, ihe otwa inekela kutya sho eitaalo lyeni tali tsikile okukoka, nena iilonga, mbyoka twa longa moshitopolwa shetu, otayi ka vula okwiindjipala. Nena iilonga yetu otayi ka tamunuka mo ishewe, 16 opo tu vule okuuvitha onkundana ombwanawa kiitopolwa yokokule nane, nokaatu itangele shoka sha longwa nale moshitopolwa shagulwe. 17 “Ihe ngoka ta itanga na itangele Jehova.” 18 Oshoka Jehova oha tumbaleke omuntu ngoka a hokwa, ihe iha hokwa ngoka ta itumbaleke ye mwene.