Yotango kAatessalonika
2 Aamwatate, ne yene omu shi shi nawa kutya etalelopo lyetu olya eta iizemo iiwanawa. 2 Oshoka nonando petameko, otwa li twa mono iihuna nokuungaungiwa natse nayi muFilippi, ngaashi mu shi shi, kekwatho lyaKalunga ketu, otwa kala tu na uulaadhi,* woku mú lombwela onkundana ombwanawa yaKalunga, nonando otwa li twa taalela omapataneko ogendji.* 3 Oshoka omakumagidho, ngoka tatu mú pe, inaga puka, noitatu ge mú pe tu na omainyengotompelo omawinayi, nenge opo tu mú pukithe; 4 ihe ngaashi owala twa talika ko twa gwana kuKalunga, nokwe tu inekelela onkundana ombwanawa, itatu popi tu opalele aantu, ihe oKalunga, ngoka ha konakona omitima.
5 Omu shi shi nawa nokuli kutya inatu ya kune noohapu dhomaheka, noinatu iningitha twa fa aantu ye li nawa, opo tu mone uuwanawa wontumba kune; Kalunga oye ombangi yetu. 6 Shimwe ishewe, inatu kala tatu kongo esimano kaantu, kutya nduno okune, nenge okuyalwe, nonando otwa li tatu vulu oku mú tsika omutenge omudhigu, tu li aayapostoli yaKristus. 7 Mepingathano naashono, sho twa li mokati keni, otwa ungaunga nane nonge nosho wo nolukeno, ngaashi owala omuvalakadhi ha sile oyana oshimpwiyu pahole. 8 Onkee ano molwaashoka otu mú hole noonkondo, otwa li twa tokola toko oku mú uvithila onkundana ombwanawa yaKalunga, nokuhupula oomwenyo dhetu, opo tu mú kwathele.
9 Aamwatate, otamu dhimbulukwa nawa iilonga yetu, mbyoka twa longo nuudhiginini nokupusha. Otwa kala nokulonga omutenya nuusiku, tu isile oshimpwiyu, opo kaatu tsike nando ogumwe gwomune omutenge omudhigu, sho tatu mú uvithile onkundana ombwanawa yaKalunga. 10 Ne naKalunga omu li oombangi dhankene eihumbato lyetu lya ulike kutya otu li aadhiginini, aayuuki, nokatu na nando oshipo shasha mokati keni, ne, ooitaali. 11 Omu shi shi nawa kutya otwa kala tatu mú kumagidha, tatu mú hekeleke, nokuladhipika kehe gumwe gwomune, ngaashi he ha ningile oyana, 12 opo mu tsikile okwiihumbata momukalo, ngoka gwa hokiwa kuKalunga, ngoka te mú ithana mu ye mUukwaniilwa we nomeadhimo lye;
13 nomolwaashono hatu pandula Kalunga kaapu na oluthuwo, oshoka sho mwa uvu oohapu dhaKalunga kutse, inamu dhi taamba ko dhi li oohapu dhaantu, ihe ongaashi dhi li lela oohapu dhaKalunga, ndhoka tadhi longo mune mu li ooitaali. 14 Oshoka ne, aamwatate, omwa landula oshiholelwa shomagongalo gaKalunga gomuJudea, ngoka ge li muukumwe naKristus Jesus, molwaashoka omwa hepekwa kaantu yomoshilongo sheni, ngaashi nayo ya li ya hepekwa kAajuda, 15 mboka nokuli ya dhipaga Omuwa Jesus nosho wo aahunganeki, noye tu hepeka wo. Shimwe ishewe, itaya nyanyudha Kalunga, nokaye na ko nasha nuuwanawa waantu ayehe, 16 sho taya kambadhala oku tu keelela tu uvithile aantu yomiigwana, opo kaaya hupithwe. Kungawo, ohaya gwedha ko aluhe komayono gawo, nondjahi yaKalunga oye ya adha.
17 Ihe aamwatate, sho twa li twa topolwa ko kune uule owala wokathimbo okafupi (palutu, otwe mu kaleke momadhiladhilo), molwaashoka otwa li twa halelela oku mú mona, otwa ningi oonkambadhala tu ye kune.* 18 Omolwetompelo ndyoka, otwa li twa hala okuya kune, eeno, ngame Paulus, onda kambadhala okuya kune, halumwe aluke, ihe olwiikando iyali; ihe Satana okwa li a tula omayinda mondjila yetu. 19 Oshike shi li etegameno lyetu, enyanyu lyetu nosho wo oshishani shetu montaneho yOmuwa gwetu Jesus pokukala po kwe? Hane mbela? 20 Omu li shili esimano nenyanyu lyetu.