paMarkus

6 Jesus okwa zi po mpoka e ta yi koshitopolwa shaandjawo, naalongwa ye oye mu landula. 2 Sho Esabati lya thiki, okwa tameke okulonga aantu mosinagoga, noyendji mboka ya pulakene kuye oya li ya kumwa noya ti: “Iinima mbika omulumentu nguka okwe yi adha peni? Nomolwashike oye e na okupewa uunongo mbuka noonkondo dhokulonga iikumithalonga ya tya ngaaka? 3 Mbela nguka ke shi omuhongi gwiipilangi, omwana gwaMaria, naamwayinamati kaye shi Jakob, Josef, Judas naSimon? Yo aamwayinakadhona hayo mbaka ye li natse?” Onkee ano inaye mu itaala. 4 Ihe Jesus okwa ti kuyo: “Omuhunganeki iha kala a simanekwa moshitopolwa shaandjawo, nenge kaakwanezimo ye nomegumbo lyaandjawo.” 5 Onkee ano ka li a longo iikumithalonga oyindji moshitopolwa shoka, kakele owala kokutenteka iikaha ye kaantu aashona, mboka ya li taya ehama e te ya aludha. 6 Osha li nokuli she mu kumitha, sho kaaye na eitaalo, nokwa li ta ende nomikunda moshitopolwa shoka, ta longo aantu.

7 Opo nduno okwa ithana aayapostoli ye 12, nokwa tameke oku ya tuma ooyaali nooyaali e te ya pe oonkondo dhokutidha mo oombepo dha nyata.* 8 Shimwe ishewe, okwe ya pe omalombwelo kaaya ye noshikwiila, nompunda yiikulya, nenge nokampunda kiimaliwa,* kakele owala kondhimbo. 9 Pehala lyaashono, okwe ya lombwele owala ya zale oongaku nokaaya zale oonguwo mbali.* 10 Okwe ya lombwele wo a ti: “Uuna tamu yi megumbo lyontumba, kaleni moka, sigo tamu zi mo moshitopolwa shoka. 11 Shimwe ishewe, kehe moshitopolwa itaamu taambiwa mo, nenge itaamu pulakenwa mo, sho tamu zi mo, ipupuleni ontsi koompadhi dheni, shi kale uumbangi kuyo.” 12 Opo nduno aayapostoli oya yi e taya uvithile aantu ya itedhulule, 13 noya tidha mo oondemoni odhindji maantu e taya gwayeke omagadhi oyendji, mboka ya li taya ehama, noye ya aludha.

14 Opo ihe omukwaniilwa Herodes okwa uvu kombinga yasho, oshoka edhina lyaJesus olya li lya tseyika apuhe, naantu oya li taya ti: “Johannes Omuninginithi okwa yumudhwa kuusi, nomolwaashoka ta vulu okulonga iikumithalonga.” 15 Ihe yalwe oya li taya ti: “OElia.” Omanga yalwe ya li taya ti: “Omuhunganeki owala ngaashi aahunganeki yopethimbo lyonale.” 16 Ihe sho Herodes e shi uvu, okwa ti: “Johannes ngoka nda tetitha omutse, oye a yumuka.” 17 Molwaashoka Herodes okwa li a hokana Herodias, ngoka a li omukulukadhi gwomumwahe Filippus, okwa kwatitha po Johannes e te mu tulitha mondholongo omolwaHerodias, 18 oshoka Johannes okwa kala ta lombwele Herodes, ta ti: “Inashi pitikwa pampango, sho wa hokana omukiintu gwomumwaho.” 19 Onkee ano Herodias okwa kala a kwatela Johannes onkone, nokwa li a hala oku mu dhipaga, ihe ka li ta vulu oku shi ninga, 20 oshoka Herodes okwa li a tila Johannes, molwaashoka okwa li e mu shi kutya omulumentu omuyuuki nomuyapuki, nokwa li te mu* gamene. Ethimbo kehe a uvu oohapu dhaJohannes, ka li e shi kutya na ninge po shike. Nonando ongawo, okwa kala e na ehalo lyokupulakena kuye.

21 Ihe Herodias okwa mono ompito ombwanawa, sho Herodes a hiya kuulalelo omalenga ge, aawiliki yomatangakwiita nosho wo aanenentu yomuGalilea, mesiku lyevalo lye. 22 Opo nduno omwanakadhona gwaHerodias okwe ya mo, nokwa tutula uudhano mboka Herodes nosho wo mboka ya li taya li* pamwe naye ya li ya panda. Opo ihe omukwaniilwa okwa lombwele omukadhona ngoka a ti: “Pula ndje shaashoka wa hala, ngame notandi shi ku pe.” 23 Eeno, okwa gana kuye ta ti: “Kehe shoka to pula ndje otandi shi ku pe, kutya nduno etata lyuukwaniilwa wandje.” 24 Onkee ano omukadhona okwa yi kuyina e te mu pula ta ti: “Nandi pule shike?” Yina okwe mu yamukula ta ti: “Omutse gwaJohannes Omuninginithi.” 25 Nziya, omukadhona ngoka okwa yi komukwaniilwa e te mu lombwele shoka a hala, ta ti: “Onda hala wu pe ndje omutse gwaJohannes Omuninginithi ngashingeyi moshiyaha shika.” 26 Nonando omukwaniilwa okwa li a nika oluhodhi noonkondo, ka li a hala okukala inaa gwanitha po shoka omukadhona a pula, omolwegano lye nomolwaayenda ye.* 27 Onkee ano omukwaniilwa okwa tumu nziya gumwe gwomaakwiita ye e te mu lombwele e mu etele omutse gwaJohannes. Opo ihe okwa yi kondholongo e ta tete ko omutse gwaJohannes, 28 nokwe gu eta gu li moshiyaha. Omukwiita okwe gu pe omukadhona, nomukadhona okwe gu gandja kuyina. 29 Sho aalongwa ye ye shi uvu, oye ya e taya kutha po omudhimba gwe e taye gu tula mombila.*

30 Aayapostoli oya gongala komeho gaJesus e taye mu hokololele iinima ayihe, mbyoka ya ninga naambyoka ya longo aantu. 31 Opo nduno okwa ti kuyo: “Ileni tu yeni kehala li ikalela, mu ka vululukwe po kashona.” Okwa popi ngawo, oshoka opwa li pu na aantu oyendji taye ya notaya yi, nokaya li ya mono ethimbo lyokuthuwa po, nokuli nolyokulya. 32 Onkee ano oya yi nowato kehala li ikalela ya ka kale oyo ayeke. 33 Ihe aantu oye ya mono, sho taya yi, noyendji oye shi tseya noye ya landula ye li kolupadhi taya matuka ya za miilando ayihe, noya thiki ko tango kehala hoka. 34 Sho a zi mo mowato, okwa mono ongundu yaantu nokwa li e ya uvitile ohenda, oshoka oya li ya fa oonzi dhaa na omusita. Opo nduno okwa tameke oku ya longa iinima oyindji.

35 Sho kwa toko, aalongwa ye oye ya kuye e taya ti: “Kehala huka okokule, nokwa toka. 36 Ya laleka ya ye momikunda ya ka ilandele sha shokulya.” 37 Okwe ya yamukula ta ti: “Ya peni sha shokulya.” Opo ihe oya ti kuye: “Natu ye tu ke ya landele iikwiila yoondenari 200 e tatu ya pe ya lye?” 38 Okwa ti kuyo: “Omu na po iikwiila ingapi? Ka taleni kutya omu na po ingapi.” Sho ya shilipaleke, oya ti: “Itano noohi mbali.” 39 Opo nduno okwa lombwele aantu ayehe ya kuutumbe moongundu pomwiidhi omutalala. 40 Onkee ano oya kuutumba moongundu dhethele nodhomilongo ntano. 41 Opo nduno Jesus okwa kutha iikwiila itano noohi mbali e ta ligamene kegulu nokwa galikana. Opo ihe okwa pambula iikwiila e ta tameke oku yi pa aalongwa ye yi topolele aantu, nokwa topola wo oohi ndhoka mbali dhi pewe aantu ayehe. 42 Onkee ano ayehe oya li noya kuta. 43 Kakele koohi, oya gongele wo iipambu yiikwiila, mbyoka ya hupu po ya udha iimbamba 12. 44 Mboka ya li iikwiila oya li aalumentu 5 000.

45 Nziya, okwa lombwele aalongwa ye, ya londe mowato, ye mu tetekele handiyaka yefuta kuBetsaida, omanga ye ta laleke ongundu yaantu. 46 Ihe konima sho e ya laleke, okwa yi kondundu a ka galikane. 47 Sho kwa toko, owato, moka aalongwa ya li, oya adhika yi li pokati kefuta, ihe ye okwa li kondundu oye awike. 48 Onkee ano sho e ya mono taya kondjo nokudhuga owato, omolwombepo ndjoka ya li tayi ya ziilile komeho, okwe ya kuyo ta ende kombanda yomeya lwokoongulasha,* ihe okwa li a hala oku ya pitilila.* 49 Sho ya mono Jesus ta ende kombanda yomeya, oya ti: “Yakwetu, oshike shono tashi zi hono?”* Oya li wo taya kugu mokule. 50 Ayehe sho ye mu mono oya li ya tila noonkondo. Ihe Jesus okwe ya lombwele nziya a ti: “Ngungumaneni, ongame; inamu tila.” 51 Opo nduno okwa yi kuyo mowato, nombepo oya kodha. Oshinima shoka oya li ye shi kuminwa noonkondo, 52 molwaashoka kaya li ye uvite ko eityo lyiikwiila, nomadhiladhilo gawo kaga li natango ga patuluka.

53 Sho ye ya popepi nomunkulofuta gwaGenesaret, oya pandekele owato yawo popepi nagwo. 54 Ihe nziya sho ya zi mo mowato, aantu oye ya dhimbulula. 55 Opo nduno aantu yomoshitopolwa shoka ashihe oya matuka, noya eta aavu yawo kehala kehe hoka ya uvu kutya Jesus oko e li, ye ya inda koontala. 56 Shimwe ishewe, kehe momukunda, nenge moshilando a yi, aantu oya eta aavu yawo pomahala gomalandithilo noye mu indile ya gume owala nando okoonyemba dhonguwo ye yokombanda. Ayehe mboka ye dhi kwata oya aluka.