Yotango kAatessalonika
1 Ngame Paulus, pamwe naSilvanus* naTimoteus, otandi nyolele egongalo lyomuTessalonika, ndyoka li li muukumwe naKalunga, Tate nosho wo nOmuwa Jesus Kristus:
Uuwanawahenda nombili nayi kale pamwe nane.
2 Ohatu pandula aluhe Kalunga, uuna tatu mú tumbula amuhe momagalikano getu, 3 oshoka ohatu dhimbulukwa aluhe iilonga yeni yuudhiginini, oonkambadhala dheni dha mana mo dhopahole neidhidhimiko lyeni omolwetegameno ndyoka mu na mOmuwa gwetu, Jesus Kristus, koshipala shaKalunga, Tate yetu. 4 Aamwatate, otu shi shi kutya Kalunga oku mú hole, nokwe mú hogolola, 5 molwaashoka onkundana ombwanawa inamu yi uva owala okupitila moohapu, ihe omwa kwathelwa wo kombepo ondjapuki. Otwa tompwa thiluthilu kutya shoka twe mú uvithile oshoshili, netumwalaka lyetu olye mú kwathela noonkondo. 6 Omwa taamba ko oohapu dhaKalunga nenyanyu, ndyoka hali etithwa kombepo ondjapuki, nonando omwa li momaudhigu ogendji. Onkee omwa holele Omuwa, nomwe tu holele wo. 7 Sho mwa ningi ngawo, omwa tulile po oshiholelwa ooitaali ooyakweni ayehe yomuMakedonia noyomuAkaia.
8 Odhoshili kutya inamu uvithila owala oohapu dhaJehova muMakedonia nomuAkaia, ihe neitaalo lyeni muKalunga olya uvika wo apuhe, opo kaatu kale we twa pumbwa okupopya sha. 9 Oya kala nokuhokolola shi na ko nasha nankene twe mú uvithile oshikando shotango, nankene mwa etha po okulongela iikalunga yeni e tamu ningi aapiya yaKalunga kashili omunamwenyo, 10 nokutegelela Omwana a ze megulu, ngoka a yumudha kuusi, ano Jesus, ngoka te ke tu hupitha kondjahi yaKalunga, ndjoka tayi ya.