Ontumwafo ya nyolelwa Aakolossa
1 Ngame Paulus, omuyapostoli gwaKristus Jesus pahalo lyaKalunga, nondi li pamwe nomumwatate Timoteus, 2 otandi nyolele aayapuki nosho wo aamwatate aadhiginini yomuKolossa, mboka ye li muukumwe naKristus:
Uuwanawahenda nombili, ndjoka hayi zi kuKalunga, Tate yetu, nayi kale pamwe nane.
3 Ohatu pandula aluhe Kalunga, He yOmuwa gwetu, Jesus Kristus, uuna tatu mú galikanene, 4 oshoka otwa uva kutya omwa itaala muKristus Jesus, nomu hole aayapuki ayehe 5 omolwetegameno, ndyoka mwa longekidhilwa megulu. Omwa uva nale kombinga yetegameno ndika okupitila metumwalaka lyoshili lyonkundana ombwanawa, 6 ndyoka lya thiki kune. Ngaashi owala onkundana ombwanawa tayi imike iiyimati, notayi taandele muuyuni awuhe, oya taandele wo mokati keni okuza esiku, ndyoka mwe yi uvu, nomwa tseya nawa oshili kombinga yuuwanawahenda waKalunga. 7 Owo mboka mwe wu ilongo kuEpafras, omupiya omukwetu omuholike, ngoka e li omuyakuli omudhiginini gwaKristus omolwetu. 8 Okwe tu tseyithila wo kombinga yohole yeni, ndjoka mwa ulika kekwatho lyombepo yaKalunga.
9 Onkee ano okuza esiku ndyoka, sho natse twe shi uvu, inatu etha po oku mú galikanena nokupula mú kale mu na ontseyo yashili thiluthilu, yi na ko nasha nehalo lyaKalunga, mu kale mu na uunongo we awuhe, nomu uve ko iinima yopakalunga. 10 Nena kungawo, otamu vulu okweenda mondjila, ndjoka Jehova a hala, opo mú mu nyanyudhe thiluthilu, sho tamu tsikile nokwiimika iiyimati moshilonga kehe oshiwanawa, nomu indjipaleke ontseyo yeni yokutseya Kalunga. 11 Otatu galikana Kalunga a longithe oonkondo dhe oonenenene, ndhoka e na, opo e mú koleke, mu idhidhimikile ayihe nenyanyu, 12 sho tamu tsikile okupandula Tate, ngoka e mú ningi mu kale mwa gwana oku ka kala aathigululi pamwe naayapuki, mboka ye li muuyelele.
13 Okwe tu hupitha moonkondo dhomilema e te tu eta muukwaniilwa wOmwana omuholike, 14 ngoka okupitila mekulilo lye twa vulu okudhiminwa po oondjo dhetu. 15 Oye oshifetha shaKalunga ihaa monika, omutango gwiishitwa ayihe; 16 molwaashoka iinima ayihe yilwe megulu nokombanda yevi oya shitwa okupitila muye, iinima mbyoka, yi wetike, niinima, mbyoka kaayi wetike, kutya nduno aaleli, nenge aawa, nenge omapangelo, nenge oomboka ye na oonkondopangelo. Iinima ayihe yilwe oya shitwa okupitila muye, noye ya shitilwa. 17 Shimwe ishewe, manga iinima yilwe ayihe inaayi shitwa, oko a li nale, niinima ayihe yilwe oyi li po okupitila muye, 18 noye omutse gwolutu, ano gwegongalo. Oye etameko, omutango mokuyumudhwa kuusi, opo a vule okukala omutango gwiinima ayihe; 19 molwaashono Kalunga okwa li a hala Kristus a kale e na thiluthilu uukwatya wa fa we, 20 nokupitila muye, Kalunga iinima ayihe yomegulu noyokombanda yevi okwe yi hanganitha naye mwene. Okwa panga ombili nayo okupitila mombinzi yaJesus, ndjoka ya tika komuti gwomahepeko.*
21 Odhoshili kutya nale omwa li kokule naKalunga, nomwa li aatondi ye, molwaashoka omwa li owala hamu dhiladhila okulonga uuwinayi, 22 ihe ngashingeyi, okwe mú hanganitha naye mwene okupitila meso lyOmwana, ngoka a yamba po olutu lwe lwopanyama, opo mu kale aayapuki, kaamu na okapethili kasha, nokaapu kale nando ogumwe te mú tamanekele sha koshipala she— 23 Onkee ano tsikileni okukala meitaalo, mwa kolelela kekankameno, mwa dhiginina, ne kaamu hedhe kokule netegameno lyonkundana ombwanawa, ndjoka mwa uva, noya uvithilwa aashitwa ayehe kohi yegulu. Ngame Paulus, onda ningi omuuvithi gwonkundana ndjika ombwanawa.
24 Ngashingeyi, onda nyanyukwa, sho tandi mono iihuna omolweni, tandi mono iihuna noonkondo ngaashi Kristus, notandi tsikile okumona iihuna omolwolutu lwe, ndoka lu li egongalo. 25 Kalunga okwa langeke ndje po, ndi yakule egongalo ndika omolweni, opo ndi uvithe oohapu dhe nomutima aguhe, 26 ndhoka dha kwatela mo oshiholekwa oshiyapuki, shoka sha li sha holekwa uuyuni wonale* nosho wo omapipi, ngoka ga pita nale. Ihe ngashingeyi osha hololelwa aayapuki ye; 27 Kalunga okwa kala a halelela okutseyithila iigwana eliko ndika lya dhenga mbanda, ano ndyoka li li oshiholekwa oshiyapuki, shoka shi li okukala kweni muukumwe naKristus nosho wo etegameno lyoku ka tumbalekwa pamwe naye. 28 Oye ngoka tatu uvithile aantu kombinga ye, tatu kumagidha, notatu longo kehe gumwe uunongo awuhe, mboka twa pewa, opo tu kwathele kehe gumwe a kale thiluthilu muukumwe naKristus. 29 Onkee ano sigo oompano, ngame otandi longo nuudhiginini, tandi idhipagele po kekwatho lyoonkondo dhe, ndhoka tadhi longo lela mungame.