Yotango kAatessalonika

3 Onkee ano sho twa li itaatu vulu we oku shi idhidhimikila, otwa mono kutya oshi li nawa tu kale otse atuke muAtena; 2 notwa tumu Timoteus kune, omumwatate nomuyakuli gwaKalunga* gwonkundana ombwanawa kombinga yaKristus, a koleke eitaalo lyeni noku mú hekeleke, 3 opo kaapu kale nando ogumwe ta tengaukithwa komaudhigu ngoka. Oshoka ne yene omu shi shi kutya itatu vulu okuhenuka omaudhigu ga tya ngaaka.* 4 Oshoka sho twa li nane, otwa li hatu mú lombwele komeho yethimbo kutya otatu ka adhika komaudhigu, naashoka osho tashi ningwa, ngaashi mu shi shi. 5 Onkee ano molwaashoka kanda li we tandi vulu oku shi idhidhimikila, onda tumu Timoteus kune, opo a lombwele ndje kombinga yuudhiginini weni, nongele pamwe Omumakeli okwe mú makela, nena iilonga yetu otashi vulika yi kale osima yowala.

6 Ihe ngashingeyi, Timoteus okwe ya kutse a zi kune, nokwe tu lombwela onkundana ombwanawa kombinga yuudhiginini nohole yeni, nankene hamu tu dhimbulukwa aluhe nenyanyu, nomwa yuulukwa oku tu mona, ngaashi owala natse wo twe mú yuulukwa; 7 nomolwaashono, aamwatate, twa hekelekwa omolwuudhiginini weni, mboka mwa ulika, nonando omwa li momaudhigu nokumona iihuna.* 8 Ohashi tu koleke,* ngele mwa dhiginina mOmuwa. 9 Oshoka ongiini tatu vulu okuulika olupandu lwetu kuKalunga omolweni, sho mwe tu nyanyudha noonkondo? 10 Ohatu galikana twa mana mo omutenya nuusiku, opo tu mú mone oshipala noshipala,* notu gwedhe keitaalo lyeni, shoka sha kambela ko.

11 Kalunga, Tate yetu, nOmuwa gwetu Jesus, naye shi ningithe tashi wapa tu vule okuya kune. 12 Kakele kaashono, Omuwa ne mu kwathele mu gwedhe ko kohole yeni yokuholathana, ngaashi owala tse tu mú hole, 13 opo a vule okukoleka omitima dheni, mu kale kaamu na oshipo shasha, nomu li aayapuki koshipala shaKalunga, Tate yetu, sho Omuwa gwetu Jesus te ke ya pamwe naayapuki ye ayehe.