Timoteus omutiyali
2 Onkee ano ngoye, mumwandje, tsikila okupula Kalunga e ku pe oonkondo omolwuuwanawahenda, mboka Kristus Jesus a ulika, 2 nosho wo miinima, mbyoka wa uva kungame, noya popilwa koombangi odhindji. Iinima mbyoka yi inekelela aalumentu aadhiginini, mboka ya gwana oku yi longa wo yalwe. 3 Idhidhimikila omahepeko, wu li omukwiita gwashili gwaKristus Jesus. 4 Kapu na omulumentu e li omukwiita hi ipyakidhile noongeshefa,* opo a kale a hokiwa kwaangoka e mu nyolitha muukwiita. 5 Nokuli ngele tashi ya pomaudhano, kapu na ngoka ha pewa oshishani, okuninga i iyutha koompango dhuudhano. 6 Omunepya, ngoka ha longo nuudhiginini, oye tango ha li iilikolomwa yomepya lye. 7 Kala aluhe ho dhiladhila kombinga yaashoka tandi ku lombwele. Omuwa ote ke ku kwathela wu uve ko iinima ayihe.
8 Dhimbulukwa kutya Jesus Kristus okwa yumudhwa kuusi, nokwa li gwomoluvalo* lwaDavid, metsokumwe nonkundana ombwanawa, ndjoka tandi uvitha, 9 notandi hepekelwa, nonda tulwa mondholongo ongomukolokoshi omolwayo. Nonando ongawo, oohapu dhaKalunga inadhi mangwa. 10 Omolwoshinima shoka, otandi tsikile okwiidhidhimikila iinima ayihe omolwaahogololwa, opo nayo ya vule okumona ehupitho okupitila muKristus Jesus, pamwe neadhimo lyaaluhe. 11 Oohapu ndhika odhi shi okwiinekelwa, ndhoka tadhi ti: Odhoshili kutya ngele otwa si pamwe, otatu ka kala wo pamwe; 12 ngele otwa tsikile okwiidhidhimika, otatu ka pangela wo pamwe tu li aakwaniilwa; ngele otwe mu idhimbike, naye ote ke tu idhimbika wo; 13 ngele tse otwa kala kaatu shi aadhiginini, ye ota kala omudhiginini, oshoka ita vulu okwiidhimbika ye mwene.
14 Tsikila oku ya dhimbulukitha iinima mbika, oku ya longa* koshipala shaKalunga, kaaya kale taya patana kombinga yiitya, oshinima shoka kaashi na nando oshilonga, molwaashoka otashi uvitha nayi* mboka taya pulakene. 15 Ninga ashihe shoka to vulu wu kale wa hokiwa kuKalunga, wu kale omuniilonga, ngoka kee na shoka tashi mu sitha ohoni, nowu shi okulonga nawa oshili yoohapu dhaKalunga. 16 Ihe yanda oohapu kaadhi na oshilonga, ndhoka tadhi nyateke shoka oshiyapuki, oshoka otadhi ku fala kokulekule naKalunga, 17 noohapu dhawo otadhi taandele ongondhiya tayi kunya ko oontumba kolutu. Himeneus naFiletus oyamwe yomuyo. 18 Aalumentu mbaka oya thiga po oshili, taya ti kutya eyumuko olya ningwa nale, notaya yono po eitaalo lyayamwe. 19 Nonando ongawo, ekankameno lya kola lyaKalunga otali kala lya kolelela, ndyoka li na endhindhiliko tali ti: “Jehova oku shi mboka ye,” nosho wo “Kehe ngoka ta ithana edhina Jehova na ethe po okwaanuuyuuki.”
20 Megumbo enene ihamu kala owala iikwatelwa ya longwa moshingoli noshisiliveli, ihe ohamu kala wo mbyoka ya hongwa miiti nomeloya. Yimwe ohayi kwatelwa iinima, mbyoka ya simana, omanga yimwe, oombyoka inaayi simana. 21 Onkee ano kehe ngoka ti ikaleke kokule niikwatelwa yiinima, mbyoka inaayi simana, ota kala ngaashi iikwatelwa yiinima ya simana, ta yapulwa e ta kala oshikwatelwa sha simana kumwene gwe, nota kala i ilongekidha okulonga oshilonga kehe oshiwanawa. 22 Onkee ano inda ontuku omahalo guugundjuka e to lalakanene uuyuuki, eitaalo, ohole nombili pamwe naamboka haya ithana edhina lyOmuwa nomutima gwa yela.
23 Shimwe ishewe, yanda okuludhika kwowala, nokwa nika uugoya, oshoka owu shi shi kutya ohaku eta omalugodhi. 24 Oshoka omupiya gwOmuwa ina pumbwa okukondja, ihe oku na okukala omunambili naantu ayehe, e shi okulonga aantu, ihaa shunithile omuntu uuwinayi, uuna a ningwa nayi, 25 noha popi nombili naamboka kaaye hole okutaamba ko epukululo. Otashi vulika Kalunga e ya pe ompito yi itedhulule,* ya mone ontseyo yi li mondjila kombinga yoshili, 26 noya mone kutya oya li ya kwatwa po kOndiyapoli nomwenyo, ya longe ehalo lyayo, opo nduno otaya ka manguluka mo momwigo gwayo.