Oshileshwa 12

Oshike hashi ningwa po peso?

Eso olyo epingathano lyomwenyo. Eso olya fa okukotha oomposi dhoshitula. (Johannes 11:11-14) Oonakusa ihaya vulu okuuva ko, okumona ko, okupopya, nenge okudhiladhila sha. (Omuuvithi 9:5, 10) Elongelokalunga lyiifundja ohali longo kutya oonakusa ohaya yi moshilongo shoombepo oku ka kala pamwe noohekulululwa. Ombimbeli yo hasho tayi longo ngawo.

Mboka ya sa itaya vulu oku tu kwathela, noitaya vulu oku tu etela oshiponga. Aantu oye na ondjigilile okulongitha omikalondjigilile nokuyamba shoka yi itaala kutya otashi ka nyanyudha mboka ya sa. Shika otashi yemateke Kalunga molwashoka osha kankamena kuyimwe yomiifundja yaSatana. Itashi vulu okunyanyudha oonakusa nokuli, oshoka yo kaye na omwenyo. Katu na okutila nenge okugalikana oonakusa. Otu na owala okugalikana Kalunga.—Mateus 4:10.

Oonakusa otaya ka kala ishewe ye na omwenyo. Jehova ota ka yumudhila oonakusa momwenyo moparadisa kombanda yevi. Ethimbo ndika oli li natango monakuyiwa. (Johannes 5:28, 29; Iilonga 24:15) Kalunga ota vulu okuyumudha mboka ya sa naanaa ngaashi owala ngoye to vulu okupendutha omuntu moomposi.—Markus 5:22, 23, 41, 42.

Ondungedhiladhilo kutya itatu si oyo iifundja ya taandelekwa kuSatana Ondiaboli. Satana noompwidhuli dhe ohaya ningi aantu ya dhiladhile kutya oombepo dhoonakusa odhi na omwenyo nohaye etitha omikithi nomaupyakadhi galwe. Satana oye ta pukitha aantu, omathimbo gamwe okupitila moondjodhi nosho wo momamoniko. Jehova oha pangula mboka taya kambadhala okupopya noonakusa.—Deuteronomium 18:10-12.