Okwa Li Kwa Toka Shi Vulithe Ngaashi Ya Dhiladhila!
OMVULA oyo 609 K.E.N. Ehala olyo Jerusalem. Omupopi, omuprofeti Jeremia. Ye okwa hunganeke ehanagulo lyoshilando she oshiholike, Jerusalem, ehanagulo ndyoka lya li tali ke ya molwashoka Aajuda oya li ya pilamene Jehova noyi igandja kokugalikana iikalunga. Yo oya kutha ombinga megalikano ewinayi lyomalalathano kiikulundundu, ya yambele iikalunga yaapagani iikunwandjambo, ya galikana etango nomwedhi noonyothi, ya fikile Baal iizimba ya nika nawa noya yambele Molok aanona yawo.—1 Aakwaniilwa 14:23, 24; Jeremia 6:15; 7:31; 8:2; 32:29, 34, 35; Hesekiel 8:7-17.
Pakutala kwawo Jeremia okwa li omuprofeti gwomupya, ihaa hulitha, ngoka kee uvitile ayihe naayehe ombili. Jeremia okwe ya londodha uule woomvula 38, nuule woomvula 38 aakalimo yomuJerusalem oye mu yolo. Sigo opethimbo ndyoka oshigwana kasha li shi na ko nasha naJehova nosha ti kutya ye ke shi gumwe ngoka ye na okwiipula naye. Yo oya ti: “Omuwa ita vulu sha nonando uuwanawa nenge uuwinayi” na: “Omuwa okwa thigi po oshilando shika, Omuwa kee shi wete ko.”—Sefanja 1:12; Hesekiel 9:9.
Aaprofeti Jeremia naHesekiel oya tseyitha kutya Jerusalem otashi ka hanagulwa po, ihe inapu ningwa nando osha. Ano Aaisrael inaya dhiladhila kutya omamoniko ga tya ngaaka oga li taga ka gwanithwa pethimbo lyawo, noya ti: “Omasiku otaga lelepala, nehunganeko kehe otali isitha ohoni.” Ihe eyamukulo lyaJehova olya li: “Omasiku taga thikana, . . . Oshoka ongame, Omuwa, ongame otandi ka popya; kehe ohapu nda hala oku yi popya, tayi kwata, itayi kala nokuhuma komeho, aawe. Opomasiku ngaka geni oluvalo [lwoontangalalo], ote popi tuu ohapu notandi yi tsakanitha.”—Hesekiel 12:22-25.
Mo 609 K.E.N. ethimbo olya thikana kuJehova okugwanitha oohapu dhe. Konima sho Jeremia e ya londodha konyala uule woomvula omilongo ne, oshilando Jerusalem osha li sha kondekelwa komatanga gAababilon. Konima yoomwedhi omulongo nahetatu yo oya mbonyagula po ekuma, ya fike po otempeli noya fala oyendji yomoshigwana muupika waBabilon. Ngaashi sha hunganekwa, oshigwana osha hanagulwa po negongamwele nondjala nonoshivu.—2 Aakwaniilwa 25:7-17; 2 Ondjalulahokololo 36:17-20; Jeremia 32:36; 52:12-20.
Jeremia okwa li e li mondjila. Oshigwana osha li sha puka. Osha li kwa toka shi vulithe ngaashi ya li ya dhiladhila! Emoniko kalya li tali ulike komeho kokule. Olya li tali ulike kethimbo lyawo.
Kashi shi owala ondjokonona. Shoka sha ningilwa Jerusalem, osho ehunganeko. Osha thaneke sha shomonakuyiwa. Uukwakriste wonena ohau humbata edhina lyaKristus nohau ti kutya wo ou li mekwatathano naKalunga u na ehangano naye; ihe wo otau landula nokuli moshinkoti shaakalimo yomuJerusalem shonale. Oongeleka dhUukwakriste ohadhi longo omalongo gaapagani, ohadhi inyateke nokwaahenuuyogoki kwomomalalathano, odhi lile po omalalakano gopapolotika, ohadhi ambidhidha iita yuuyuni, odhi itaala oevolusi noihadhi zimine kutya Kalunga oye Omushiti, ohadhi pitike omamiliyona ngoka inaaga valwa opo ga dhipagwe omolwuuwanawa wawo yene nolwindji dho odhi hole omadhiladhilo gopantu, omanga tadhi ti kutya Ombimbeli oyo uutewo noongano.
Ngaashi naanaa aakalimo yomuJerusalem ya sheke Jeremia, Uukwakriste otau sheke nena Oonzapo dhaJehova. Elondodho lyOonzapo li na sha nehanagulo lyopuHarmagedon, kuyo itali ti sha nando. ‘Kalunga ke na ko nasha nevi,’ osho Uukwakriste tau ti. ‘Na kale omuhona gwegulu; tse otatu ka kala aahona yevi. Nongele Harmagedon te ya, itashi ka kala pethimbo lyetu. Tse ehokololo ndyoka otwe li uva nale. Tse itatu tilithwa kulyo!’
Otashi ka kala mbela eendululo lyondjokonona? Otashi ka kala ishewe mbela ethimbo uuna omamiliyona taga ka mona kutya osha li kwa toka shi vulithe ngaashi ya li ya dhiladhila?