Mbela onatu ka kale ngaa tu na egameno lyashili?

OLYE mbela ihaa nyanyukilwa okutala aanona mboka taya dhana nenyanyu pamwe naavali yawo aanahole? Aanona ohaya kala ye uvite egameno thiluthilu ngele ye li mesiloshimpwiyu lyaavali yawo. Ihe aanona oyendji oompito dha tya ngaaka dhenyanyu ihaye dhi mono nandonando. Pehala lyaashono, aanona yamwe ohayi ipula esiku kehe kutya openi taya ka mona ehala lyokulala. Mbela aanona ya tya ngaaka kaaye na omahala gokukala nosho wo yalwe mboka kaaye na egameno oye na ngaa etegameno lyasha?

Nonando onakuyiwa otayi monika ya fa kaayi na etegameno, Oohapu dhaKalunga otadhi gandja etegameno. Omuprofeti Jesaja okwa hunganeke kutya otapu ke ya esiku sho ayehe taya ka kala ye li megameno thiluthilu. Okwa nyola a ti: “Oyo taa kala nokudhika omagumbo nokukala mo, taa kala nokutsika iikunino yoomviinu nokulya iiyimati yadho. Ihaa kala nokutunga, yalwe ando ya kale mo, ihaa kunu, yalwe ando ya kale nokulya iiyimati yawo.”—Jesaja 65:21, 22.

Ihe mbela etegameno ndika oli na ngaa ekankameno lya kola? Kakele kaashono, oshitya “etegameno” haaluhe tashi ulike koshinima shoshili. Pashiholelwa, muBrasilia, ohamu uvika olundji oohapu tadhi ti: “A esperança é a última que morre.” Otadhi ti lelalela: “Etegameno olyo oshinima shoka tashi si po hugunina.” Shoka otashi ti kutya aantu oyendji otaya kala ye na etegameno nokuli nonando kapu na etompelo lyolela lyokukala netegameno. Ihe etegameno ndyoka Kalunga omunamwenyo te tu pe olyi ili. Omuyapostoli Paulus okwa nyola a ti: ‘Shaa ngoka i itaale Kalunga, ita sithwa ohoni.’ (Aaroma 10:11) Omahunganeko gOmbimbeli ngoka ga gwanithwa nale otage tu pe einekelo kutya omauvaneko agehe galwe ngoka gu uvanekwa kuJehova Kalunga otaga ka gwanithwa wo. Ngele omahunganeko ngoka taga ka gwanithwa, oonkalo ndhoka tadhi ningitha aanona ya kale momapandaanda otadhi ka kala kaadhi po we.

Nokuli monena omayele ngoka ge na oshilonga taga adhika mOmbimbeli otaga vulu okukwathela mboka kaaye na etegameno ya hwepopaleke onkalamwenyo yawo noya mone egameno lyashili. Ongiini mbela shoka tashi wapa? Oonzapo dhaJehova dhopune otadhi ka kala dha nyanyukwa oku ku kwathela u mone eyamukulo kepulo ndyoka.