Mbela owa fa omuti gwedhina lagani auna?

MOMUKUNDA gu li kooha dhaPort Moresby, muPapua New Guinea, aakalele yaali oya li taa shuna kegumbo okuza miilonga yawo yokuuvitha. Manga ya li taye ende, oya mono omuti omwaanawa. Omulumentu ngoka omukuluntu okwa ti: “O! Omuti lagani auna!” Okwa taalele komulumentu ngoka omugundjuka e ta tsikile ko ta ti: “Edhina ndyoka otali ti ‘omuti gwakehe omumvo.’ Inagu fa omiti dhilwe odhindji dhomokuti, gwo omvula kehe ohagu yagumuka omafo e tagu kala tagu monika gwa fa gwa sa. Ihe ngele omvula ya loko, ohagu zizi e tagu ningi oongala nohagu kala tagu monika nawa ishewe.”

Otatu vulu okwiilonga sha komuti lagani auna. Pakupopya kwaanawino yamwe, ogwa talika ko gu li gumwe gwomomiti ntano ndhoka omiwanawa noonkondo hadhi ningi oongala muuyuni. Nonando oongala nomafo gagwo ohaga yagumuka ko pethimbo lyokwenye, omuti ngoka ohagu pungula omeya. Omidhi dhagwo odha kola nohadhi vulu okumena dha dhingoloka omamanya ngoka ge li muule kohi yevi. Molwaashoka ogu na omidhi dha tya ngaaka, ihagu pepwa po koombepo dhiikungulu. Oku shi popya paufupi, ohagu koko nawa nomoonkalo oondhigu.

Otashi vulika natse tu iyadhe moonkalo ndhoka tadhi makele okukola kweitaalo lyetu. Oshike mbela tashi ke tu kwathela tu idhidhimike? Ngaashi omuti lagani auna, natse otatu vulu okunwa omeya ngoka taga gandja omwenyo gOohapu dhaKalunga noku ga pungula. Otu na wo okukakatela twa dhiginina ‘kemanya lyetu,’ Jehova, nosho wo kehangano lye. (2 Samuel 22:2, OB-1954) Odhoshili kutya omuti lagani auna ogwo omudhimbulukithi omwaanawa kutya nokuli nonando otu li moonkalo oombwinayi, otatu vulu okukaleka uupambepo wetu wa kola nou li nawa ngele tatu longitha nawa omakwatho ngoka Jehova e tu pa. Ngele tatu shi ningi, otatu ka “pewa shoka Kalunga e shi uvaneka,” mwa kwatelwa euvaneko lyomwenyo gwaaluhe.—Aahebeli 6:12; Ehololo 21:4.