Hedha popepi naKalunga

Mbela Kalunga ota vulu okwiigaluluka?

AATOKOLIHAPU 2:11-18

TU LI aantu inaaya gwanenena omathimbo gamwe ohatu kala tatu ipe uusama. Pashiholelwa, ohashi vulika tu kale tu uvite nayi uuna twa mono kutya otwa ninga epuko. Shikumithi unene, Ombiimbeli otayi ti kutya Jehova ota vulu okwiigaluluka. Otashi vulika u tye: ‘Kalunga okwa gwanenena. Iha ningi omapuko!’ Onkee ano, omomukalo guni moka Kalunga hi igaluluka? Eyamukulo otali vulu oku tu kwathela tu uve ko oshinima shontumba oshikumithi: Jehova oku na omaiyuvo, niinima mbyoka hatu ningi ohayi vulu okuguma omaiyuvo ge. Tala koohapu dha nyolwa mAatokolihapu 2:11-18.

Embo lyOmbiimbeli lyAatokolihapu otali hokolola kombinga yethimbo edhigu mondjokonona yAaisraeli. Pethimbo ndyoka, oshigwana osha li sha kala muKaanan, oshilongo shoka Kalunga a li u uvanekela Abraham. Oomvula omayuvi dhontumba dha ka landula ko, oonkatu dhaIsraeli odha li dha kwatela mo oondondo ne: okwiiteka Jehova, okuthiminikwa, okwiindila ekwatho nokuhupithwa.a

Okwiiteka. Aaisraeli sho ya li ya nwethwa mo kAakaanan ‘oye etha elongelokalunga okulongela Kalunga koohekulu’ noya tameke okulandula ookalunga yalwe, unene tuu “ooBaal nooAstarte.”b Okwiiteka Jehova hoka otaku ti kutya oya shuna monima. Itashi kumitha sho Aaisraeli “ya geyitha OMUWA,” Kalunga ngoka e ya hupitha muEgipiti.—Ovelise 11-13; Aatokolihapu 2:1.

Okuthiminikwa. Sho ya li ya geyitha Jehova, okwa li a kutha ko egameno lye kaantu mboka ya li ye mu etha po. Aaisraeli oya li nduno ya gwilililwa po kaatondi yawo, mboka ye ya moshilongo sha wo noku ya yuga.—Ovelise 14.

Okwiindila ekwatho. Pethimbo mpoka Aaisraeli oya li ye li muudhigu uunene noya li yi iyetela ohenda omolwondjila ya puka ndjoka ya li ya landula noya kala nokwiindila Kalunga opo e ya kwathele. Omaindilo gawo otashi vulika ga li gu ulikwa sho ‘ya kugu muupyu womahepeko.’ (Ovelise 18) Okwiindila kwawo ekwatho kuKalunga oshinima shoka ya li haya ningi iikando niikando. (Aatokolihapu 3:9, 15; 4:3; 6:6, 7; 10:10) Kalunga okwa li e ya yamukula ngiini?

Okuhupithwa. Jehova oku uvu omakemo gAaisraeli “nokwi igaluluka.” (NW) Oshitya shOshihebeli sha tolokwa ‘okwiigaluluka’ otashi vulu wo okutya “okulundulula omadhiladhilo nenge elalakano.” Embo limwe lyomauyelele otali ti: “Jehova okwa li i inyengithwa komakemo gawo, nokwa lundulula elalakano lye lyoku ya geela opo e ya hupithe.” Omolwesilohenda lye, Jehova okwa li a ‘gandja kuIsraeli omuwiliki’ ngoka e ya hupitha kaatondi yawo.—Ovelise 18.

Mbela owa ndhindhilika shoka shi inyengitha Kalunga i igaluluke nenge a lundulule omadhiladhilo ge? Omolwashoka aantu ye oya li ya lundulula iikala yawo. Shi dhiladhila momukalo nguka: He omunahole otashi vulika a gandje egeeloputudho kokanona hoka ka ninga epuko, pamwe moku ka indika uuthembahenda wontumba. Ihe mokumona kutya okanona oki iyela ombedhi shili, he okwa tokola kee ka geele we.

Moshiningwanima shika otatu ilongo mo shike shi na ko nasha naJehova? Omanga uulunde wa ningilwa owina hawu pendutha ongeyo yaJehova, omitima dhi iyela ombedhi ohadhi mu inyengitha u ulike ohenda. Otashi kumitha okudhiladhila kutya shoka hatu longo otashi vulu okuguma omaiyuvo gaKalunga. Omolwashike itoo ilongo nkene to vulu ‘okunyanyudha omwenyo gwaJehova’? (Omayeletumbulo 27:11) Ito ki ipa uusama nando ngele owe shi ningi.

[Omanyolo gopevi]