Aaleshi yoshifo shetu taya pula . . .

Omolwashike Kalunga a li a lombwele Abraham a yambe po omwana?

▪ Ngaashi sha popiwa mOmbiimbeli, membo lyaGenesis, Jehova Kalunga okwa li a lombwele Abraham a yambe po omwana Isak. (Genesis 22:2) Aaleshi yamwe yOmbiimbeli ohaya nyengwa okuuva ko ehokololo ndyoka. Omuprofesoli Carol okwa ti: “Sho ndu uvu ehokololo ndika oshikando shotango manga nda li okanona, onda li nda geye noonkondo. OKalunga a tya ngiini ngono ta pula omuntu a ninge oshinima oshiwinayi sha tya ngaaka?” Nonando oshi shi okuuviwa ko okukala nomaiyuvo ga tya ngaaka, oshi li nawa tu kaleke momadhiladhilo iinima tayi landula.

Shotango, tala kutya Jehova ka li a ningi oshinima tashi landula. Ina pitika Abraham a yambe po omwana, nonando Abraham okwa li i ilongekidha oku shi ninga, ye ke na nando esiku limwe a lombwelele ishewe omuntu gulwe e shi ninge. Jehova okwa hala aalongeli ye, mwa kwatelwa aanona, ya tsikile nokukala nomwenyo nokunyanyukilwa onkalamwenyo ombwanawa.

Oshitiyali, Ombiimbeli otayi holola kutya Jehova okwa li e na etompelo ewanawa sho a lombwele Abraham a yambe po Isak. Kalunga okwa li e shi kutya konima yoomvula omathele, okwa li ta ka gandja Omwana,a Jesus, a se pehala lyetu. (Mateus 20:28) Jehova okwa li a hala oku tu ulukila kutya eyambo ndyoka otali ke mu pula shi thike peni. Okwa li a ningi oshinima oshindhindhilikwedhi opo u ulike kutya eyambo ndyoka a li a pula li ningwe kuAbraham otali ulike kwaashoka a li ta ka ninga monakuyiwa. Ngiini mbela?

Tala kwaashoka Jehova a li a lombwele Abraham: “Kutha omumwoye, epona lyoye Isak, ngoka u mu hole, . . . u ke mu yambe, a ninge efikilondjambo.” (Genesis 22:2) Ndhindhilika kutya Jehova okwa popi a ti Abraham ‘oku hole omwana,’ Isak. Jehova okwa li e shi kutya Abraham oku hole Isak shi thike peni. Kalunga okwa li wo e shi kutya oku hole omwana Jesus shi thike peni. Okwa li e hole omwana noonkondo nomolwaashono a li a popi lwaali okuza megulu a ti kutya Jesus ‘omwana omuholike.’—Markus 1:11; 9:7.

Ndhindhilika wo kutya, melaka lyOshihebeli moka oohapu ndhoka dha li dha nyolwa tangotango, Jehova sho a pula Abraham a yambe po omwana, okwa longitha oshitya shOshihebeli shoka tashi ulike kutya okwe mu indile nombili. Omulongwantu gumwe gwOmbiimbeli okwa ti kutya sho Kalunga a longitha oshitya shika otashi ulike kutya “OMUWA okwa li e shi kutya shoka ta pula otashi ka pula [Abraham] shi thike peni.” Oshinima shoka oshi na okukala sha li sha yemateke Abraham noonkondo; sha faathana, naJehova oku na okukala a li a yemata noonkondo okutala Omwana omuholike ta mono iihuna nokudhipagwa. Osha yela kutya miinima ayihe mbyoka ye ehameka Jehova, shika osho sha li she mu ehameke unenenene, nokapu na we sha tashi ke mu ehameka ngaaka.

Onkee ano, nonando otashi vulika twi ihunye mumwe uuna tatu dhiladhila kwaashoka Jehova a li a pula Abraham a ninge, oshi li nawa ngele tatu dhimbulukwa kutya Jehova ka li a pitike tatekulululwa omuvuliki a ninge eyambo ndyoka. Okwa li a keelele Abraham kaa yambe po Isak, nomomukalo gwa tya ngeyi okwe mu keelele koluhodhi olunene ndwoka omuvali ha kala e na uuna a silwa omwana. Jehova ka li a gamene “omwana [Jesus]; ihe okwe mu gandja molwetu atuhe.” (Aaroma 8:32) Omolwashike Jehova a li a ningi oshinima shoka tashi mu yemateke? Okwe shi ningi ‘opo tu vule oku ka kala tu na omwenyo.’ (1 Johannes 4:9) Shika itashi tu dhimbulukitha tuu kutya Kalunga oku tu hole! Mbela shika itashi tu inyengitha tu ulike kutya natse otu mu hole?b

[Omanyolo gopevi]