Owe shi tseya ngaa?

‘Ompangu’ hoka Paulus a li a falwa oya li ya tya ngiini?

▪ Ehokololo ndyoka li li mIilonga 18:12, 13 otali popi kutya Aajuda muKorinto oya li ya lundile Paulus kutya okwa li ta uvitha shaa li paveta noye mu fala “kompangu” nenge ko-beʹma (oshitya shOshigreka shoka tashi ti “oshilyatelo”). MuKorinto shonale omwa li mu na omutuni omule gu li pondje lwopokati kehalandjandja lyaayehe nenge pehala lyomalandithilo, tashi vulika omutuni ngoka gwa li popepi nosinagoga. Mpoka pwa li omutuni ngoka opwa li puuwanawa nokupopya nongundu onene yaantu. Omutuni ngoka ogwa li gwa tungwa nomamanya omambulawu nomatokele nogwa li gwo opalekwa nomathano ga hokwa mekuma lyagwo. Omutuni hoka kwa li haku thikama omupopi ogwa li gu na omala gaali ge na iipundi yombaanga ya ningwa memanya nofulula ya ningwa muumanya uushona wa tulwa kumwe.

Omutuni ngoka hoka kwa li haku thikama omupopi ogwa fa ogwo ompangu hoka omuyapostoli Paulus a li a thikamekwa koshipala shomuleli Omuroma gwaAkaia, Gallio. Komutuni hoka oko kwa li haku kuutumba aanambelewa opo ya pulakene iipotha yo taya lombwele aakwashigwana kutya oya tokola po shike.

Miilando oyindji yaGreka, osha li omukalondjigilile okugongala pamwe komeho go-beʹma ngandjoka, hoka iinima yi na ko nasha naakwashigwana ya li hayi ningilwa. Omahokololo agehe gaali kombinga yepangulo lyaJesus, muMateus 27:19 nomuJohannes 19:13, otaga hokolola kutya Pontius Pilatus okwa li ta popitha ongundu yaantu e li ko-beʹma ye.—Yelekanitha wo Iilonga 25:6.

Omolwashike omukalo moka Jesus a li a si gwa li gwi imbi Aajuda yamwe ya ninge Aakriste?

▪ Omuyapostoli Paulus okwa li a popi kombinga yAakriste yopetameko a ti: “Otatu uvitha Kristus omwaalelwa [“komuti gwomahepeko,” NW]. Ohapu ndjika oya tsikitha Aajuda noya nika uugoya kaapagani.” (1 Aakorinto 1:23) Omolwashike omukalo ngoka Jesus a si gu na okwiimba omuntu a ninge Omukriste?

Omugandjimulombo kombinga yOmbiimbeli, Ben Witherington III, okwa popi shi na ko nasha nomukalo moka Jesus a li a si a ti kutya ogwa li gwa talika ko “gu sitha ohoni noonkondo” pamuthigululwakalo gwaantu yokUuzilo woPokati yomethelemumvo lyotango. Okwa gwedha ko a ti: Jesus “ka li a talika ko nando kutya okwa sila oshili. Aantu yopethimbo ndyoka oya li ye shi tala ko ngeyi kutya omukalo moka omuntu a si otagu ulike kutya okwa li omuntu e li ngiini. Onkee ano, Jesus okwa li a talika ko kutya oku li omulongi gwiikulumuna, ngoka a li a tsa ondumbo nepangelo, nokwa li a gwana okupewa egeelo lyeso ngaashi naanaa ndyoka lya li ha li pewa aapika mboka inaaya vulika.” Omuthigululwakalo ngoka otagu tu ulukile kutya kashi li pandunge okudhiladhila kutya Aakriste yopetameko oya li ya toto ehokololo kombinga yeso neyumuko lyaJesus.