“Ondi ilongo okukala ndi hole okutaandelitha iileshomwa esiku kehe”

MO 1886, omumwatate Charles Taze Russell okwa li a kutha omambo 100 gedhina Millennial Dawn, embo lyotango, okuza kObetel yomuAllegheny, moPennsylvania, muAmerika e te ga tumu koChicago, koshilando shedhina Illinois. Okwa li a hala okwaandjaganeka omambo omape moostola dhomambo. Ehangano limwe enene lyokulanditha omambo gomalongelokalunga moAmerika olya li lye shi zimine lyi landithe po ofulaha yomambo Millennial Dawn. Ihe ofulaha ndjoka ayihe yomambo oya li ya shunithwa kObetel konima yiiwike iyali.

Omuevaangeliste gumwe a tseyika nawa okwa li a geya sho a mono omambo Millennial Dawn ga pakelwa moolaka pamwe nomambo ge. Okwa li ha kala a geya sho a tala omambo ngoka ge li moolaka. Ye nookuume ke aaevaangeliste ya simana oya li ya lombwele mwene gwositola kutya ngele ita kutha mo omambo Millennial Dawn moolaka, yo otaya ka kutha mo omambo gawo e taye ga fala koositola dhilwe. Mwene gwehangano ndyoka ka li a hala omambo Millennial Dawn ga kale mongeshefa ye. Aamwatate oya li ya ningi oonkambadhala opo omambo ngoka ga tseyithwe miifokundaneki. Ihe aapataneki oya li ya mono oshinima shoka e taya kaleke etseyitho ndyoka. Oshileshomwa shoka oshipe osha li tashi ka thika ngiini kaantu mboka taya kongo oshili?

Aataandelithi yiileshomwa oyo ya li taye ke shi ninga.a Mo 1881, opwa li aauvithi 1 000 yo-Zion’s Watch Tower mboka ya li haya taandelitha iileshomwa yOmbiimbeli ethimbo lyu udha. Nonando oya li owala aashona, oya li ya kunu oombuto dhoshili kehe pamwe okupitila miileshomwa. Mo 1897 oya li ya taandelitha omambo Millennial Dawn emiliyona limwe lwaampono. Oyendji yomuyo oya li haya hupu mokamaliwa okashona hoka ya li haya mono mokunyolitha aantu ya kale haya mono Oshungolangelo nenge momambo ngoka haya gandja.

Oolye ya li haya taandelitha iileshomwa nuulaadhi? Yamwe oya li aagundjuka nayalwe aakokele. Oyendji oya li inaaya ya mondjokana. Yamwe oya li aaihokani, ihe kaye na aanona. Ihe aaihokani mboka ya li aavali inaya ya mo. Aataandelithi yiileshomwa yondjigilile oya li haya longo esiku alihe, omanga aakwatheli ya li haya longo owili yimwe nenge mbali mesiku. Ihe aamwatate ayehe kaya li taya vulu okuya miilonga mbyoka omolwuukolele nenge oonkalo dhawo. Poshigongi shoshitopolwa mo 1906, mboka taya vulu oku yi longa oya li ya lombwelwa kutya inashi pumbiwa ya kale “ya mona elongo lyopombanda nenge ye na omagano gokupopya omalaka gaayengeli.”

Iilonga mbyoka oya li ya longwa konyala menenevi kehe kaantu yowala. Omumwatate gumwe okwa li a tengeneke kutya muule woomvula heyali okwa li a gandja omambo 15 000. Okwa ti: “Inandi ya miilonga yokutaandelitha iileshomwa ndi kale omulandithi gwomambo, ihe ondi kale onzapo yaJehova noyokutaandelitha oshili ye.” Oombuto dhoshili ndhoka dha li dha kunwa kaataandelithi yiileshomwa odha li dha mene omidhi momitima dhaantu, naakonakonimbiimbeli oya li yi indjipala.

Omukwambepo gumwe okwa li a tuku aataandelithi yiileshomwa noku yu ula aahalithi yomambo yowala. Oshungolangelo yOshiingilisa yomo 1892 oya ti: “Aantu aashona oye [ya] tseya ye li aakalelipo yashili yOmuwa, noya li ye ya simaneka omolweifupipiko lyawo nombepo yeiyambo ndjoka ye na.” Omutaandelithi gwiileshomwa gumwe okwa ti kutya iilonga yawo “kaya li iipu.” Olundji oya li haye ende kolupadhi nenge ya kayila oombasikela. Uuna aantu kaaye na iimaliwa yokufuta omambo, oya li haya pula ya pewe iikulya. Ngele ya mana iilonga yawo, oya li haya shuna ya nyanyukwa kootenda dhawo nokoondunda ndhoka ya li haya kala hadhi futwa komwedhi, nonando oya li haya kala ya vulwa. Konima yethimbo opwa ka ndulukwa iiyenditho yaatandelithi yiileshomwa mbyoka ya li yi na ehala lyokulala noya li ye ya kwathele ya hupithe ethimbo olindji niimaliwa.b

Okuza petameko lyo 1893 poshigongi shoshitopolwa, opwa li hapu kala omitumba dhi ikalekelwa dhaataandelithi yiileshomwa. Pomitumba mpoka, oya li hayi ilombwele iimoniwa, omikalo dhokuuvitha nosho wo omayele omawanawa nkene ye na oku shi ninga. Omumwatate Russell okwa li a ladhipike aauvithi mboka aalaadhi ya kale haya li oshuumbululwa sha gwana, ya nwe omahini nokulya oaiskilima ngele ku na uupyu.

Aataandelithi yiileshomwa oya li haya zala uukalata uushunga, opo yi idhimbulule nuupu. Mboka aape oya li haya longo pamwe naamboka ye na nale owino. Edheulo ndyoka olya li lya pumbiwa, molwaashoka omutaandelithi gwiileshomwa gumwe omupe okwa li a ningi efalomo a tila ta ti: “Ano owa hala ngaa omambo ngano?” Lagwenene omunegumbo okwa li e ga hala shili, nokonima okwa ningi omumwameme.

Omumwatate gumwe okwa li ti ipula ngele na ninge ngaa omutaandelithi gwiileshomwa nenge na kale owala nonkalamwenyo ye yuuzeko nokukala ha gandja omaambidhidho goodola dhaAmerika 1 000 omumvo kehe? Okwa li a lombwelwa kutya Omuwa okwa hokwa omayambo agehe ngoka, ihe okulongitha ethimbo lye miilonga yOmuwa otashi ke mu etela omayambeko ogendji. Mary Hinds okwa li a tala ko iilonga yokutaandelitha iileshomwa yi li “omukalo omwaanawa gwokuningila aantu oyendji uuwanawa.” Omumwameme Alberta Crosby okwa ti: “Onda li ndi ilongo okukala ndi hole okutaandelitha iileshomwa esiku kehe.”

Oyendji mboka ya pamba aataandelithi yiileshomwa aalaadhi yonale, kutya nduno aapambele yopanyama nenge oyopambepo otaya tsikile nenyanyu niilonga yuukokolindjila. Ngele maandjeni kamu na omutaandelithi gwiileshomwa, kokutya omukokolindjila, omolwashike itoo ningi omukokolindjila wu dhike po ekankameno yo yaandjeni ye ku landule? Ngele owe shi ningi, nangoye oto ki ilonga okukala wu hole iilonga yokuuvitha esiku kehe.

[Omanyolo gopevi]

[Oohapu dha simana pepandja 32]

Inashi pumbiwa ya kale “ya mona elongo lyopombanda nenge ye na omagano gokupopya omalaka gaayengeli”

[Ethano pepandja 31]

Omutaandelithi gwiileshomwa gwedhina A. W. Osei muGhana, mo 1930 lwaampono

[Omathano pepandja 32]

Pombanda: Aataandelithi yiileshomwa omumwameme Edith Keen naGertrude Morris muIngilanda, mo 1918 lwaampono; pevi: omumwatate Stanley Cossaboom naHenry Nonkes muAmerika, ye li piipakete ya pwa mbyoka ya li yi na omambo ngoka ya gandja