Oha “nyanyudha oomwenyo” dhetu

Jehova oku na ko ngaa nasha natse shili nenge ke na ko nasha nomaupyakadhi gaantu kombanda yevi? Ombiimbeli otayi gandja eyamukulo tali hekeleke. Kalunga oku na ko nasha lela naantu nokwa hala tu nyanyukilwe onkalamwenyo. Aantu ohaya nyanyukilwa uuwanawa we esiku kehe nokuli naamboka ihaaye mu pandula. Natu tale koohapu dhomuyapostoli Paulus.—Lesha Iilonga 14:16, 17.

Sho Paulus a li ta popi naantu yomoshilando shaListra mboka ya li ihaaya longele Kalunga okwa ti: “Nale Kalunga okwa li e etha aantu ayehe, ya ninge ngashika ya hala. Ihe nando ongaaka, oye okwa kala hi iholola miilonga iiwanawa mbyoka he yi ningile aantu: ohe mú pe omvula tayi zi kegulu niilya pethimbo lyo opala, ohe mú pe iikulya noha nyanyudha oomwenyo dheni.” Oohapu ndhoka odha li tadhi ti shike kaapulakeni yaPaulus?

Aantu yomuListra oya li taya vulu okuuva ko nawa oohapu dhaPaulus, oshoka oya li aalongimapya, nevi lyawo olya li hali vala nawa nolya li hali lokwa nawa. Ihe ngaashi Paulus e ya dhimbulukitha, Kalunga oye ha gandja omvula niilya pethimbo lyo opala. Onkee ano, ethimbo kehe taya mono eteyo ewanawa nuuna taya li iikulya iiwanawa otaya nyanyukilwa uuwanawa waKalunga.

Oohapu dhaPaulus ndhoka a li a lombwele aantu yomuListra otadhi tu longo iiyilongomwa oyindji ya simana kombinga yaJehova Kalunga.

Jehova okwe tu pa emanguluko lyokuninga omatokolo. Ndhindhilika kutya Jehova okwa li e etha aantu yomiigwana ayihe “ya ninge ngashika ya hala.” Embo limwe lyaatoloki yOmbiimbeli otali ti kutya uutumbulilo mbuka otawu vulu okutolokwa “okuya ngaashi ya hala” nenge “okuninga shoka taya dhiladhila kutya oshi li mondjila.” Jehova iha thiminike nando omuntu e mu longele. Okwe tu pa emanguluko lyokuninga omatokolo nokuhogolola kutya otwa hala onkalamwenyo yetu yi kale ya tya ngiini.—Deuteronomium 30:19.

Jehova okwa hala tu mu tseye. Paulus okwe shi yelitha a ti Jehova “okwa kala hi iholola.” Embo lya tumbulwa metetekelo olya ti oohapu dhika otadhi vulu okutolokwa kutya “oku ulukile aantu sha yela kutya ye oKalunga a tya ngiini.” Nonando “iha monika,” eshito lye otali holola uuwanawa we, uunongo we, oonkondo dhe nohole ye. (Aaroma 1:20) Jehova okwa holola oshindji kombinga ye mwene mOmbiimbeli. (2 Timoteus 3:16, 17) Mbela inashi yela mo nawa kutya okwa hala tu mu tseye?

Jehova okwa hala tu kale twa nyanyukwa. Paulus okwa ti: ‘Ohe tu pe iikulya noha nyanyudha oomwenyo dhetu.’ Nokuli naalunde mboka inaa itaala muJehova otaya vulu okulya ngaashi ya hala nokunyanyukilwa onkalamwenyo. Ihe nonando ongaaka, Kalunga okwa hala tu kale tu na enyanyu lyashili notali kalelele. Otatu vulu owala oku li mona ngele otwi ilongo oshili kombinga yaKalunga noku yi tula miilonga monkalamwenyo yetu.—Episalomi 144:15; Mateus 5:3.

Atuheni ohatu nyanyukilwa uuwanawa waJehova esiku kehe. Omolwashike itoo ilongo oshindji kombinga yankene to vulu okupandula Kalunga ngoka ‘he tu pe iikulya noha nyanyudha oomwenyo dhetu’?