Mbela eso olyo ehulilo?

Eso oli li oshikundathanwa shoka kaashi holike. Aantu oyendji kaye hole okupopya kombinga yalyo. Ihe kutya nduno uunake, otu na owala okupopya kombinga yalyo. Eso ohali ehameke noonkondo.

Kapu na sha lela shoka tashi vulu oku tu kwathela tu kale twi ilongekidhila eso lyomuvali, lyakuume kopandjokana, nenge lyokanona. Oshiponga shontumba otashi vulu okuningwa ombaadhilila nenge nokuli konima yethimbo ele. Kutya nduno oli holoke po ngiini, uuwehame walyo itawu vulu okuhenukwa, nohugunina ohali vulu lela okudhenga omuntu pevi.

Antonio, ngoka he a sila moshiponga shohauto, ota ti: “Osha fa owala omuntu ta pata egumbo lyoye e ta yi niipatululo. Ito vulu okugalukila ko kegumbo, nando okathimbo owala okahupi. Shi wu na po ooshoka owala to dhimbulukwa shi na ko nasha nalyo. Shika oshinima oshipe noshoshili. Nonando owu kambadhale oku shi tinda molwaashoka tashi monika sha fa kaashi li pauyuuki, ku na shoka to vulu okuninga po.”

Sho a li a ningilwa oshinima sha faathana, Dorothy ngoka a li a ningi omuselekadhi sho e na oomvula 47, okwa li a tokola toko a mone omayamukulo kwaashoka. Molwaashoka okwa li omulongi gwosikola yOsoondaha, ka li nando e wete kutya eso olyo ehulilo lyaashihe. Ihe ka li e na omayamukulo ga yela. Okwa li a pula omusita gwe gwaAngelikana a ti: “Oshike hashi tu ningilwa ngele twa si?” Okwe mu yamukula a ti: “Kapu na lela ngoka e shi shi. Otu na owala okutegelela tu tale.”

Tse otatu geelwa nee owala tu kale twa ‘tegelela tu tale’? Mbela opu na omukalo gulwe tatu vulu okutseya lela ngele eso olyo ehulilo?