Onda li ndi ihole mwene

ONAKUZIWA YANDJE:

Oomvula oonshona dhopetameko lyonkalamwenyo yandje, uukwanegumbo wetu owa li wa kala moLeipzig kUuzilo waNdowishi, shoka sha li popepi noongamba dhaCzech naPoole. Sho nda li ndi na oomvula hamano, iilonga yatate oya li ye tu ningitha tu tembukile kondje yiilongo, tango okoBrazil nokonima okoEcuador.

Sho ndi na oomvula 14, onda li nda tumwa kosikola yomuhandjo moNdowishi. Molwaashoka aavali yandje oya li kokule koAmerika lyokUumbugantu, onda li handi isile oshimpwiyu ngame mwene. Onda tameke okukala ndi li kungame mwene. Onda li owala handi gandja eitulomo eshona kunkene oonkatu dhandje hadhi gumu yalwe.

Sho nda li ndi na oomvula 17, aavali yandje oya li ya galukile koNdowishi. Petameko, onda li nda kala megumbo lyawo. Ihe iikala yandje yuukakombwiilitha oya ningitha ndje ndi kale itaandi vulu okukala muukwanegumbo. Sho ndi na oomvula 18, onda tembuka mo megumbo.

Onda tameke okukala kaandi na oluthuwo, tandi kongo elalakano monkalamwenyo. Sho nda konakona omikalo dhonkalamwenyo dhi ili nodhi ili nosho wo oongundu dhontumba, onda li nda ntompwa kutya oshinima dhingi shoka te vulu okuninga monkalamwenyo yandje osho okweendaenda kopulanete ndjika ombwanawa manga inaayi yonagulwa kaantu.

Onda thigi po Ndowishi, nonda landa okapakapaka, nonda yi kuAfrica. Nziya, onda li ndi na okushuna koEuropa ndi ka pangelithe okapakapaka kandje. Konima yethimbo efupi, ondi iyadha ndi li komunkulofuta moPortugal.

Onda yi mongundu yimwe yaagundjuka mboka ya li tayi ilongekidha ya taaguluke Efuta lyaAtilanta nombautu. Mokati kawo omwa li Laurie, ngoka a ka ninga omukulukadhi gwandje. Tango, otwa yi nombautu kUuntuntu waKaribise. Opo ihe, konima sho twa kala ethimbo efupi muPuerto Rico, otwa shuna koEuropa. Otwa li tatu kongo ombautu ndjoka tatu vulu okuninga okambautu okashona kokwiinyanyudha. Ihe konima owala yethimbo efupi lyokukonga muule woomwedhi ndatu, opoloyeka ndjoka oya hulu po ombaadhilila. Onda li nda kutwa metangakwiita lyaNdowishi.

Onda kala oomwedhi 15 metangakwiita lyomomeya lyaNdowishi. Pethimbo ndyoka, ngame naLaurie otwa hokana notwa ningi omalongekidho tu tsikile nonkalamwenyo yetu yokweendaenda. Konima yethimbo manga inaandi thiga po iilonga yandje yuukwiita, otwa landa olumbumbu lwombautu ya li hayi longithwa okuhupitha aantu. Manga nda li muukwiita, otwa li twe endele ko tatu lundulula olumbumbu ndwoka e tatu lu ningi okambautu okashona. Otwa tokola tu kale muyo nokweendaenda kopulanete ndjika ombwanawa. Pethimbo tuu ndyoka, konima owala yiilonga yandje yuukwiita manga inaatu mana ombautu yetu, otwa li twa talelwa po kOonzapo dhaJehova notwa tameke okukonakona Ombiimbeli.

NKENE OMBIIMBELI YA LUNDULULA ONKALAMWENYO YANDJE:

Petameko, kanda li ndi wete pu na ompumbwe yokuninga omalunduluko ogendji monkalamwenyo yandje. Onda adhika nda hokana nale, nonda adhika nde etha po nale okuhila omakaya. (Aaefeso 5:5) Molwaashoka elalakano lyetu olya li okweendaenda nuuyuni, onda li ndi wete kutya okwiigandjela oonkalamwenyo dhetu okutala eshito lyaKalunga ekumithi osha li oshinima sha dhenga mbanda.

Muushili wo wene, onda li nda pumbwa okuninga omalunduluko, unene tuu muukwatya wandje. Molwaashoka onda li ndi na uuntsa noonkondo nonda li ndi inekela mungame mwene, onda li ndi inekela thiluthilu moonkondo dhandje mwene nomokupondola kwandje mwene. Onkalamwenyo yandje oya li owala yu ukitha eitulomo kungame mwene.

Esiku limwe, onda lesha euvitho lyaJesus lyokondundu ndyoka lyi shiwike nawa. (Mateus, ontopolwa 5-7) Petameko, kanda li ndi uvite ko shoka Jesus a ti kombinga yokukala omuntu a nyanyukwa. Pashiholelwa, okwa ti kutya mboka ye na enyanyu oomboka ya sa ondjala nenota. (Mateus 5:6, yelekanitha NW.) Onda li nda limbililwa kutya ongiini okukala nompumbwe taku etele omuntu enyanyu. Sho nda tsikile okukonakona, onda mono kutya atuhe otu na okuzimina neifupipiko ompumbwe ndjoka, opo yi vule okugwanithwa po. Ngaashi Jesus a popi a ti: “Aanelago [aanyanyukwi, NW] oomboka yu uvite oyo oohepele koomwenyo.” — Mateus 5:3.

Konima sho twa tameke ekonakonombiimbeli lyetu moNdowishi, ngame naLaurie otwa tembukile koFulaanisa, nokonima, otwa ka ya koItalia. Kehe mpoka twa yi, otwa adha po Oonzapo dhaJehova. Onda li nda kumwa shili kohole yawo yokuholathana nosho wo uukumwe wawo. Onda li nda mono kutya Oonzapo odhi li shili oshitopolwa shuumwayinathana womuuyuni awuhe. (Johannes 13:34, 35) Konima yethimbo, ngame naLaurie otwa li twa ninginithwa tu li Oonzapo dhaJehova.

Konima yeninginitho, onda tsikile okuninga omalunduluko muukwatya wandje. Ngame naLaurie otwa tokola tu ye komunkulofuta gwaAfrica nopo nduno tatu taaguluka efuta lyaAtlantika tu ye koAmerika. Pethimbo sho twa li mefuta nokambautu okashona hoka kali ka kundukidhwa komeya ookilometa omayuvi, opo nda mono kutya otu li yanathangwa shili okuyelekanitha nOmushiti gwetu omunenenene. Molwaashono onda li ndi na ethimbo olindji (kaapu na sha oshindji okuninga mokati kefuta), onda longitha ethimbo lyandje mokulesha Ombiimbeli. Onda li unene ndi inyengithwa kehokololo lyonkalamwenyo yaJesus yokombanda yevi. Okwa li omulumentu a gwanenena ngoka a li ta vulu okuninga kehe shimwe momukalo ngoka inaandi gu dhiladhila nando onale, ihe ka li ha ukitha nando eitulomo kuye mwene. Onkalamwenyo ye kaya li yu ukitha eitulomo kuye mwene, ihe okuHe gwomegulu.

Sho nda tedhatedha koshiholelwa shaJesus, onda mono kutya onda pumbwa okupititha Uukwaniilwa waKalunga komeho monkalamwenyo yandje pehala lyokulalakanena iinima yi ili noyi ili mbyoka nda li nda hala okuninga. (Mateus 6:33) Sho ngame naLaurie twa thiki moAmerika, otwa tokola tu tule moka nokugandja eitulomo kelongelokalunga lyetu.

UUWANAWA MBOKA NDA MONA:

Omolwonkalamwenyo yandje yonale yokwiihola mwene, kasha li oshipu kungame okuninga omatokolo. Onkee ano, ngashingeyi, onda mona onzo yuunongo washili ndjoka tayi wilike ndje. (Jesaja 48:17, 18) Onda mona wo elalakano monkalamwenyo ndyoka nda li kaandi na nale, ano okulongela Kalunga nokukwathela yalwe yi ilonge kombinga ye.

Mokutula miilonga omakotampango gOmbiimbeli, ngame naLaurie otwa li twa koleke lela ondjokana yetu. Otwa li wo twa yambekwa nokamwanakadhona ketu okawanawa, hoka ke shi Jehova noke mu hole.

Onkalamwenyo yokweendaenda nombautu kaya li aluhe ompu. Ihe kekwatho lyaJehova, otwa tokola kaatu shune omitse miipeta nenge tu ethe po okwiinekela muye. — Omayeletumbulo 3:5, 6.