Tava shuna kofikola
1 Momwedi Januali, ovanyasha vetu otava hovele ofikola modula ipe. Ope na oinima ihafifa oyo tai dulu okuteelelwa, ndelenee ope na yo oinima inini oyo tai dulu okweeta oumbada. Ovanyasha vahapu otava ka mona ovahongi vape, otave ke lishangifa moihongwa ipe nosho yo okweendafana novanafikola ve he va shii. Ovanyasha vetu ova hala okulongela kumwe novakwatelikomesho vokofikola nokukala nombili pamwe novanafikola vakwao, ndelenee ove na okudimbuluka kutya ove na okukondjifa keshe shimwe osho tashi dulu oku va etela oshiponga pamhepo.—1 Kor. 15:33.
2 Oshilipulwa shimwe sha kula shounona vEendombwedi nosho yo ovanyasha osho okuhenuka enwefemo la nyata lounyuni, olo liyadi momilandu dehongo moilongo ihapu kunena. Ovanyasha novakulunhu Ovakriste ove na okukala nouladi opo va ekeleshi omifikamhango dounyuni nosho yo okudiladila kwao oko taku xumifwa komesho pefimbo lopaife shi na sha noinima yopaenghedi, nove na okukala va “lungama” mokukonakona nokukala tava wilikwa kEendjovo daJehova. (Eps. 119:9, NW) Ovadali ovanashisho ova pumbwa okushiiva osho sha kwatelwa momufindahongo wofikola opo va yandje ewiliko la wapala kounona vavo. Ngeenge osho tashi hongwa kofikola ile pamwe pe lili otashi kondjifafana nouyapuki nosho yo oukoshoki oo tau pulwa ovapiya vaJehova, oshi na okukukumwa.—1 Pet. 1:15, 16.
3 Luhapu otapa shakenekwa yo omaupyakadi a kwatela mo oivilo yopashiwana, okudana omafiku omafudo, omaudano, omahongo omalongelokalunga ile eenhingo domalihafifo. Okabroshure School and Jehovah’s Witnesses oke li ekwafo kovanyasha Ovakriste shi na sha noinima oyo. Ngeenge ku na okambo koye mwene, otaka dulu okumonika moungalo vokombiuta tava ifanwa Watchtower Library CD-ROM. Kakele kaasho, okabroshure Education nosho yo embo Young People Ask noReasoning otaa dulu okulongifwa. Eenghalo omo tamu dulu okuhangika oupyakadi otadi dulu okufindwa ile okuninipikwa ngeenge ovadali vounona tave litetuka okupopya novahongi tava longifa okabroshure Education. Otava dulu okuyelifa kutya eshi otashi ka kwafela omuhongi a ude ko nawa omahongo nosho yo omafinamhango etu. Ngeenge omuhongi ta pewa ouyelele ou otashi dulu okuninga shihapu shi na sha nokweeta po omhepo yelongelokumwe.
4 Natango, otashi ka kala shiwa kovanafikola Ovakriste okukala nokabroshure School kopaumwene, embo Young People Ask nosho yo okabroshure Education pamwe nomambo avo ofikola. Luhapu ohapa holoka eemhito dokuyandja oundombwedi kovanafikola vakwao ovo tava pula omapulo ngeenge tava popi oinima oyo tai divilike eitavelo letu. Natango, ounona vEendombwedi ove na okuhumbata alushe oukalata vavo “Advance Medical Directive/Release” ile “Identity Card” ovo ve li pefimbo, ve na oumbangi wa yela nova shainwa. Ovo tava tula moilonga ekumaido eli otava ka kala shili ngaashi ‘omunaendunge oo ta tale oshiponga ndee ta hondama.’—Omayel. 22:3.