‘Nkene wu na okutunga uukwanegumbo woye’
1 Nopwaahe na omalimbililo onkalo momaukwanegumbo muuyuni auhe nomomaputuko agehe otayi ende tayi shongola. Uuyuni waSatana owa yonuka mokukengelela nomoluhondelo. (1 Joh. 5:19) Shika otashi tsu omuthindo esimano ‘lyokutunga uukwanegumbo woye’ pambepo nokulonga yalwe ya ninge sha faathana. — Omayel. 24:3, 27.
2 Omakotampango gOmbiimbeli otaga kwatha: Shoka tashi vulu okweeta ombili muukwanegumbo otashi adhika momakotampango gOmbiimbeli. Oshili ndjika otayi vulu okukwathela oshilyo kehe shuukwanegumbo moonkalo adhihe. Omaukwanegumbo ngoka taga tula miilonga omakotampango gOmbiimbeli otaga ka kala ga nyanyukwa noge na ombili yopakalunga. — Yelekanitha Jesaja 32:17, 18.
3 Omakotampango ngoka tage tu kwathele nkene tu na okutunga uukwanegumbo wetu otaga adhika membo Shoka tashi vulu okweeta ombili muukwanegumbo. Pehulilo lyontopolwa kehe opu na okampungu hoka taka tsu omuthindo omakotampango ngoka kehe gumwe muukwanegumbo e na okutula miilonga. Uumpungu owundji owa tameka nepulo: “Ongiini omakotampango gOmbiimbeli ngaka taga vulu okukwathela . . . ?” Uumpungu mboka otawu tu kwathele tu mone kutya Kalunga oha tala ko ngiini oshinima shoka tashi kundathanwa. — Jes. 48:17.
4 Kala wu shi nawa oshikalimo shembo ndika. Ilonga nkene to vulu okumona omakotampango ngoka taga vulu oku ku kwathela uuna pwa holoka uupyakadhi. Embo otali kundathana iinima ngaashi: Oshike omuntu e na okutala ngele ta kongo kuume kopandjokana (ontopolwa 2), iinima mbyoka ya pumbiwa opo ondjokana yi kalelele (ontopolwa 3), nkene aavali taya vulu okuputudha oyana yoomvula omulongo nasha ya ninge aakuluntu aanandunge naatilikalunga (ontopolwa 6), nkene tu na okugamena uukwanegumbo wetu komanwethomo omawinayi (ontopolwa 8), omakotampango ngoka taga kwathele opo omaukwanegumbo ngoka ge na omuvali gumwe ga pondole (ontopolwa 9), ekwatho lyopambepo komaukwanegumbo ngoka mu na ombwii yomalovu nomahepekathano (ontopolwa 12), shoka shi na okuningwa uuna ondjokana yi li pokuteka (ontopolwa 13), shoka tatu vulu okuninga tu kwathele aavali yetu ya kulupa (ontopolwa 15) nosho wo nkene to vulu okugamena uukwanegumbo woye wu ka mone omwenyo gwaaluhe (ontopolwa 16).
5 Li longitha nawa: Omolwashike itaamu li konakona mu li uukwanegumbo ngele inamu shi ninga nale? Uuna uukwanegumbo woye wa taalelwa kuupyakadhi wontumba, tala oontopolwa ndhoka tadhi kundathana kombinga yuupyakadhi mboka nokutula miilonga omayele ngoka to shi ningi pamwe negalikano. Natango, ninga oonkambadhala dha mana mo opo wu gandje embo ndyoka muukalele.
6 Omaukwanegumbo ngoka haga tila Kalunga otaga ka kala ga kola pambepo, ga hangana nogi ilongekidha okukondjitha omapataneko gaSatana. (1 Tim. 4:7, 8; 1 Pet. 5:8, 9) Inatu pandula tuu sho hatu mono elongo lyopakalunga okuza kOmutoti gwomaukwanegumbo!