Mbela owi ilongekidha okugandja uunzapo wontukuluka?
1. Oshiholelwa shini tashi ulike kutya okugandja uunzapo wontukuluka ohaku eta iizemo iiwanawa?
1 Okugandja uunzapo wontukuluka ohaku vulu okweeta iizemo iiwanawa. MOmbiimbeli omu na iiholelwa oyindji yaamboka ya gandja uunzapo wontukuluka. (Joh. 4:7-15) Oshike tu na okuninga opo tu vule okugandja uunzapo mboka?
2. Eholokopo lyetu otali vulu oku tu kwathela ngiini tu gandje uunzapo ethimbo kehe?
2 Omizalo neiyopaleko: Ngele ohatu zala nawa nokwiiyopaleka, otatu ka vula okuuvithila yalwe twa manguluka ethimbo alihe. (1 Tim. 2:9, 10) Ngele otu wete kutya omizalo dhetu itadhi simanekitha Jehova, otashi ke tu imba okugandja uunzapo. Mepingathano naashoka, aantu otashi vulika yetu pulakene omolwomizalo neholokopo lyetu ewanawa. Pashiholelwa, aaihokani Oonzapo mboka ya li molweendo noya zala nawa oya li ya kuutumba pooha dhomulumentu gumwe Omumoslema. Molwaashoka oya li ya zala nawa, omulumentu okwe ya pula ngele yo Aakriste. Oshizemo, oya li ya kundathana kombinga yOmbiimbeli uule woowili ndatu.
3. Mokulandula oshiholelwa shaJesus, ongiini wa tameka oonkundathana naantu?
3 Tameka oonkundathana: Sho Jesus a tsakanene nomukiintu Omusamaria pomuthima gwaJakob, okwa li a tameke oonkundathana moku mu pula omeya gokunwa. Natse otatu vulu okutameka oonkundathana mokupopya oshinima shontumba paufupi nenge mokupula epulo epu. Nonando otashi vulika ethimbo limwe tu kakadhale oku shi ninga, otatu vulu ‘okupewa omukumo’ tu tameke oonkundathana ngele otwi inekela mekwatho lyaJehova. — 1 Tes. 2:2.
4. Ongiini tatu vulu okwiilongekidhila okugandja uunzapo wontukuluka?
4 Natu konge oompito: Aauvithi oyendji ohaya kongo oompito dhokugandja uunzapo wontukuluka. Konakona nawa onkalo yoye e to dhiladhila kombinga yaantu mboka ho tsakanene nayo esiku kehe. Kala wu na iileshomwa mbyoka tayi opalele aantu nOmbiimbeli. Nongonona aantu mboka ye li momudhingoloko goye nokukala wu na ohokwe muyo. Ngele oho kala nokudhiladhila komeho yethimbo shoka to ka tsakaneka momukokomoko gwesiku, oto ka kala wi ilongekidha okugandja uunzapo tawu pondola. — Fil. 1:12-14; 1 Pet. 3:15.
5. Omolwashike tu na okukala twi ilongekidha okugandja uunzapo wontukuluka?
5 Omatompelo gaali ngoka hage tu inyengitha tu konge oompito okugandja uunzapo wontukuluka, ogwo ohole yokuhola Kalunga naantu ooyakwetu. (Mat. 22:37-39) Omolwiilonga yokuuvitha mbyoka ye endelela, otu na okuninga aluhe omalongekidho tu gandje uunzapo wontukuluka. Otu na okukala tu li komalwilo opo tu longithe ompito kehe tatu mono tu uvithile yalwe onkundana ombwanawa yUukwaniilwa omanga pu na ethimbo. — Rom. 10:13, 14; 2 Tim. 4:2.