Oshimpungu shepulo

◼ Ongiini kehe gumwe ta vulu okukwathela opo aapulakeni ya ze po ya tungwa noyi ilonga sha pokugongala? (Deut. 31:12)

Molwaashoka otwa simaneka Jehova nosho wo elongekidho lyokugongala ndyoka a tula po, atuheni otatu ladhipikwa tu thike kuyele pokugongala hoka. Otashi ka kala nawa ngele mboka taye ya tango taya kuutumba komeho, opo mboka ye na aanona aashona naamboka taye ya olata ya kale konima. Omanga okugongala inaaku tameka kehe gumwe na se oshimpwiyu opo ongodhi ye yopeke niilongitho iikwawo yopaelektronika kaayi piyaganeke aapulakeni. Itapu ka kala omapiyagano ogendji ngele aakalipo ayehe oya kala ya ngungumana sigo okugongala taku piti mo. — Omuuv. 5:1; Fil. 2:4.

Uuna mboka aape taye ya kokugongala, oshi li nawa mboka ye ya shi ya kuutumbe pamwe nayo. Shika otashi ka kala ekwatho unene tuu ngele oye li uukwanegumbo noye na aanona aashona mboka ye li mepipi lyokulelwa natango. Otashi vulika shi kale osho oshikando shotango taye ya kokugongala. Ngele osho, otashi ka kala nawa kuukwanegumbo mboka okukuutumba konima opo ngele aanona ya pumbwa esiloshimpwiyu lyaavali itashi ka kutha po eitulomo lyayalwe. (Omayel. 22:6, 15) Omaukwanegumbo ngoka ge na aanona kage na okukuutumba mondunda yi ili moka aanona tashi vulika ya kale yu uvite kutya oya manguluka okukudhila. Olundji oshi li nawa komuvali a ka pukulule okanona pondje nenge e ke ka sile oshimpwiyu e ta galukile moshinyanga nako.

Aayakuli ohaya si oshimpwiyu opo okugongala ku kale mombepo ombwanawa. Ohaya kwathele omaukwanegumbo naamboka haye ya olata ya kuutumbe pomahala tago opalele. Aayakuli oye na okukala ya kotoka nokukwathela yalwe noondunge ya kuutumbe nopwaahe na oku ya piyaganeka. Ohaya longitha oondunge dhokuyoolola mokuungaunga nomapiyagano ngoka haga holoka po inaashi tegelelwa. Aayakuli otashi vulika ya kwathele momukalo omwaanawa, uuna eihumbato lyokanona tali piyaganeke yalwe.

Ayehe mboka ye ya kokugongala otaya vulu okukwathela opo kehe gumwe a ze po a tungwa nokwi ilonga sha kombinga yaJehova nomalalakano ge nosho wo uuyuni uupe we wombili. — Heb. 10:24, 25.