Aakalele Aakriste oya pumbwa okugalikana
1. Oshike twa pumbwa okuninga opo tu gwanithe po uukalele wetu?
1 Itatu vulu okugwanitha po uukalele wetu koonkondo dhetu yene. Jehova ohe tu pe oonkondo opo tu wu gwanithe po. (Fil. 4:13) Oha longitha aayengeli ye tu kwathele tu mone mboka ye na omitima dha fa dhoonzi. (Eh. 14:6, 7) Jehova oye ha tekele nokukokeka oombuto dhoshili ndhoka hatu kunu. (1 Kor. 3:6, 9) Tu li aakalele Aakriste osha simana tu inekele Tate yetu gwomegulu okupitila megalikano.
2. Iinima yimwe yini tu na okukwatela mo momagalikano getu?
2 Galikana paumwene: Otu na okugalikana oshikando kehe tatu uvitha. (Ef. 6:18) Iinima yini tu na okukwatela momagalikano getu? Otatu vulu okugalikana opo tu kale aalaadhi notu na iikala iiwanawa. (Iil. 4:29) Otatu vulu okupula Jehova opo e tu ukithe kwaamboka ya hala okukonakona Ombiimbeli natse. Ngele omunegumbo okwe tu pula sha otatu vulu okugalikana paufupi meimweneneno tatu pula Jehova e tu kwathele tu gandje eyamukulo li li mondjila. (Neh. 2:4) Otatu vulu wo okupula uunongo opo tu kale twa lenga uukalele wetu. (Jak. 1:5) Jehova oha kala a nyanyukwa ngele tatu pandula sho tu na uuthembahenda wokukala aakalele ye. — Kol. 3:15.
3. Ongiini okugalikanena yalwe haku humitha komeho iilonga yokuuvitha?
3 Galikanenathaneni: Otu na wo ‘okugalikanenathana’ naampoka tashi vulika natu tumbule edhina lyomwiitaali omukwetu. (Jak. 5:16; Iil. 12:5) Mbela uunkundi wopalutu ohawu ku imbi wu ninge ngaashi to vulu miilonga yokuuvitha? Ngele osho, galikanena aakalele ooyakweni mboka ye na uukolele wopalutu ye shi ninge. Ino dhiladhila kutya omagalikano goye itage ya kwatha sha. Oshi li wo nawa tu galikanene mboka ye na oonkondopangelo opo ya pitike aamwatate ya tsikile niilonga yokuuvitha monkalo ‘yengungumano noyombili.’ — 1 Tim. 2:1, 2.
4. Omolwashike tu na okudhiginina okugalikana?
4 Oshi li oshilonga oshinenenene okuuvithila aakali kongonga yevi alihe onkundana ombwanawa. Ihe ngele otatu ‘dhiginine okugalikana,’ otatu ke shi pondola kekwatho lyaJehova. — Rom. 12:12.