Nkene tatu vulu okwaadha omitima dhaamboka hatu longo
1. Elongo lyaJesus olya li lya gumu ngiini omitima dhaapulakeni ye?
1 Jesus Kristus okwa li a adha omitima dhaapulakeni ye. Pompito yimwe, aalongwa ye oya li ye na “ehwamo” moomwenyo sho e ya yelithile nawa Omanyolo. (Luk. 24:32) Okuvulika kuKalunga oshinima shi na okuza komutima. Ongiini tatu vulu okwaadha omitima dhaamboka hatu talele po, opo ya ninge omalunduluko monkalamwenyo yawo? — Rom. 6:17.
2. Okulongitha oondunge dhokuyoolola ohaku kwathele ngiini mokwaadha omutima gwomuntu?
2 Longitha oondunge dhokuyoolola: Aantu oyendji ihaya katuka naanaa oonkatu, uuna we ya lombwele owala kutya oshike sha puka naashoka shi li mondjila. Ngele owa popi kombinga yomalongelokalunga gawo to longitha omanyolo ogendji, otashi vulika nokuli kaaye ku pulakene. Opo tu ya ladhipike, tango otu na okutala kutya omolwashike ye li meitaalo lyontumba nohaya ningi iinima yontumba. Okulongitha omapulo ga hogololwa nawa, otage ke ya ladhipika ya holole omadhiladhilo gawo gomuule. (Omayel. 20:5) Opo owala tatu ka longitha uuyelele okuza mOohapu dhaKalunga mboka tawu ka guma omitima dhawo. Onkee ano, otu na okuulika kutya otu na ko nasha nayo pauhandimwe noku yi idhidhimikila. (Omayel. 25:15) Dhimbulukwa kutya aantu ihaya ningi ehumokomeho lyopambepo ya faathana. Ya pa ethimbo, opo ya nwethwe mo kombepo ondjapuki yaJehova. — Mark. 4:26-29.
3. Ongiini tatu vulu okukwathela mboka hatu longo ya kokeke omaukwatya omawanawa?
3 Ya kwathela ya kokeke omaukwatya omawanawa: MOmbiimbeli omu na omahokololo ngoka taga ulike kutya Jehova omwaanawa nomunahole ngoka taga vulu oku ya kwathela ya kokeke omaukwatya omawanawa. Otatu vulu okulongitha omanyolo ngaashi: Episalomi 139:1-4 nenge Lukas 12:6, 7 tu ulike kutya Kalunga oku na ko nasha natse pauhandimwe shi thike peni. Uuna oohandimwe ya tameke okukala ye na olupandu omolwohenda yaJehova, ohole yawo niilonga yawo yometilokalunga otayi ka koka. (Rom. 5:6-8; 1 Joh. 4:19) Ngele oyi ilongo wo kutya eihumbato lyawo ohali gumu Jehova, otashi ke yi inyengitha yi ihumbate momukalo ngoka tagu mu nyanyudha. — Eps. 78:40, 41; Omayel. 23:15.
4. Uuna tatu longo yalwe, ongiini tatu vulu okuulika kutya otwa simaneka omahogololo gawo?
4 Jehova iha thiminike nando omuntu a vulike kiipango ye. Pehala lyaashono, ota pula aantu ya vulike kuye moku ya pa uunongo wokulandula omayele ngoka ha gandja. (Jes. 48:17, 18) Ohatu holele Jehova uuna tatu longo aantu momukalo ngoka tagu ya kwathele ya thike pehulithodhiladhilo lyontumba. Uuna aantu ya mono kutya oya pumbwa shili okuninga omalunduluko, ohaya ka mona iizemo tayi kalelele. (Rom. 12:2) Ohashi ya hedhitha wo popi lela ‘nomukonakoni gwoomwenyo,’ Jehova. — Omayel. 17:3.