Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
1-7 JULI
OMALIKO OKUZA MOOHAPU DHAKALUNGA | AAKOLOSSA 1–4
“Ihuleni omuntu gweni omukulu ne mu zale omuntu omupe”
(Aakolossa 3:5-9) Dhipageni ano uuhalu weni wopavi mboka tau longo mune ngashika oluhondelo, iipala uuholume nuuhalu uuwinayi nolwiho. Nokuli olwiho olwo olupe lumwe lwesimaneko lyiimenka. 6 Iinima ya tya ngaaka otayi eta ondjahi yaKalunga kombanda yaantu mboka ihaa vulika kuye. 7 Nane yene omo wo mwa kala nale mongundu yaantu ya tya ngaaka, okukalamwenyo kweni sho kwa li taku pangelwa kuuhalu owo tuu mboka. 8 Ihe ngashingeyi one omu na okweetha iinima mbika ayihe: ondjahi, uugeyi nuuwinayi auhe. Momakana geni inamu pita we omasheko nenge oohapu oombwinayi. 9 Inamu lombwelathana iifundja, oshoka one omwi ihula omuntu gweni omukulu pamwe nomikalo dhe,
Taamba ombepo yaKalunga, ihe haandjoka yuuyuni
12 Uukwatya wandje otawu ulike kutya onda nwethwa mo kombepo yini? (Lesha Aakolossa 3:8-10, 13.) Ombepo yuuyuni ohayi humitha komeho iilonga yonyama. (Gal. 5:19-21) Otatu ka mona kutya otwa nwethwa mo kombepo yini unene tuu ngele iinima itayi tu endele nawa, ihe hangele tayi tu endele nawa, pashiholelwa, ngele omumwatate nenge omumwameme te tu ipwililikile, e tu yemateka nenge nokuli a yona kutse. Kakele kaashono, otashi vulika shi kale shi iwetikile kutya momagumbo getu otwa nwethwa mo kombepo yini. Otashi vulika twa pumbwa okwiikonakona. Ipula to ti: ‘Mbela uukwatya wandje owa kala ngaa wa fa waKristus muule woomwedhi hamano dha piti, nenge onda tameka okupopya nokwiihumbata nayi ngaashi nda li nale?’
13 Ombepo yaKalunga otayi vulu oku tu kwathela ‘twi ihule omuntu omukulu pamwe nomikalo dhe’ notu zale “omuntu omupe.” Shoka otashi ke tu kwathela tu kale aanahole naanambili. Otatu ka kala tu na egamo lyokudhiminathana po, nokuli nongele tashi monika sha fa shi li mondjila okunyenyeta. Nokuli ngele twa ningwa nayi, otatu ka henuka iinima ngaashi “uululu auhe, ondjahi, nonkone, omakudhilo nenge omatukano.” Pehala lyaashono, otatu ka ninga oonkambadhala tu kale tu na ‘olukeno.’ — Ef. 4:31, 32.
(Aakolossa 3:10-14) nomwa zala omuntu omupe. Kalunga ota shitulula aluhe omuntu nguka omupe mune, a fe ondjelo yomushiti gwe, opo e mu thikithe kegwano lyoku mu tseya. 11 Onkee ano kape na we eyooloko pokati komupagani nOmujuda, kaangoka a fukalekwa naangoka inaa fukalekwa, omupika nomuvalwa, omukwiilongo nomudhinwa, ihe ayihe oKristus ngoka e li mwaayihe. 12 One aantu yaKalunga. Kalunga oku mu hole nokwe mu hogolola, mu kale aantu ye mwene. Onkee ano kaleni mu na olukeno, ohenda, eifupipiko, ombili neidhidhimiko. 13 Kwathathaneni, dhiminathanii po oondjo ethimbo kehe, uuna pe na ngoka a ningathana namukwawo. Dhiminathanii po oondjo naanaa, ngashika Omuwa e mu dhimine po. 14 Kumbika ayihe gwedhii ko ohole, oshoka ohole oyo epaya tali vulu okumangela iinima ayihe kumwe.
Mbela owa shituluka ngaa?
18 Opo Oohapu dhaKalunga dhi tu shitulule momukalo ngoka gwa pumbiwa, otu na okulesha Ombiimbeli pandjigilile nokwiilonga shoka tayi ti, ihe shoka oshi li owala etameko. Aantu oyendji ohaya lesha Ombiimbeli omathimbo gamwe, noye na ontseyo onshona yaashoka tayi ti. Otashi vulika wa tsakaneka aantu ya tya ngaaka miilonga yomomapya. Yamwe nokuli ohaya vulu okuhokolola oovelise dhimwe dhOmbiimbeli momutse. Ihe shika otashi vulika shi gume kashona omukalo moka haya dhiladhila nosho wo onkalamwenyo yawo. Oshike mbela ya pumbwa? Opo Oohapu dhaKalunga dhi nwethe mo nokushitulula omuntu, omuntu oku na okweetha dhi ningine meni momutima gwe. Onkee ano, otwa pumbwa okukutha ethimbo lya gwana tu dhiladhile kwaashoka tatu ilongo. Oshi li nawa tu ipule tatu ti: ‘Mbela onda tompwa ngaa kutya shoka tandi ilongo kashi shi owala elongo lyontumba lyopalongelokalunga? Mbela onda mona kutya shika oshili? Shimwe ishewe, mbela ohandi mono ngaa omikalo moka ndi na okutula miilonga shoka tandi ilongo monkalamwenyo yandje nokukala inaandi shi tala ko owala kutya oshinima shoka tandi vulu okulonga yalwe? Mbela ondu uvite kutya Jehova oye ta popi nangame paumwene?’ Okudhiladhila nokutedhatedha komapulo ngoka otaku vulu oku tu kwathela tu kale tu hole Jehova unene nomitima dhetu. Ohole yetu yoku mu hola otayi ka koka. Ngele shoka twi ilongo osha gumu omitima dhetu, nena otatu ka ninga omalunduluko ngoka ga pumbiwa. — Omayel. 4:23; Luk. 6:45.
19 Okulesha pandjigilile Oohapu dhaKalunga nokutedhatedha kudho otaku ke tu inyengitha tu tsikile okuninga shoka tashi vulika twa ninga nale, ano twi ‘ihule omuntu gwetu omukulu pamwe nomikalo dhe, nokuzala omuntu omupe, ngoka ha ningwa aluhe omupe okupitila montseyo yashili.’ (Kol. 3:9, 10, yelekanitha NW.) Eeno shili, otatu vulu lela okupondola sho tatu uvu ko nawa Oohapu dhaKalunga noku dhi tula miilonga. Uukwatya wopaKriste mboka tatu ka mona otawu ke tu kwathela tu igamene komakoto gaSatana noomwigo dhe.
Konga omaliko mOmbiimbeli
(Aakolossa 1:13, 14) Oshoka Kalunga oye e tu nakula mo mepangelo lyomilema nokwe tu eta moshilongo shOmwana omuholike. 14 Omwana oye tuu ngoka e tu mangulula nokwa dhimi po oondjo dhetu.
it-E-2 ep. 169, okat. 3-5
Uukwaniilwa waKalunga
‘Oshilongo shOmwana omuholike.’ Konima yomasiku omulongo sho Jesus a yi megulu, pOpentekoste 33 E.N., aalanduli ye oya li ya mono kutya okwa “yeluthilwa kombanda kolulyo lwaKalunga,” sho Jesus e ya tilile ombepo ondjapuki. (Iil 1:8, 9; 2:1-4, 29-33) ‘Ehangano epe,’ olya tameke oku ya miilonga naalanduli mboka oyo tango ya ningi “oshigwana oshiyapuki,” ano aagwayekwa. — Heb 12:22-24; 1Pet 2:9, 10; Gal 6:16.
Kristus okwa kuutumba kolulyo lwaHe nokwa ningi omutse gwegongalo ndika. (Ef 5:23; Heb 1:3; Fil 2:9-11) Omanyolo otaga ulike kutya okuza pOpentekoste yo 33 E.N. oku uka komeho, Jesus okwa tameke okutonatela aalanduli ye. Sho Omuyapostoli Paulus a nyolele Aakriste yomuKolossi methelemumvo lyotango, okwa popi Jesus Kristus a fa e na nale Uukwaniilwa sho a ti: “Kalunga oye e tu nakula mo mepangelo lyomilema nokwe tu eta moshilongo shOmwana omuholike.” — Kol 1:13; yelekanitha Iil 17:6, 7.
Oshilongo shOmwana, ano Uukwaniilwa waKristus owo wa kala tawu pangele tawu wilikwa kombepo yaKalunga okuza pOpentekoste yomo 33 E.N. Okuza mpoka Jesus oye a kala ta tonatele Aakriste mboka ya gwayekwa nombepo yaKalunga ya ninge oyana yaKalunga yopambepo. (Joh 3:3, 5, 6) Ngele aagwayekwa Aakriste ya pewa ondjambi yawo yomegulu, itaya ka kala we aalelwa yokombanda yevi yUukwaniilwa waKristus, ihe otaya ka pangela pamwe naKristus megulu. — Eh 5:9, 10.
(Aakolossa 2:8) Kotokeni ano, mwaa yulwe nando okomuntu nomalongo guunongo wopantu nomafundjaleko gaa fele. Ogo ogi ikwatelela komithigululwakalo dhaantu noga za moombepo ndhoka tadhi pangele mewangandjo, ihe ne kaleni muKristus.
Omanenedhiladhilo okuza moontumwafo dha nyolelwa Aagalati, Aaefeso, Aafilippi nAakolossa
2:8 — Paulus okwe tu londodha tu yande iinima yini? Okwe tu londodha tu yande iinima yuuyuni waSatana, sha hala okutya, omakotampango ngoka tage wu wilike nenge tage wu humitha komeho. (1 Joh. 2:16) Mumbyoka omwa kwatelwa uufilosofi, ohole yokuhola omaliko nomalongelokalunga giifundja guuyuni mbuka.
Elesho lyOmbiimbeli
(Aakolossa 1:1-20) Ontumwafo ndjika oya zi kuPaulus, omuyapostoli gwaKristus Jesus, kehalo lyaKalunga, nokomumwameme Timoteus. 2 Oya nyolelwa aantu yaKalunga ye li muKolossa naamwameme aainekelwa muKristus. Esilohenda nombili yaKalunga Tate nayi kale pamwe nane. 3 Tse aluhe otatu hambelele Kalunga, He yOmuwa gwetu Jesus Kristus, sho tatu mu galikanene. 4 Oshoka otu uvu eitaalo lyeni okwiitaala Kristus Jesus nohole yeni okuhola aantu yaKalunga ayehe. 5 Ano elaka etoye nolyoshili sho lyu uvithilwa mokati keni, omu uvu lwotango etegameno ndyoka tali li gandja. One omu uva kutya shoka mwe shi tegamena pauvaneko, oshe mu pungulilwa nawa megulu, onkee eitaalo lyeni nohole yeni oya kankamekwa ketegameno ndyoka. 6 Evaangeli olye eta omayambeko nolya taandele nuuyuni auhe, ngashika naanaa lya taandele mokati keni, okuza kesiku ndyoka mu uva lwotango esilohenda lyaKalunga nomwi ilongo oku li tseya naanaa ngashika li li. 7 Shika omwe shi longwa kuEpafras, omuyakuli mukwetu omuholike nomwiinekelwa moshilonga shaKristus peha lyetu. 8 Oye okwe tu hokololele ohole yeni ndjoka mwe yi pewa kOmbepo. 9 Onkee ano tse ohatu mu galikanene aluhe okuza kesiku ndyoka tu uva sha kombinga yeni. Tse otatu indile Kalunga e mu udhithe Ombepo ye, ndjoka tayi mu pe ontseyo okutseya ehalo lye nuunongo auhe noondunge. 10 Nena otamu ka vula okukala ngashika Omuwa a hala mu kale, nokulonga aluhe shoka she mu opalela. Okukalamwenyo kweni otaku ka kala ihe kwa yambekwa miilonga ayihe iiwanawa, nontseyo yeni okutseya Kalunga otayi ka koka. 11 Oonkondo ndhoka tadhi zi mesimano lyoonkondo dhaKristus, nadhi mu koleke, opo mu wape okwiidhidhimikila ashihe shoka tashi mu adha. 12 Nyanyukweni ne mu hambelele Tate Kalunga, ngoka e mu ningi mu kale mu na oshitopolwa sheni moshipewa shoka a kala e shi nunina aantu ye moshilongo shuuyelele. 13 Oshoka Kalunga oye e tu nakula mo mepangelo lyomilema nokwe tu eta moshilongo shOmwana omuholike. 14 Omwana oye tuu ngoka e tu mangulula nokwa dhimi po oondjo dhetu. 15 Kristus oye olupe lu wetike lwaKalunga, ngoka, ihaa monika. Oye omutango gwiishitwa ayihe noku li kombanda yiishitwa ayihe. 16 Kalunga okwa shititha Kristus iinima ayihe yomegulu noyokombanda yevi, iinima mbyoka yi wetike naambyoka yaa wetike, ongele oonkondo dhomombepo nenge aaleli nenge omapangelo. Kalunga okwe mu shititha ewangandjo alihe. 17 Kristus okwa li ko manga iinima ayihe ya li yaa ko. Onkee muukumwe naye iinima ayihe otayi ka kala yi li pomahala gayolela. 18 Oye omutse gwolutu, nokutya gwegongalo. Oye oluthithiya lwomwenyo gwomolutu nomutango mokuyumudhwa kuusi, opo a kale oye awike omutango miinima ayihe. 19 Oshoka Kalunga okwa tokola, Omwana a kale e na egwanopo lyondjelo ayihe yaKalunga muye mwene. 20 MolwOmwana okwa panga ombili nuuyuni auhe meso lyOmwana lyokomushigakano. Osho ngeyi Kalunga okwa galulile kuye iinima ayihe yokombanda yevi noyomegulu.
8-14 JULI
OMALIKO OKUZA MOOHAPU DHAKALUNGA | 1 AATESSALONIKA 1–5
“Kumagidhathaneni ne mu kwathathane”
(1 Aatessalonika 5:11-13) Onkee ano kumagidhathaneni ne mu kwathathane, ngaashi hamu shi ningi nokuli. 12 Aamwameme, otatu mu indile, mu simaneke mboka taa longo mokati keni. Omuwa Kalunga oye e ya hogolola, ye mu wilike noye mu pukulule. 13 Ya simanekeni ne mu ya hole omolwoshilonga shoka taye shi longo. Kaleni mu na ombili mokati keni.
‘Simanekeni mboka taya longo nuudhiginini mokati keni’
12 ‘Okulonga mokati’ kegongalo okwa kwatela mo oshindji kaashi shi owala okulonga aantu. Uutumbulilo “okukala nawa” mboka wa longithwa muTimoteus gwotango 3:4 otawu gandja eityo lya faathana. Paulus okwa ti kutya omukuluntugongalo oku na okukala “omulumentu e shi okukala nawa naanegumbo lye noku shi okuputudha oyana, ya kale ye na evuliko nesimaneko.” Mpaka uutumbulilo “okukala nawa” osha yela kutya inawu kwatela mo owala okulonga oyana, ihe owa kwatela mo wo okukwatela komeho muukwanegumbo ‘nokuputudha oyana ya kale ye na evuliko nesimaneko.’ Eeno, aakuluntugongalo ohaya kwatele komeho megongalo opo ayehe ya vulike kuJehova. — 1 Tim. 3:5.
‘Simanekeni mboka taya longo nuudhiginini mokati keni’
19 Oto ka ninga po shike ngele owa pewa omagano ngoka ongoye ga nuninwa? Mbela oto ku ulika ngaa olupandu moku ga longitha? Jehova okwe ku pa “aantu ye li omagano” okupitila muJesus Kristus. Omukalo gumwe to vulu okuulika olupandu lwomagano ngaka ogwo okupulakena nawa kiipopiwa mbyoka hayi gandjwa kaakuluntugongalo nomokukambadhala okutula miilonga shoka haya popi. Oto vulu wo okuulika olupandu lwoye mokugandja omatyokosha taga ti sha pokugongala. Kala ho ambidhidha iilonga mbyoka aakuluntugongalo haya kutha ombinga moku yi wilika, ngaashi okuya miilonga yomomapya. Ngele owa mona uuwanawa momayele ngoka wa pewa komukuluntugongalo gwontumba, omolwashike itoo mu lombwele kutya owa mona mo uuwanawa? Kakele kaashono, omolwashike itoo ulike olupandu lwoye omolwomaukwanegumbo gaakuluntugongalo? Dhimbulukwa kutya opo omukuluntugongalo a longe nuudhiginini megongalo, uukwanegumbo we ohawu yamba po ethimbo ndyoka a li e na okukala nawo.
(1 Aatessalonika 5:14) Aamwameme, otatu mu kumagidha: gandeni aananyalo, tseni aambanda omukumo, ambidhidheni aankundi ne mu idhidhimikile ayehe.
‘Ohole yetu nayi kale yashili, tayi ulikwa wo nomiilonga’
13 Ambidhidha aankundi. Oshipango shomOmbiimbeli shoka tashi ti “ambidhidheni aankundi ne mu idhidhimikile ayehe,” otashi vulu oku tu kwathela tu mone ngele ohole yetu oyashili. (1 Tes. 5:14) Oyendji mboka ya li aankundi, konima oya kala ye na eitaalo lya kola. Ihe opu na yalwe twa pumbwa oku yi idhidhimikila nokutsikila oku ya ambidhidha. Shika otashi vulu okukwatela mo okukundathana nayo omanyolo taga tungu, okulonga pamwe nayo muukalele nokupulakena kuyo. Oshikwawo, pehala lyokudhiladhila kutya omumwatate nenge omumwameme okwa ‘kola’ nenge ‘omunkundi,’ natu kaleke momadhiladhilo kutya atuheni otu na omaukwatya omawanawa nomaunkundi. Nokuli nomuyapostoli Paulus okwa li e shi zimine kutya oku na omaunkundi. (2 Kor. 12:9, 10) Onkee ano, atuheni otwa pumbwa okuyambidhidhathana nAakriste ooyakwetu.
Natu kaleni tu na eifupipiko nolukeno ngaashi Jesus
16 Oohapu dhetu oombwanawa. Ngele otu na olukeno otashi ke tu inyengitha opo ‘tu tse aambanda omukumo.’ (1 Tes. 5:14) Oshike tatu vulu okuninga tu ya tse omukumo? Otatu vulu oku ya lombwela kutya otu na onkwa nayo, noku ya pandula ya mone kutya oye na omaukwatya nomagano omawanawa. Onawa tu ya kwathele ya mone kutya oye na ondilo momeho gaJehova, molwaashoka oye e ya eta moshili. (Joh. 6:44) Otatu vulu oku ya shilipaleka kutya Jehova oha kenukile aapiya ye mboka “ya dhengwa pevi” nenge “ya kanitha etegameno.” (Eps. 34:18) Onkee ano, oohapu dhetu oombwanawa otadhi vulu okutalaleka mboka ya pumbwa ehekeleko. — Omayel. 16:24.
Konga omaliko mOmbiimbeli
(1 Aatessalonika 4:3-6) Kalunga okwa hala, mu kale aayapuki ne mu yande oluhondelo. 4 Omulumentu kehe gwomokati keni na kale a tseya, nkene e na okukala nomukiintu, a kale naye pamukalo gu uka nogwesimaneko. 5 Ina kala naye pakahalu kuulunde ngashika aapagani mboka inaa tseya Kalunga. 6 Ano moshinima shika inaku kala nando omulumentu ta yono kumukwawo nenge te mu yugu. Shika otwe shi mu lombwele nale notwe mu kumagidha noonkondo kutya Omuwa ota ka geela mboka taa longo uuwinayi wa tya ngaaka.
it-1-E ep. 863-864
Oluhondelo
Oluhondelo olwo eyono ndyoka hashi vulika li umbithe mo [lu kondithe mo] omuntu megongalo lyopaKriste. (1Kor 5:9-13; Heb 12:15, 16) Omuyapostoli Paulus okwa yelitha kutya Omukriste ngoka ta hondele ota yono kolutu lwe mwene, oshoka ta longitha iilyo yoluvalo nomalalakano ga nyata. Ekwatathano lye naKalunga oha li teka po lela, oha nyateke egongalo lyaKalunga nohi itula ye mwene moshiponga shokukwatwa komikithi omidhipagi ndhoka hadhi taandele okuza moluhondelo. (1Kor 6:18, 19) Oha yono kaamwahe (1Tes 4:3-7) (1) mokunyateka egongalo nohe li shekitha (Heb 12:15, 16), (2) oha ningitha ngoka a ya naye moluhondelo a kale inaa yogoka pamikalo, nongele ina hokanwa oha kala inaa yogoka sho ta kaya mondjokana, (3) oha yono po omikalo dha yogoka dhoyaandjawo noha (4) yono kaavali yaangoka a hondela naye, komusamane gwe, nenge komuyalekwa gwaangoka a hondela naye. Ina dhina aantu mboka ya tula po oompango ndhoka tashi vulika hadhi popile oluhondelo nenge ihaadhi lu popile, ihe oKalunga ngoka te ke mu geela omolweyono lye. — 1Tes 4:8.
(1 Aatessalonika 4:15-17) Mpaka otatu mu lombwele elongo lya zi kOmuwa. Uuna ndoka Omuwa te ya, tse mboka tatu ka adhika tu na omwenyo, itatu ka tetekela mboka ya sa nale. 16 Tango otaku ka uvika elombwelo, ewi lyomuyengeli omukuluntu nehiko lyenkuma lyaKalunga. Nena Omuwa mwene ota ka kuluka ta zi megulu. Aantu mboka ya si yi itaala Kristus, otaa ka yumudhwa tango. 17 Opo ihe tse mboka tatu ka adhika tu na omwenyo pethimbo ndyoka, otatu ka gongelwa atuhe pamwe nayo pombanda miikogo, tu ka tsakaneke Omuwa mombepo. Osho ngeyi otatu ka kala ihe aluhe pOmuwa.
“Ehupitho lyeni lya thiki popepi”
14 Konima ngele Gog yaMagog a tameke okuponokela oshigwana shaKalunga, oshike tashi ka ningwa po? Ombiimbeli otayi ti kutya Omuna gwOmuntu ‘ota ka tuma ko aayengeli ye, ya ka gongele aahogololwa ye koombinga ne dhevi, okuza koshigo yevi sigo okoshigo yegulu.’ (Markus 13:27; Mateus 24:31) Okugongelwa hoka taku popiwa, hako hoka kwa ningilwe sho Aakriste aagwayekwa ya tameke okuhogololwa. Ko itaku ulike kokutulwa iihako kwaagwayekwa mboka ye li natango kombanda yevi. (Mateus 13:37, 38) Okutulwa iihako hoka ota ku ka ningwa manga uudhigu uunene inaawu tameka. (Ehololo 7:1-4) Mbela okugongelwa hoka taku popiwa, otaku ka ningwa uunake? Opethimbo mpoka aagwayekwa mboka ye li natango kombanda yevi taya ka pewa ondjambi yawo, e taya yi megulu. (1 Aatessalonika 4:15-17; Ehololo 14:1) Oshiningwanima shika otashi ka ningwa, konima ngele eponokelo lyaGog yaMagog lya tameke. (Hesekiel 38:11) Opo nduno shoka Jesus a popi sho a ti kutya ‘aayuuki otaa ka adhima ngetango omOshilongo shaHe,’ otashi ka gwanithwa. — Mateus 13:43.
15 Mbela shika osha hala okutya aagwayekwa otaya ka fegulwa po? Aantu oyendji mboka ye li momalongelokalunga giifundja gopaKriste, oyi itaala kutya Aakriste otaya ka falwa megulu nomalutu gopanyama. Ohaya dhiladhila wo kutya otaya ka mona Jesus nomeho gokomutse, sho ta galuka e ye a pangele kombanda yevi. Ihe Ombiimbeli otayi popi sha yela kutya sho Jesus ta ka galuka, ita ka monika nomeho gokomutse. Oya popi ya ti: “Endhindhiliko lyOmuna gwOmuntu otali ka holoka ihe kegulu,” nosho wo kutya Jesus ote ke ya “te ende kiikogo yokegulu.” (Mateus 24:30) Ombiimbeli oya ti wo kutya “olutu nduka lwonyama nombinzi italu vulu okuya mOshilongo shaKalunga.” Ano mboka taya ka falwa megulu oye na tango ‘okushitululwa ombaadhilila, ongepathimo lyeho, uuna enkuma lyahugunina tali ka hika.’ (Lesha 1 Aakorinto 15:50-53.) Molwaashoka oshitya fegulwa oshi na ekwatathano nomalongo giifundja gUukwakriste, itatu longitha oshitya shoka, opo tu yelithe oshiningwanima shika. Ihe osha yela kutya aagwayekwa aadhiginini mboka ye li natango kombanda yevi otaya ka gongelwa mepathimo lyeho.
Elesho lyOmbiimbeli
(1 Aatessalonika 3:1-13) Lwahugunina otwa nyengwa oku shi idhidhimikila. Otwa tokola okukala atuke muAtena, 2 manga tatu tumu omumwatate Timoteus, ngoka a longo pamwe natse oshilonga shaKalunga shokuuvitha elaka etoye tali popi Kristus. Otwe mu tumu, e mu tse omukumo ye a koleke eitaalo lyeni, 3 opo kwaa kale nando ogumwe ta shuna monima omolwomatidhagano. One omu shi shi kutya omatidhagano ga tya ngaaka ogo ombinga yimwe yehalo lyaKalunga mokukala kwetu. 4 Oshoka sho twa li pune, otwe mu londodha kutya onatu ka tidhaganwa, naashika omwe shi mono kutya osho naanaa tashi ningwa ngashingeyi. 5 Shika osho sha tumitha ndje Timoteus kune. Inandi vula we okwiidhidhimika, onkee onde mu tumu, opo a tale, ngele omu li tuu natango meitaalo. Kwaa ninge, pamwe omuhongololi e mu hongolola, niilonga yetu ayihe e tayi ningi eihepeko lyowala. 6 Ngashingeyi Timoteus okwa galukile ishewe kutse nokwe etelele elaka lyenyanyu tali popi eitaalo nohole yeni. Okwe tu hokololele wo kutya ohamu tu dhimbulukwa aluhe nomwe tu yuulukwa noonkondo, ngashika naanaa natse wo twe mu yuulukwa. 7 Aamwameme, otwa tsuwa omukumo omolweni mokuhepekwa nomomaudhigu getu. Eitaalo lyeni olye tu koleke, 8 oshoka ngashingeyi oomwenyo omo dhi li, ngele ne otamu kala mwa kankama mOmuwa. 9 Ehambelelo lyetu oli thike peni tu li na koshipala shaKalunga ketu, omolweni! 10 Ohatu galikana Kalunga noomwenyo dhetu adhihe uusiku nomutenya, tu mone ompito yokumona iipala yeni, tse tu gwedhe ko shoka sha kambela keitaalo lyeni. 11 Kalunga Tate nOmuwa gwetu Jesus naye tu longekidhile ompito yoku mu talela po. 12 Omuwa ne mu pe ohole yokuholathana, nohole yeni yokuhola aantu ayehe nayi koke yi thike pohole yetu yoku mu hola. 13 Osho ngeyi ota koleke omitima dheni, mu kale aayapuki nomwaa na oshipo koshipala shaKalunga Tate, uuna Omuwa gwetu Jesus te ya pamwe naayapuki ye ayehe.
15-21 JULI
OMALIKO OKUZA MOOHAPU DHAKALUNGA | 2 AATESSALONIKA 1–3
“Mwiinayi ta hololwa”
(2 Aatessalonika 2:6-8) Ihe sigo onena ope na shoka tashi keelele oshinima shika shaa ningwe, nane omwa tseya kutya oshike. Onkee ano Mwiinayi ota ka holoka pethimbo lye mu opalela. 7 Uukolokoshi we otau longo nokuli meholamo, ihe shoka tashi ka ningwa po, itashi ningwa, manga pu na ngoka e shi keelela. 8 Nena Mwiinayi ngoka ota ka holoka, ihe Omuwa Jesus, uuna te ya, ote ke mu dhipaga nomuku gwomokana ke e te mu hanagula po neadhimo lyeholoko lye.
it-1-E ep. 972-973
Etilokalunga
Opu na ishewe oshinima shimwe kaashi shi shiwike, shoka itaashi tsu kumwe nandonando ‘noshiholekwa’ shaJehova oshiyapuki. Oshinima shoka ‘uukolokoshi tawu longwa meholamo.’ Uukolokoshi mboka owa li womeholamo kAakriste yashili, molwaashoka pethimbo lyomuyapostoli Paulus “mwiinayi” kali e na ongundu ye yi iwetikile. Nokuli nokonima ‘yamwiinayi’ sho a li ta ka holoka, okwa li ta kala kee wetike kaantu oyendji molwaashoka uukolokoshi we okwa li te ke wu longa meholamo nomedhina lyelongelokalunga. Okwa li ta ka kala omushunimonima a za melongelokalunga lyashili. Paulus okwa ti kutya mwiinayi okwa tameke okulonga ‘uukolokoshi we meholamo’ nokuli pethimbo lye, molwaashoka yamwe megongalo lyopaKriste oya li ya nwethwa mo e taya ningi aashunimonima. Aashunimonima mboka otaya ka hanagulwa po sho Jesus ta ka holoka. “Mwiinayi” ngoka e li omushunimonima ta longithwa kuSatana ote ki itumbaleka kombanda yaayehe ‘nota ka kondjitha ayihe mbyoka hayi ithanwa nakalunga nenge iiyapuki.’ “Mwiinayi” ota ka pondola mokulonga uukolokoshi, molwaashoka ote ke wu longa miineya okupitila melongelokalunga lyiihelele. — 2Tes 2:3-12; yelekanitha Mat 7:15, 21-23.
(2 Aatessalonika 2:9-12) Mwiinayi ngoka ote ke ya e na oonkondo dhaSatana nota ka longa iikumithalonga, omandhindhiliko niilongankondo yiifundja yoludhi kehe, 10 Nota ka longitha omakoto okupukitha mboka ye li mondjila ndjoka yu uka mekano. Oyo otaa ka kana, oshoka inaa taamba nohole yoshili yoku ya hupitha. 11 Onkee ano Kalunga ote ke ya tumina epukitho edhigu, opo yi itaale iifundja. 12 Nena ayehe mboka ya hokwa uulunde noinaa hala okwiitaala oshili, otaa ka pangulwa.
it-E-2 ep. 245, okat. 7
Iifundja
Jehova Kalunga okweetha aantu mboka hayi “itaale iifundja” ya ye ‘mepukitho edhigu’ pehala lyokwiitala onkundana ombwanawa tayi popi kombinga yaJesus Kristus. (2Tes 2:9-12) Oshinima sha faathana osha li sha ningilwa Omukwaniilwa gwaIsraeli Ahab omathelemumvo ga ka pita. Aahunganeki aafundja oya li ya lombwele Ahab kutya ota ka sinda Ramot shaGilead molugodhi, omanga omuhunganeki gwaJehova Mikaia a hunganeke kutya ota ka adhika koshiponga. Memoniko ndyoka lya hololewa Mikaia, Jehova okwa li a pitike ombepo yi ka popithe aahunganeki yaAhab “iifundja.” Sha yela kutya ombepo ndjoka oya li ya nwethamo aahunganeki kaaya popye oshili, ihe ooshoka osho yo yene ya li ya hala okupopya naashoka Ahab a li a hala okuuva. Nonando Ahab okwa li a londodhwa, okwi itaale iifundja yawo noshe mu etele eso. — 1Aak 22:1-38; 2Ondjal 18.
Konga omaliko mOmbiimbeli
(2 Aatessalonika 1:7, 8) note ke mu pa evululuko pamwe natse. Oye ote ke shi ninga, uuna Omuwa Jesus ta ka za megulu pamwe naayengeli ye aanankondo. 8 Oye ote ke ya momulilo gwa hwama okugeela mboka ina tseya Kalunga naamboka ina vulika kelaka etoye tali popi Omuwa gwetu Jesus.
it-1-E ep. 834, okat. 5
Omulilo
Petrus okwa nyola a ti: “Ihe omagulu nevi sho yi li ko sigo onena, oya gamenenwa po kohapu tuu ndjoka yaKalunga, yi ka hanagulwe po nomulilo.” Oohapu ndhika nadhilwe wo ndhoka dhi li momanyolo, otadhi ulike kutya ngoka kagu shi omulilo gogwene, ihe ehanagulo lyaaluhe. Ngaashi owala Eyelu lyaNoowa lya li inaali hanagula po egulu nevi lyo lyene, ihe aakolokoshi, Jesus naye sho ta ka holoka naayengeli ye aanankondo te ke ya momulilo gwa hwama ota ka hanagula po thiluthilu aakolokoshi niinima ayihe mbyoka yi li mepangelo lyaSatana. — 2Pet 3:5-7, 10-13; 2Tes 1:6-10; yelekanitha Jes 66:15, 16, 22, 24.
(2 Aatessalonika 2:2) inamu etha, mu piyaganekwe nuupu nenge mu tilithwe koohapu tadhi ti kutya esiku lyOmuwa olye ya nale. Inamu itaala oohapu dha tya ngaaka, nando dhi kale dhi ikwatelela mehunganeko lyontumba nenge moshipopiwa nenge montumwafo ya zi kutse aniwa.
it-1-E ep. 1206, okat. 4
Oohapu nenge ombepo, OB-1954
‘Oohapu dha nwethwa mo’ dhoshili nodhiifundja. Oshitya shOshigreka pneuma (ombepo) osha longithwa momukalo gwi ikalekelwa momanyolo gamwe gaayapostoli. Pashiholelwa mAatessalonika aatiyali 2:2, omuyapostoli Paulus okwa ladhipike aamwahe Aatessalonika kaayi itaale ‘oohapu [sha hala okutya ombepo] tadhi ti kutya esiku lyOmuwa olye ya nale. Nando dhi kale dhi ikwatelela mehunganeko lyontumba nenge moshipopiwa nenge montumwafo ya zi kuyo aniwa.’ Osha yela kutya omuyapostoli Paulus okwa longitha oshitya pneuma [ombepo] a ukitha komukalo moka aantu ya li taya ka mona etumwalaka ndyoka, tashi vulika okupitila “moshipopiwa” nenge “montumwafo.” Omolwetompelo ndyono, embo Commentary on the Holy Scriptures lya nyolwa kuLange (ep. 126) olya ti: “Omuyapostoli Paulus okwa li ta popi kombinga yuuyelele mboka tawu popiwa kaahunganeki tawu monika wa fa wa nwethwa mo kombepo yaKalunga, ihe nani owiifundja.” (Lya tolokwa nokunyolululwa kuP. Schaff, 1976) Embo Word Studies in the New Testament lya nyolwa kuVincent ota li ti: “Okupitila mombepo. Oohapu dha popiwa kaahunganeki piigongi yAakriste taya ti kutya anuwa uuyelele mboka oye wu hololelwa kuKalunga.” (1957, Vol. IV, ep. 63) Onkee ano, nonando omatoloko gamwe oga toloka oshitya pneuma kutya “ombepo,” galwe oga longitha uutumbulilo “etumwalaka lya gandjwa kOmbepo” (AT), “ehunganeko” (JB), “oohapu,” (OB-2008) nosho wo “oohapu dha nwethwa mo” (NW).
Elesho lyOmbiimbeli
(2 Aatessalonika 1:1-12) Ontumwafo ndjika oya zi kuPaulus, Silvanus naTimoteus. Oya nyolelwa egongalo lyomuTessalonika, lyaantu yaKalunga Tate noyOmuwa Jesus Kristus. 2 Silweni ohenda ne mu kale mu na ombili yaKalunga Tate noyOmuwa Jesus Kristus. 3 Aamwameme, tse otu na okuhambelela Kalunga aluhe omolweni. Osho opala, tu shi ninge, oshoka eitaalo lyeni otali koko nohole yeni yokuholathana otayi indjipala noonkondo. 4 Onkee ano tse momagongalo gaKalunga ohatu itanga molweni. Tse otatu mu itangele, sho hamu idhidhimike nomwadhiginina eitaalo momatidhagano nomomahepeko ngoka hage mu adha. 5 Shika otashi holola kutya epangulo lyaKalunga olyo eyuuki, oshoka kehulilo lyaambika ayihe, Kalunga ote ke mu ninga mwoopalela Oshilongo she, shoka tamu shi hepekelwa. 6 Oshoka Kalunga oha longo shoka shu uka; oye ota ka galulila omahepeko kombanda yaamboka ya li ye mu hepeke, 7 note ke mu kutha mo mugo pamwe natse. Oye ote ke shi ninga, uuna Omuwa Jesus ta ka za megulu pamwe naayengeli ye aanankondo. 8 Oye ote ke ya momulilo gwa hwama okugeela mboka ina tseya Kalunga naamboka ina vulika kelaka etoye tali popi Omuwa gwetu Jesus. 9 Oyo otaa ka adhika kegeelo lyehanagulo lyaaluhe, ndyoka tali ke ya kaleka kokule naKalunga nonesimano lyoonkondo dhe. 10 Ihe aantu ye otaye ku mu hambelela nooitaali ayehe otaye mu tanga esiku ndyoka te ya. Nena nane wo otamu ka kala mongundu yawo, oshoka omwi itaala elaka ndyoka twe li mu uvithile. 11 Onkee ano tse ohatu mu galikanene aluhe. Otatu galikana Kalunga, e mu ukithe paithano ndyoka e mu ithanena. Oye ne mu pe oonkondo nehalo lyokulonga uuwanawa nolyokutsakanitha iilonga yeni yomeitaalo. 12 Osho ngeyi mokusimaneka edhina lyOmuwa gwetu Jesus naye wo ote ku mu simaneka omolwesilohenda lyaKalunga ketu nolyOmuwa Jesus Kristus.
22-28 JULI
OMALIKO OKUZA MOOHAPU DHAKALUNGA | 1 TIMOTEUS 1–3
“Lalakanena omauthembahenda megongalo”
(1 Timoteus 3:1) Ohapu oyoshili ndjoka tayi ti: Omulumentu ngoka a hala okuninga omuwiliki gwegongalo lyaKalunga, oye okwa hala oshilonga oshiwanawalela.
Mbela owu wete ngaa wa pumbwa okuninga ehumokomeho pambepo?
3 Lesha 1 Timoteus 3:1. Uutumbulilo “ehalo lyokuninga,” mboka wa longithwa mOmbiimbeli, owa tolokwa okuza koshityalonga shOshigreka shoka tashi gandja eityo lyokukala wa halelela oshinima nenge lyokwiiyeka wu shi adhe. Omuyapostoli Paulus sho a longitha oohapu ndhoka oku ulike kutya, opo omuntu a hume komeho pambepo okwa pumbwa okuninga oonkambadhala. Dhiladhila ando komumwatate ngoka ta lalakanene iinakugwanithwa megongalo. Ke shi natango omuyakuligongalo, ihe okwa mono kutya okwa pumbwa okukokeka omaukwatya gopambepo. Tango okwa lalakanene okuninga omuyakuligongalo. Mokweendela ko kwethimbo okwa lalakanene okukala a gwana okuninga omukuluntugongalo. Mompito kehe okwa longo nuudhiginini, opo a gwanithe po iitegelelwa mbyoka tayi mu petha oshinakugwanithwa sha gwedhwa po megongalo.
(1 Timoteus 3:13) Mboka taa longo iilonga yawo nawa, otaa imonene esimano notaa vulu okukala nuulaadhi mokwiitaala Jesus Kristus.
km-E 9/78 ep. 4, okat. 7
Mboka taa ‘imonene esimano’
7 Oshipu okumona kutya omolwashike omuyapostoli Paulus a popi kutya aalumentu mboka “otaa imonene esimano.” Esimano ndyoka inali fa ndyoka hali monika moongeleka ngaashi yamwe haya ti. Pehala lyaashono, aayakuligongalo mboka “taa longo iilonga yawo nawa” ohaya yambekwa kuJehova nokuJesus nohaya simanekwa nokwaambidhidhwa kegongalo alihe. Ohaya “vulu okukala nuulaadhi mokwiitaala Jesus Kristus.” Molwaashoka ohaya kala yi itula mo miilonga yawo, ohaya pandulwa omolweyakulo ewanawa ndyoka haya gandja, oye na eitaalo lya kola nohaya vulu okuhempulula eitaalo lyawo kaaye na uumbanda nenge okukala ya tila okusithwa ohoni.
Konga omaliko mOmbiimbeli
(1 Timoteus 1:4) Ya lombwela ano, ye ethe po oongano dhawo nomukalo gwawo gwokusimaneka oondjokonona dhomadhina goohekulu, oshoka iinima ya tya ngeyi otayi eta owala omaludhi. Oyo inayi opalela edhiladhilo lyaKalunga, ndyoka tali tseyika mokwiitaala.
it-1-E ep. 914-915
Oondjokonona dhomadhina goohekulu
Okukonakona nokupopya kombinga yoondjokonona ndhono oshinima sha li kaashi na oshilonga nosho sha li ngaaka pethimbo Paulus a li a nyolele Timoteus. Kasha li we sha simana okukala nomisholondondo dhomadhina goohekulululwa yaantu, molwaashoka Kalunga ka li a yoolola Aajuda naamboka kaaye shi Aajuda mboka ya li megongalo lyopaKriste. (Gal 3:28) Ondjokonona yomadhina goohekulululwa yezimo lyaDavid moka mwa li tamu ka za Jesus Kristus oya adhika wo ya nyolwa nale. Konima yokathimbo okafupi, Paulus okwa li wo te ke ya nyolela kombinga yehanagulo ndyoka lya li tali ka adha Jerusalem nomambo gAajuda goondjokonona oga li taga ka hanagulwa po. Kalunga kali a etha ga kale po. Ano Paulus okwa li ti ipula kutya Timoteus naakwanegongalo inaya hepitha ethimbo lyawo mokuninga omapekapeko nokupopya kombinga yoondjokonona ndhoka dha li itaadhi ka tunga nando eitaalo lyawo. Omusholondondo ngoka gu li mOmbiimbeli gwezimo moka mwa ka za Kristus e li Mesiasa ogwo gwa simanenena kAakriste. Omisholondondo dhilwe ndhoka dhi li mo otadhi tu kwathele owala tu mone kutya Ombiimbeli oyi li paushili nokuulika kutya aantu mboka ya tumbulwa mo oko ya li shili.
(1 Timoteus 1:17) Kalunga awike, omukwaniilwa gwaaluhe, ngoka kee na ehulilo noiha monika, na hambelelwe ye na simanekwe aluheluhe! Amen.
“Kalunga ketu oye nguka!”
15 Edhinasimaneko limwe ndyoka lye eleka Jehova owala olyo “Omukwaniilwa gwaaluhe.” (1 Timoteus 1:17) Edhinasimaneko ndyoka otali ti shike? Omolwomadhiladhilo getu ngoka ga ngambekwa itatu ke li uva ko nuupu, ihe otali ti kutya Jehova omukwaaluhe, molwaashoka oko a kala nale nota ka kala ko sigo aluhe. Episalomi 90:2 otali ti: “Ngoye Kalunga kaaluhe oko wa li noto ka kala aluhe sigo aluhe.” Jehova ke na etameko, oko a kala nale. Oshi li she eleka sho ti ithanwa “Omusamane gwomimvo,” molwaashoka okwa kala ko nale manga inaa shita eshito alihe. (Daniel 7:9, 13, 22, OB-1954) Olye mbela ta vulu okukala a limbililwa ngele oku li shili OMUWA Omupangeliawike?
Elesho lyOmbiimbeli
(1 Timoteus 2:1-15) Omakumagidho gandje ogo ngaka: Tangotango naku ningwe omaindilo, omagalikano, omagalikaneno nomahambelelo koshipala shaKalunga omolwaantu ayehe. 2 Naku galikanenwe aakwaniilwa naapangeli ayehe, opo tu kale nokukala kwa ngungumana nokwombili mokusimaneka Kalunga akuhe nomikalo omiwanawa. 3 Shika osho oshiwanawa nosho opalela Kalunga, omuhupithi gwetu, 4 ngoka a hala, aantu ayehe ya hupithwe noya tseye oshili. 5 Oshoka Kalunga ogumwe awike, naangoka a hanganitha aantu naKalunga, ogumwe, omuntu Jesus Kristus, 6 ngoka i igandja, a ninge iikulila yaantu ayehe. Shika osha ningwa pethimbo lyo opala, oshoka Kalunga okwa li a hala aantu ayehe ya hupithwe. 7 Onkee ano ngame onda tumwa, ndi ninge omuyapostoli nomulongi mokati kaapagani nondi uvithe elaka tali popi eitaalo noshili. Otandi popi oshili, ite fundju. 8 Onda hala, aalumentu ya galikane akuhe nokuyelutha omaako gawo pombanda yaa na uutondwe nomalimbililo. 9 Onda hala wo, aakiintu ya dhiladhile nawa kombinga yomizalo dhawo, yo ya zale oonguwo dhi shi kutalwa nodha yogoka. Inaa panda omafufu ya zalekwe oombandi dhiingoli nomagwe taga adhima nenge oonguwo dhi na ondilo. 10 Peha lyaambika kaleni mu udha iilonga iiwanawa, ngaashi sho opalela aakiintu ooitaali. 11 Melongelokalunga aakiintu naa pulakene ya mwena nokuvulika kelandulathano. 12 Ngame itandi pitika, aakiintu ya ninge aalongihapu nenge ya pangele aalumentu, ihe naa kale ya mwena. 13 Oshoka Adam oye a shitwa tango e taku landula ihe Eva. 14 Adam haye a pukithwa, ihe omukiintu oye a pukithwa nokwa yono oshipango shaKalunga. 15 Ano omukiintu ota ka hupithwa omolwokuvala uunona, ihe ongele ta dhiginine eitaalo, ohole yopakriste neiyapulo.
29 JULI–4 AUGUSTE
OMALIKO OKUZA MOOHAPU DHAKALUNGA | 1 TIMOTEUS 4–6
“Etilokalunga neliko”
(1 Timoteus 6:6-8) Eeno, uukriste owo shili eliko enene, ihe ongele wa gwana naashoka u shi na. 7 Muuyuni inatu ya mo nando onasha, osho wo itatu vulu okuza mo nasha. 8 Onkee ano natu kale twa gwana, ngele otu na iikulya nomizalo.
w03-E 6/1 ep. 9, okat 1-2
Ilonga okukala wa gwanenwa
Oshinima unene sha simana shoka sha li hashi nyanyudha Paulus, okukala u uvite a gwanenwa. Okukala wa gwanenwa otashi ti shike? Otashi ti okukala wa mbilipalelwa naashoka wu na. Paulus okwa li a lombwele Timoteus omulongi pamwe naye miilonga yokuuvitha kombinga yaashoka, a ti: “Eeno, [“etililokalunga,” NW] olyo shili eliko enene, ihe ongele wa gwana naashoka u shi na. Muuyuni inatu ya mo nando onasha, osho wo itatu vulu okuza mo nasha. Onkee ano natu kale twa gwana, ngele otu na iikulya nomizalo.” — 1 Timoteus 6:6-8.
Ndhindhilika kutya Paulus okwa kwatakanitha okukala twa gwanenwa netilokalunga. Okwa li a mono kutya enyanyu lyashili ohali zi mokutila Kalunga, sha hala okutya mokupititha komeho oku mu longela, ihe ihali zi miinima yopamaliko. Okwa li e wete a gwanenwa okukala e na “iikulya nomizalo,” opo a tsikile okulongela Kalunga. Onkee ano, kutya nduno Paulus okwa li moonkalo dha tya ngiini, shoka sha li sha mu kwathele a kale u uvite a gwanenwa, einekelo lye muJehova.
(1 Timoteus 6:9) Ihe mboka ya hala okuninga aayamba, otaa gwile memakelo. Oyo otaa yulwa kuuhalu uuwinayi wuugoya mboka tau ya fala moshiponga nomekano.
g-E 6/07 ep. 6, okat. 2
Okupititha komeho omaliko otashi vulu oku ku guma ngiini?
Oshoshili kutya aantu oyendji ihaya si sho ya pititha komeho okwiilikolela omaliko. Ihe otaya vulu okupitililwa po kiinima iiwanawa monkalamwenyo, manga owala ya pwila mokulalakanena omaliko. Shika otashi vulu oku ya ningitha kaaye shi endithe we nawa monkalamwenyo ngele oya gwililwa po kiilonga nenge kaaye na iimaliwa shoka hashi ya ningitha ya kale tayi ipula sha pitilila, ihaaya kotha, taye ehama omitse, nenge ya ninge iilalo momapunda. Uunkundi mboka ohawu vulu okufaalela oomwenyo dhawo. Ihe nonando omuntu oku shi dhimbulule kutya okwa pumbwa okulundulula shoka a pititha komeho, otashi vulika ethimbo li kale lya pwa po nale. Kuume kopandjokana otashi vulika a kale inee mu inekela we, otashi vulika shi kale sha guma oyana pamadhiladhilo nota vulu a kale kee na we uukolele. Oonkalo dhimwe ndhoka otashi vulika dhi ye kondjila, ihe otashi pula lela oonkambadhala dha mana mo. Aantu mboka haya lalakanene omaliko ‘ohaa yono po oomwenyo dhawo niimpwiyu oyindji.’ — 1 Timoteus 6:10.
(1 Timoteus 6:10) Oshoka mohole yeliko omo tamu zi uukolokoshi auhe. Aantu oyendji sho ya lalakanene eliko, oya puka mo mondjila yeitaalo noya yono po oomwenyo dhawo niimpwiyu oyindji.
g-E 11/08 ep. 6, okat. 4-6
Iinima ihamano mbyoka tayi tu kwathele tu pondole
Ngaashi twe shi mono moshitopolwa shotango shomiitopolwa mbika, aantu mboka yi itula mokukonga omaliko opo ya kale ya nyanyukwa monkalamwenyo, otaya tidha owala ombepo. Nonando ohashi ya yemateke, ohashi ya etele wo iimpwiyu oyindji. Pashiholelwa, uuna aantu yi itula owala mokukonga omaliko, ohashi ya ningitha ya kanithe ekwatathano noyaandjawo nonookuume kawo. Yalwe ihaya kotha we sha gwana, tashi vulika molwiilonga, iimpwiyu nenge ye na omaipulo. Omuuvithi 5:12 otayi ti: “Oomposi dhanakulonga oontoye, ashihe shimwe, ngele ta li oshindji nenge oshishona, ihe eloolo lyomuyamba otali mu imbi oomposi.”
Iimaliwa kayi shi owala omuhona ngoka e na onyanya, ihe ohayi heke wo aantu. Jesus Kristus okwa popya kombinga ‘yefundjaleko lyuuyamba.’ (Markus 4:19) Aantu ohaya ti uuyamba ohawu e ta enyanyu, ihe shoka hasho. Ohawu ningitha owala aantu ya kale ya hala iinima oyindji. Omuuvithi 5:10 otayi ti: “Nakuhola iimaliwa ihe yi kuta.”
Uuna omuntu e hole iimaliwa ohashi mu etele uupyakadhi, a kale a yemata nenge nokuli a longe omiyonena. (Omayeletumbulo 28:20) Shoka tashi tu etele lela enyanyu okukala hatu gandja, hatu dhimine po yalwe, twa yogoka pamikalo, tu hole yalwe nokukala nekwatathano ewanawa naJehova.
Konga omaliko mOmbiimbeli
(1 Timoteus 4:2) Omalongo ga tya ngeyi otaga zi maantu aanamakoto naafundja, oomboka ye na eiyuvo lya sa, ongolya fikwa noshiyela sha hanya.
Ongiini to vulu okukala wu na eiyuvo ewanawa?
17 Omuyapostoli Petrus okwa nyola a ti: “Kaleni mu na eiyuvo ewanawa.” (1 Pet. 3:16) Eiyuvo lya yela momeho gaJehova Kalunga oli li elaleko nuuyamba enene. Inali fa omaiyuvo goyendji kunena. Paulus okwa hokolola mboka “eiyuvo lyawo lya sa, ongolya fikwa noshiyela sha hanya.” (1 Tim. 4:2) Ngele oshiyela oshipyu sha fike kolutu, ohashi thigi ko oshiyadhi kaashi na omaiyuvo. Aantu oyendji oye na eiyuvo lya sa, lya fa oshiyadhi kaashi na omaiyuvo, ihaali ya londodha we noihaali ya indike sha nenge li ya pe uusama ngele ya ningi epuko. Oyendji kunena oye hole okwiipwililika omaiyuvo gawo ngele tage ya pe uusama.
(1 Timoteus 4:13) Longitha ethimbo lyoye mokulesha Omanyolo omayapuki montaneho yaayehe, mokuuvitha nomokulonga aantu, sigo tandi ya.
it-2-E ep. 714, okat. 1-2
Okulesha montaneho
Megongalo lyopaKriste. Methelemumvo lyotango aantu owala aashona ya li ye na oondhingambo dhOmbiimbeli, onkee osha li sha simana oku dhi lesha montaneho. Omuyapostoli Paulus okwa li a lombwele Aakriste ya kale haya lesha oontumwafo dhe megongalo noku dhi tumina komagongalo galwe dhi ka leshwe wo. (Aakolossa 4:16; 1 Aatessalonika 5:27) Paulus okwa li a ladhipike omugundjuka Timoteus ngoka a li omuwiliki gwegongalo i itule mo “mokulesha Omanyolo omayapuki montaneho yaayehe, mokuuvitha nomokulonga aantu.” — 1Tim 4:13.
Omuntu ngele ta lesha montaneho oku na okukala ta lesha nawa. (Hab 2:2) Molwaashoka okulesha montaneho oku li oshitopolwa shokulonga yalwe, omuntu ngoka te shi ningi oku na okukala u uvite ko nawanawa shoka ta lesha, nokukala u uvite ko elalakano lyomunyoli. Shika otashi mu kwathele kaa gandje edhiladhilo lya puka kaapulakeni. Shi ikolelela kEhololo 1:3, mboka haya lesha omahunganeko nosho wo mboka haya pulakene oohapu nohaye dhi dhiginine, otaya kala ya nyanyukwa.
Elesho lyOmbiimbeli
(1 Timoteus 4:1-16) Ombepo Ondjapuki ote shi popi sha yela kutya komasiku gokomeho aantu yamwe otaa ke etha eitaalo. Oyo otaa ka vulika koombepo dhiifundja notaa ka landula omalongo goompwidhuli. 2 Omalongo ga tya ngeyi otaga zi maantu aanamakoto naafundja, oomboka ye na eiyuvo lya sa, ongolya fikwa noshiyela sha hanya. 3 Aantu ya tya ngeyi ohaa indike okuhokana nosho wo okulya iikulya yontumba noyongandi. Ihe Kalunga okwa shiti iikulya mbika, yi liwe kooitaali nokumboka ya tseya oshili noku mu hambelela. 4 Ashihe shoka sha shitwa kuKalunga, osho shiwanawa; inashi ekelwahi, ihe nashi taambwe nokuhambelela Kalunga. 5 Oshoka oohapu dhaKalunga negalikano oyo tayi shi taambitha kuKalunga. 6 Ngele to longo yakweni omalombwelo ngano, nena oto talwa omuyakuli omwaanawa gwaJesus Kristus. Oto mono ihe eitaalo moohapu nomelongo lyu uka, ngaashi wa kala mulyo. 7 Onkee ano yanda oongano itaadhi popi Kalunga nodhaa na ekwatho lyasha. Ihe iputudha, u kale ho simaneke Kalunga. 8 Eidheulo lyopalutu oli na ekwatho eshona lyowala, ihe okusimaneka Kalunga otaku kwatha miinima ayihe, oshoka omo mu na euvaneko lyomwenyo ngashingeyi nokonakuyiwa. 9 Ohapu ndjika oyoshili, onkee oyi shi kutaambwa nokwiitaalwa. 10 Shika osho tatu kondjele notatu shi ihepekele, oshoka otwi inekela Kalunga omunamwenyo, Omuhupithi gwaantu ayehe, unene gwaamboka ooitaali. 11 Ano ya lombwela, u ya longe iinima mbika ayihe. 12 Inapu kala nando ogumwe te ku dhini molwaasho omugundjuka, ihe kala omuholelwa kooitaali moohapu, momikalo, mohole, meitaalo nomuuyogoki. 13 Longitha ethimbo lyoye mokulesha Omanyolo omayapuki montaneho yaayehe, mokuuvitha nomokulonga aantu, sigo tandi ya. 14 Ino hepitha omagano gopambepo ge li mungoye, ngoka we ga pewa, aahunganeki sho ya popi elaka lyaKalunga, naakuluntu sho ye ku tenteke iikaha yawo. 15 Iinima mbika yi ninga ano, ngoye wi itule mo muyo, opo okuhuma kwoye komeho ku monike kwaayehe. 16 Itonatela ano mwene nosho wo elongo lyoye. Iinima mbika yi dhiginina, oshoka ngele to shi ningi, oto ihupitha nosho wo mboka taye ku pulakene.