Omapulo ga za kaaleshi

Mbela iilonga yokuuvitha otayi ka hula uunake?

Jesus okwa ti: “Shimwe ishewe, onkundana ndjika ombwanawa yUukwaniilwa otayi ka uvithilwa uuyuni awuhe, opo aantu yomiigwana ayihe ye yi uve, opo ihe ehulilo tali ya.” (Mat. 24:14) Oshitya shOshigreka shoka sha tolokwa “ehulilo” movelise ndjika nomovelise 6 nosho wo 13, osho teʹlos. Oshitya shoka oshu ukitha kehulilo lela lyuuyuni waSatana, piita yaArmagedon. (Eh. 16:14, 16) Onkee otatu ka tsikila okuuvitha onkundana ombwanawa, sigo oosho iita yaArmagedon yi li pokutameka. Shono osha pepaleka euvoko lyetu lyonale.

Nale, otwa li tatu dhiladhila kutya otatu ka hulitha po iilonga yokuuvitha onkundana ombwanawa, konima ngele uudhigu uunene wa tameke nehanagulo lyaBabiloni Oshinene. (Eh. 17:3, 5, 15, 16) Otwa li twa itaala kutya ngele uudhigu uunene wa tameke, Jehova ita ka pa aantu ompito yokutaamba ko onkundana ombwanawa. (Jes. 61:2) Otwa li tatu dhiladhila kutya mboka taya ka hupa puudhigu uunene, oyo mboka owala ya ulike uudhiginini wawo kuJehova, omanga oshiningwanima shoka inaashi thika. Otwa li twe ya yelekanitha nAajuda mboka ya li ya hupu pehanagulo lyaJerusalem mo 607 K.E.N. Oohandimwe mboka oya adhika nale ya pewa endhindhiliko kutya otaya ka hupa, molwaashoka oya longela Jehova nuudhiginini noya li ye tonde uukolokoshi. (Hes. 5:11; 9:4) Efaathanitho ndyoka kali li metsokumwe noohapu dhaJesus ndhoka tadhi adhika muMateus 24:14, ndhoka tadhi ulike kutya aantu otashi vulika ya ka kale ye na ompito yokutaamba ko onkundana ombwanawa, sigo oosho ehulilo lela li li pokutameka, ano piita yaArmagedon.

Euvoko lyetu lya pepalekwa li na ko nasha nenyolo lyaMateus 24:14, olya hwepopaleke wo euvoko lyetu li na ko nasha netumwalaka lyomamanya ga fa oompawe, ndyoka lya hunganekwa mEhololo 16:21. Sho twe shi konakona muule, otwa mono kutya omanyolo ngoka gaali otaga ambidhidhathana. Ngiini mbela? Eyamukulo oli ikolelela kunkene aantu taya ka taamba ko etumwalaka lyUukwaniilwa. Omuyapostoli Paulus okwa nyola a ti kutya ‘kwaamboka taya ka hupithwa,’ etumwalaka ndyoka oli li onkundana ombwanawa, ano “ezimba lyomwenyo.” Ihe kaatondi yaKalunga, oli li onkundana ombwinayi, ano “ezimba lyeso.” (2 Kor. 2:15, 16) Oye tonde etumwalaka lyUukwaniilwa, molwaashoka otali aneke pomutenya kutya uuyuni wawo, mboka tawu pangelwa kuSatana, owa kolokosha nowa tegelela oku ka hanagulwa po. — Joh. 7:7; 1 Joh. 2:17; 5:19.

Ndhindhilika wo kutya oshikungulu shoka shoompawe shopathaneko otashi ka kala “oshinene noonkondo.” Shono osha hala okutya pethimbo lyuudhigu uunene, iilonga yokuuvitha itayi ka lila omuntu okathima koluko, sho edhina lyaJehova tali ka tseyithilwa oyendji, inaashi monika nando onale. (Hes. 39:7) Mbela pethimbo ndyono, konima yehanagulo lyaBabiloni Oshinene, opu na ngaa yamwe taya ka tala ko etumwalaka ndyoka li li ezimba lya nika nawa? Eeno, otashi vulika. Otashi vulika ya ka dhimbulukwe nenge ya ka mone kutya uule womimvo odhindji, Oombangi dhaJehova odha kala nokutseyitha kutya Babiloni Oshinene otashi ka hanagulwa po.

Shono osha faathana nomageelo omulongo ngoka ga li ga ningwa muEgipiti shonale. Konima sho Jehova a “pangula iikalunga ayihe yaEgipiti,” oshigwana she osha li sha waiminwa ‘kaantu yalwe aayeni,’ mboka kaaya li Aaisraeli. (Eks. 12:12, 37, 38) Aakwiilongo mboka otashi vulika ya li ya hogolola okuya pamwe noshigwana shaJehova, sho ya mono kutya kehe shoka Moses a popya shi na ko nasha naashoka tashi ka ningwa po pegeelo kehe, osha gwanithwa po.

Kehe ngoka ta ka gama kuJehova konima yehanagulo lyaBabiloni Oshinene, ota ka kala e na uuthembahenda wokwaambidhidha aamwahe yaKristus, mboka taya ka adhika natango ye li kombanda yevi. (Mat. 25:34-36, 40) Uuthembahenda mboka wokupangulwa wu li onzi otawu ka hula sho iita yaArmagedon yi li pokutameka, sho oshihupe shaagwayekwa tashi ka pewa ondjambi yasho yomegulu.

Euvoko ndika lya pepalekwa otali tsu omuthindo ohole onene yaJehova nosho wo ohenda ye. Eeno, “ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.” — 2 Pet. 3:9.