Oshihupe shiimaliwa ohashi ka kwathela hoka ku na ompumbwe

Oonzapo dhaJehova ohadhi kwathele aantu pambepo nosho wo palutu, miilongo ya konda po 200. Ihe iilongo owala yi li 35 lwaampono hayi mono oshimaliwa sha gwana momaambidhidho ngoka hayi gandja, shoka tashi vulu okukalela po oofuto adhihe. Mbela oofuto miilongo mbyoka ihaayi mono omayambidhidho ga gwana, ohadhi futwa ngiini?

Olutuwiliki lwOonzapo dhaJehova ohalu tala kutya aamwatate naamwameme muuyuni oya pumbwa shike, opo ya tsikile okulongela Jehova nosho wo niilonga yokuuvitha. Uuna oshimaliwa she ya po ohashi kwatwa nokulongithwa nawa. Ngele oshitayimbelewa osha tuminwa oshimaliwa e tapu hupu sha, nena oshihupe ohashi tumwa kiilongo mbyoka ya pumbwa omakwatho. Kungawo, Olutuwiliki otalu landula oshiholelwa shAakriste yopetameko mboka ya li haya kwatelathana, opo ayehe ya kale ye na iinima yi “thike pamwe.” (2 Aakorinto 8:14) Aakriste mboka oya li haya longitha oshimaliwa shoka tashi hupu po, ya kwathele Aakriste ooyakwawo mboka ye na ompumbwe.

Aamwatate ohaya kala yu uvite ngiini, uuna ya tuminwa oshimaliwa okuza kiitayimbelewa yilwe? Ohaya kala ya nyanyukwa. Pashiholelwa, moTanzania, etata lyaakalimo yamo ohaya hupu moshimaliwa shi li meni N$ 36.00 mesiku. Oya li ya tuminwa oshimaliwa yo opaleke Oshinyanga shUukwaniilwa, shegongalo lyaMafinga. Aamwatate megongalo ndyoka oya nyola ya ti: “Sho Oshinyanga sha opalekululwa, aantu oyendji oya kala haya gongala. Otwa pandula ehangano lyaJehova nosho wo aamwatate muuyuni awuhe, sho ye tu pe oshimaliwa tu opaleke Oshinyanga shetu, natse tu kale hatu gongalele mehala ewanawa.”

Omolwoshivu sho-Corona, aamwatate yamwe moSri Lanka otaya hupu shokadhila. Yamwe yomuyo, omumwameme Imara Fernando nomwanamati Enosh. Ihe omolwiikwatha okuza kiilongo yilwe, oya vula okumona iipumbiwa yesiku kehe. Oya nyola mokakalata hoka ya ninga yo yene ya ti: “Otwa pandula aamwatate mboka haye tu ulukile ohole pethimbo ndika edhigu. Otwa nyanyukwa sho tu li Oonzapo, notatu galikana Jehova, opo a tsikile nokukwathela aamwatate ayehe momasiku ngaka gahugunina.”

Omitima dhaamwatate naamwameme ohadhi ya inyengitha ya gandje omayambidhidho kutya nduno oye li peni muuyuni. Pashiholelwa, Enosh naye oku na okandooha ke, moka ha tula omayambidhidho omashona, opo a kwathele mboka ye na ompumbwe. Omumwameme Guadalupe Álvarez, ngoka ha kala moMeksiko, naye oha kamutuluka mokugandja nehala ewanawa. Moshilongo moka aantu oyendji ohaya mono owala uushakashaka, yo yamwe ohaya mono ngaa shi li hwepo. Mbela Omumwameme Guadalupe oha gandja ngaa omayambidhidho? Eeno, oha gandja shi thike pokuvula kwe. Okwa nyola a ti: “Onda pandula Jehova omolwohole nuuwanawa we. Ondi shi kutya omayambidhidho gandje otaga ka gwedhwa kwaangoka aamwatate haya gandja, notaga ka kwathela mboka ye li mompumbwe.”

Aamwatate miitayimbelewa mbyoka hayi tumu iimaliwa kiitopolwa hoka ku na ompumbwe ohaya kala yu uvite ngiini? Ohaya kala ya nyanyukwa sho taye shi ningi. Omumwatate Anthony Carvalho, ngoka e li oshilyo shOkomitiye yOshitayimbelewa shaBrazilia okwa ti: “Otwa kala twa pumbwa omakwatho okuza kiilongo yilwe, opo iilonga moshilongo shetu yi pule komeho. Omolwomakwatho ngoka twa pewa, iilonga moshilongo shetu oya humu komeho shimwe to nyengwa. Ngashingeyi onkalo yetu yuuhupilo oya lunduluka, natse otatu vulu okukwathela yalwe. Aamwatate ohaya tala kiilonga yokuuvitha muuyuni auhe, opo ya mone kutya omaiyambo geni taya vulu okuninga po ya kwathele.”

Oonzapo dhaJehova otadhi vulu ngiini okwaambidhidha aamwahe mboka ye li mompumbwe? Mbela odhi na oku ya tumina oshimaliwa koomuma? Aawe. Ohadhi tula owala oshimaliwa mokaketha kiilonga yomuuyuni awuhe, hoka ke li megongalo lyadho nenge dhi gandje omayambidhidho tadhi longitha epandja ko-donate.jw.org. Omayambidhidho agehe ngoka otaga pandulwa.