Jakob Ta Yi kuHaran

OWA tseya kutya aalumentu mbaka taa popi naJakob oyo oolye? Konima yolweendo lwomasiku ogendji, Jakob okwa tsakanene nayo pomuthima. Oya li taa tonatele oonzi dhawo. Jakob okwa pula: ‘One oyapeni?’

‘OyokuHaran,’ osho yo ya ti.

‘Omwa tseya Laban?’ Jakob a pula.

‘Eeno,’ osho yo ya yamukula. ‘Tala, huka otaku zi omwanakadhona Rakel noshigunda she shoonzi.’ Oto vulu mbela okumona Rakel te ya ta zi kokule hwiya?

Sho Jakob a mono Rakel noonzi dhahekulu Laban, okwa yi nokwa galangatitha po emanya pomuthima opo oonzi dhi vule okunwa. Opo nduno Jakob ta thipi Rakel komilungu nokwe mu lombwele kutya oye lye. Okwa li a kumwa noonkondo nokwa yi kegumbo nokwa hokololele he Laban.

Laban okwa li a nyanyukwa noonkondo okukala e na Jakob e li pamwe naye. Naashono Jakob a pula a hokane naRakel, Laban okwa li a nyanyukwa. Nonando ongaaka, ye okwa pula Jakob a longe mepya lye oomvula heyali molwaRakel. Molwashoka ye okwa li e hole Rakel unene ngaaka, Jakob osho a ningi. Ihe owa tseya tuu sho sha ningwa po sho ethimbo lyokuhokana lya thikana?

Laban okwa gandja omwanakadhona gwe osheeli Lea kuJakob pehala lyaRakel. Sho Jakob a zimine okulongela Laban oomvula oonkwawo heyali, Laban okwa gandja wo Rakel kuye oye omukiintu gwe. Pethimbo ndyono Kalunga okwa li a pitika aalumentu ya kale ye na aakiintu oyendji ye vulithe pugumwe. Ihe ngashingeyi, ngaashi Ombimbeli tayi holola, omulumentu e na okukala e na omukiintu gumwe owala.