Etegameno Lini kOonakusa Aaholike?

‘Omuntu nge ta si, ota ka yumuka ishewe e na omwenyo?’ osho omulumentu Job a pula nale. (Job 14:14) Ngiika nangoye wo, owa kala nokudhiladhila kombinga yaashika. Oto kala wu uvite ngiini uuna wa tseya kutya etsakaneno ishewe naaholike yoye otali ka vulika huka kombanda yevi kohi yoonkalo dho opalelela?

Eeno, Ombimbeli otayi uvaneke: “Oonakusa yoye taa ningi aanamwenyo, nomidhimba . . . tadhi yumuka.” NOmbimbeli otayi ti wo: “Aayuki oyo otaa ka thigulula [evi] e taa kala mo aluhe.”—Jesaja 26:19; Epsalmi 37:29, faathanitha New World Translation.

Okukala tu na einekelo lyolela momauvaneko ga tya ngawo, otwa pumbwa tu yamukule omapulo gamwe gopekota: Omolwashike aantu haa si? Oonakusa oye li peni? Nongiini tatu vulu okukala tu na uushili kutya otaa ka kala aanamwenyo ishewe?

Eso, Naashono Hashi Ningwa po Uuna Tatu Si

Ombimbeli otayi shi yelitha nawa kutya kasha li ompangela yaKalunga yopetameko kutya aantu oya li ye na okusa. Ye okwa shiti aantu yaali yotango, Adam naEva, e te ya tula moparadisa yokevi yedhina Eden, e te ya lombwele ya kale ye na aanona noya taandelithe egumbo lyawo lyOparadisa nevi alihe. Oya li ye na okusa owala ngele oya kala nokwaavulika komalombwelo ge.—Genesis 1:28; 2:15-17.

Mokwaa na olupandu kuuwanawa waKalunga, Adam naEva oya kala nokwaavulika noya li ya futithwa egeelo ndyoka lya tulwa po. ‘To ka shunina mevi,’ Kalunga a lombwele Adam, ‘we li fulwa mo, oshoka ongoye evi noto ka shituka evi.’ (Genesis 3:19) Komeho yeshito lye Adam kali po; ye okwa li ontsi. Nomolwokwaavulika kwe, nenge molwondjo, Adam okwa tokolelwa okushuna montsi, monkalo yokwaakala po we.

Pashilanduliko, eso otashi ti uukwaahepo womwenyo. Ombimbeli otayi thaneke eyooloko tali landula: “Ondjambi yuulunde oyo eso, ihe omaganohenda gaKalunga ogo omwenyo gwaaluhe.” (Aaroma 6:23) Okuulika kutya eso onkalo yokwaa shi po sha nandonando, Ombimbeli otayi ti: “Aanamwenyo oye na owino, oyo ye na okusa po, ihe oonakusa kaye shi sha.” (Omuuvithi 9:5) Ombimbeli otayi fatulula shoka hashi ningwa po uuna omuntu ta si: “Omufudho gwe nge wa zi mo, ota shuna mevi; olyo tuu esiku omadhiladhilo ge agehe ga hulu po.”—Epsalmi 146:3, 4.

Ihe omolwashike tse atuhe hatu si, omanga Adam naEva oyo ayeke inaa vulika kelombwelo ndyoka muEden? Oshoka tse atuhe otwa valwa konima yokwaavulika kwaAdam, nosho ngeyi atuhe twa thigulula uulunde neso okuza kuye. Ngaashi Ombimbeli tayi fatulula: “Uulunde wa etwa muuyuni komuntu gumwe [Adam], neso okuulunde, nosho eso lyi ikuna naantu ayehe.”—Aaroma 5:12; Job 14:4.

Ihe yamwe otashi vulika ya ka pule: ‘Aantu kaye na ano omwenyo ihaagu si hagu kala po konima yeso?’ Oyendji oya longa shika, notaa ti nokuli eso osheelo shokuya konkalamwenyo yi ili. Ihe edhiladhilo ndyoka inali za mOmbimbeli. Oohapu dhaKalunga otadhi longo shila kutya omwenyo ongoye, kutya omwenyo gwoye ongoye shili, nuukwatya woye wopalutu nowopamhepo. (Genesis 2:7; Jeremia 2:34, NW; Omayeletumbulo 2:10) Ombimbeli otayi ti wo: “Omwenyo nguka tagu yono—ogwo gu na okusa.” (Hesekiel 18:4) Kapu na mpoka Ombimbeli tayi longo kutya omuntu oku na omwenyo ihaagu si hagu kala po konima yeso lyolutu.

Nkene Aantu Taa Vulu Okukala Nomwenyo Ishewe

Konima uulunde neso we ya muuyuni, Kalunga okwa holola kutya oya li ompangela ye kutya oonakusa ya galulilwe kuunamwenyo pamukalo gweyumuko. Ano Ombimbeli otayi fatulula: “Abraham . . . a dhiladhila, Kalunga ta vulu okuyumudha [omwana gwe Isaak] nomokusa.” (Aaheberi 11:17-19) Einekelo lyaAbraham kalya li lya tulwa pwi ili, oshoka Ombimbeli otayi ti kOmunankondo: “Ihe oye ke shi Kalunga kaasi, aawe, okaanamwenyo, oshoka ayehe ye na omwenyo muye.”—Lukas 20:37, 38.

Eeno, Kalunga Omunankondo ke na owala oonkondo okuyumudha aantu mboka ye ta hogolola, ye oku na wo ehalo oku shi ninga. Jesus Kristus ye mwene okwa ti: “Inamu shi kuminwa, oshoka ethimbo tali ya, nena ayehe mboka ya kala moombila, otaa uvu ewi lye.”—Johannes 5:28, 29; Iilonga 24:15.

Hakokule konima sho Jesus a popi ngeyi, ye okwa tsakaneke aantu yu uka kefumviko taa zi moshilando Nain shaIsrael. Nakusa omumati omugundjuka okwa li epona lyomuselekadhi. Mokumona oluhodhi lwe olunene, Jesus okwa li e mu uvitile olukeno. Nongeyi, omudhimba okwe gu lombwele: “Omugundjuka, otandi ku lombwele, penduka po.” Omumati nokwa kuutumba, Jesus nokwe mu pe yina.—Lukas 7:11-17.

Ongaashi moshinima shomuselekadhi ngwiyaka, opwa li pu na wo enyanyu enene sho Jesus a talele po egumbo lyaJairus, omukuluntu gwosinagoga yAajuda. Omwanakadhona gwomimvo 12 okwa si. Ihe Jesus sho a thiki pegumbo lyaJairus, ye oku uka komunona nguka nakusa nokwa ti: “Omunona, penduka!” Naye osho a ningi!—Lukas 8:40-56.

Sho pwa piti ethimbo, kuume kaJesus Lasarus okwa si. Sho Jesus a thiki pegumbo lyaLasarus, Lasarus okwa li a sa nale omasiku gane. Nonando omumwayina Martha a li a yemata unene, ye okwa popi mo etegameno lye, ta ti: “Ondi shi shi, ota yumuka meyumuko esiku lyahugunina.” Ihe Jesus okwa yi kombila, okwa lombwele emanya lyi kuthwe po, e ta ithana: “Lasarus, za mo!” Naye osho a ningi!—Johannes 11:11-44.

Ngashingeyi dhiladhila kwaashika: Onkalo yaLasarus oya li ngiini uule womasiku ngono gane a li a sa? Lasarus ina tya sha kombinga yokukala megulu lyelago nenge moheli yuuwehame, shono a li sikulimwe e na okuninga ngele ye a li mo. Aawe, Lasarus okwa li kee shi po sha nandonando meso nokwa li e na okukala ngawo sigo ‘omeyumuko esiku lyahugunina’ ando Jesus ka li e mu galulila kuunamwenyo pethimbo ndyoka.

Odhoshili kutya iikumithalonga mbino yaJesus oya li owala yekwatho lyopokathimbo, oshoka mbono a yumudha oya ka sa natango. Ihe ye okwa gandja uunzapo omimvo 1 900 dha piti po kutya, koonkondo dhaKalunga, aasi shili otaa vulu okukala aanamwenyo ishewe! Niikumithalonga ye Jesus oku ulike kashona shono tashi ka ningwa po kombanda yevi kohi yUukwaniilwa waKalunga.

Uuna Omuholike Ta Si

Uuna omutondi eso ta dhenge, oluhodhi lwoye otalu vulu lu kale olunene, nonando u kale wa tegamena eyumuko. Abraham okwa li e na eitaalo kutya omukulukadhi gwe ota ka kala omunamwenyo ishewe, ihe otatu lesha kutya “Abraham okwe ya mo kwa takuma nokwa lila oosa dhaSara.” (Genesis 23:2) Nongiini kombinga yaJesus? Lasarus sho a si, ye “okwa tukuluka momwenyo gwe nokwa kakama,” nokonima yokathimbo “Jesus nokwa lili.” (Johannes 11:33, 35) Uuna gumwe omuholike gwoye ta si, okulila itaku ulike uunkundi.

Uuna okanona taka si, unene oshidhigu kuyina. Ano Ombimbeli otayi zimine pamwe nuuthigwa uunene yina e uvite. (2 Aakwaniilwa 4:27) Oshi li wo lela oshidhigu kuhe ngu a nika uuthigwa. “Ando ongame nda sile peha lyoye,” Omukwaniilwa Dawid a lili oosa sho omwana Absalom a si.—2 Samuel 19:1.

Ihe oshoka u na einekelo lyolela meyumuko, oluhodhi lwoye italu ka kala lwaa na ehulilo. Ongaashi Ombimbeli tayi ti, ito ka ‘nika uuthigwa ngaambeyaka yalwe yaa na etegelelo.’ (1 Aatessalonika 4:13) Oto ka hedha shila kuKalunga megalikano, nOmbimbeli otayi uvaneke kutya “oye te ku sile oshimpwiyu.”—Epsalmi 55:22, NW.

Kakele kaambyono yi ili ya gandjwa, iitothwamo yOmbimbeli ayihe oya kuthwa mOmbimbeli yOshindonga.