Ontopolwa 22

Nkene Eitaalo Lyashili Li Na Okudhimbululwa

1. Oolye ya longo palongelokalunga lyashili methelemumvo lyotango?

KAPU NA OMALIMBILILO gasha kombinga yaamboka ya longo palongelokalunga lyashili methelemumvo lyotango. Osha li aalanduli yaJesus Kristus. Yo ayehe oya li yehangano limwe lyopakriste. Ongiini nena? Ongiini omuntu to vulu okudhimbulula mboka haa longo palongelokalunga lyashili?

2. Okushike aalongi palongelokalunga lyashili taa vulu okudhimbululwa?

² Jesus okwa yelitha nkene tatu vulu oku shi ninga sho ye a ti: “Otamu ya dhimbulula kiiyimati yawo . . . Osho omuti kehe omwaanawa hagu imi iiyimati iiwanawa, ihe omuti omwinayi hagu imi iiyimati iiwinayi . . . Onkee ano otamu ya dhimbulula kiiyimati yawo.” (Mateus 7:16-20) Iiyimati iiwanawa yini po wa tegelela kutya aagalikani yashili yaKalunga yi ime? Oshike yo ye na ngashingeyi okupopya nokulonga?

YO OTAA YAPULA EDHINA LYAKALUNGA

3, 4. (a) Eindilo lyotango lini po lya ningwa po mOshiholelwagalikano shaJesus? (b) Ongiini Jesus a yapula edhina lyaKalunga?

³ Aagalikani yashili yaKalunga ye na okulonga metsokumwe nOshiholelwagalikano shoka Jesus a longo aalanduli ye. Oshinima shotango shono Jesus a tumbula mulyo, osha li: “Tate yetu megulu. Edhina lyoye nali yapulwe.” (Mateus 6:9) Otashi ti ngiini okuyapula edhina lyaKalunga? Ongiini Jesus e shi ningi?

⁴ Jesus okwa holola nkene ye e shi ningi sho ye a tumbula megalikano kuHe: “Edhina lyoye onde li hololele aantu mboka we ya pe ndje yomuuyuni.” (Johannes 17:6) Eeno, Jesus okwa tseyithile yamwe edhina lyaKalunga, Jehova. Ye ine etha okulongitha edhina ndyoka. Jesus okwa tseya kutya osho ompangela yaHe kutya edhina Lye li na okusimanekwa kombanda yevi alihe. Ye okwa tula po ano oshiholelwa mokuuvitha nomokuyapula edhina ndyoka.—Johannes 12:28; Jesaja 12:4, 5.

5. (a) Ekwatathano lini po li li po pokati komagongalo gopakriste nedhina lyaKalunga? (b) Otu na okuninga shike ngele twa hala okuhupithwa?

⁵ Ombimbeli otayi holola kutya omukalo gwo gwene gwegongalo lyopakriste lyashili ogwa kwatathana nedhina lyaKalunga. Omuyapostoli Petrus okwa yelitha kutya Kalunga “a tameke okulikolela edhina lye oshigwana omaapagani.” (Iilonga 15:14) Oshigwana shashili shaKalunga oshi na ano okutala ko edhina lye kutya eyapuki noku li tseyitha nevi alihe. Dhoshili, omuntu e na okutseya edhina ndyoka okuhupithwa, ngaashi Ombimbeli tayi ti: “Okehe tuu ngoka ta kugile edhina lyOmuwa ekwatho, oye ta hupithwa.”—Aaroma 10:13, 14.

6. (a) Oongeleka apuhe ohadhi yapula ngaa edhina lyaKalunga? (b) Opu na aantu mboka taa hokolola edhina lyaKalunga?

⁶ Oolye ya tala ko nena edhina lyaKalunga kutya eyapuki noku li tseyitha kombanda yevi alihe? Oongeleka apuhe otadhi yanda edhina Jehova. Nayamwe nokuli oye li kutha mo momalundululo gawo gOmbimbeli. Ihe ngele ngoye to popi naashiinda yoye to tumbula Jehova olundji nokulongitha edhina lye, onehangano lini po to dhiladhila taye ke ku dhiladhilile? Opu na owala ongundu yimwe yaantu mboka taa landula shili oshiholelwa shaJesus moshinima shika. Elalakano lyawo enene monkalamwenyo olyo okulongela Kalunga nokuhokolola edhina lye ngaashi naanaa Jesus a ningi. Onkee ano yo oya kutha edhina lyopaManyolo “Oonzapo dhaJehova.”—Jesaja 43:10-12, NW.

YO OTAA UVITHA UUKWANIILWA WAKALUNGA

7. Ongiini Jesus a holola esimano lyUukwaniilwa waKalunga?

⁷ MOshiholelwagalikano shoka Jesus a gandja, ye okwa holola wo esimano lyUukwaniilwa waKalunga. Ye okwa longo aantu okugalikana: “Uukwaniilwa woye nau ye.” (Mateus 6:10, KB) Jesus okwe endulula olundji kutya Uukwaniilwa owo owala ekandulopo lyomaupyakadhi guuntu. Ye naayapostoli ye oye shi ningi mokuuvithila aantu Uukwaniilwa mboka mokweendaenda “niilando nomikunda” “negumbo negumbo.” (Lukas 8:1; Iilonga 5:42, NW; 20:20, NW) Uukwaniilwa waKalunga owa li ekota lyoshilonga shawo sheuvitho noshelongo.

8. Ongiini Jesus a holola shoka sha li tashi ka kala etumwalaka lya simana lyaalanduli ye yashili ‘momasiku omahugunina’ ngaka?

⁸ Ongiini kombinga yethimbo lyetu? Oshike shi li elongo lya simana lyehangano lyaKalunga lyopakriste lyashili? Mehunganeko kombinga ‘yomasiku omahugunina’ ngaka, Jesus okwa ti: “Evaangeli ndika [lyuukwaniilwa] otali ku uvithilwa nuuyuni auhe, li ningile iigwana ayihe ehokololo; notaku ya ihe ehulilo.” (Mateus 24:14, faathanitha KB.) Ano Uukwaniilwa ou na okukala etumwalaka lya simana koshigwana shaKalunga pethimbo lyonena.

9. Oolye tayu uvitha etumwalaka lyUukwaniilwa?

⁹ Ipula ngoye mwene: Ngele omuntu te ya komuyelo gwoye e ta popi nangoye kombinga yUukwaniilwa waKalunga mboka u li etegameno lyashili lyuuntu, onehangano lini po wa li u na okudhiladhilila omuntu ngoka? Iilyo yeitaalo kehe kakele kOonzapo dhaJehova oya popi tuu nale nangoye kombinga yUukwaniilwa waKalunga? Nokuli aantu aashona yowala ya tseya kutya owo oshike! Yo oya mwena kombinga yepangelo lyaKalunga. Ihe epangelo ndyoka olyo onkundana ya simanenena. Omuprofeti Daniel okwa hunganeke kutya Uukwaniilwa mbuka otau ka ‘nyanyagula e tau hulitha po omapangelo gamwe agehe, opo nduno owo owala tau ka pangela evi alihe.’—Daniel 2:44.

ESIMANEKO KOOHAPU DHAKALUNGA

10. Ongiini Jesus a holola esimaneko kOohapu dhaKalunga?

¹⁰ Natango omukalo mugwo omuntu ta vulu okudhimbulula aalongi palongelokalunga lyashili, ogwo etaloko lyawo kombinga yOmbimbeli. Ethimbo kehe Jesus okwa holola esimaneko lyOohapu dhaKalunga. Olundji ye okwe dhi longitha odho oonkondo oonene kombinga yiinima ayihe. (Mateus 4:4, 7, 10; 19:4-6) Jesus okwa holola wo esimaneko lyOmbimbeli mokukala pamalongo gayo. Ye ina dhina nando esiku limwe Ombimbeli. Ihe ye okwa pangula mboka omalongo gawo itaaga tsu kumwe nOmbimbeli naamboka haa kambadhala okukukitha omalongo gOmbimbeli mokuuvitha omadhiladhilo gawo yene.—Markus 7:9-13.

11. Etaloko lini po oongeleka tadhi holola olundji kombinga yOohapu dhaKalunga?

¹¹ Sigo opondondo yini po oongeleka dhUukwakriste tadhi landula oshiholelwa shaKristus moshinima shika? Oye na tuu esimaneko lyomuule kOmbimbeli? Pashiholelwa, aakwambepo yoongeleka oyendji yonena inaa itaala omahokololoningomwa gOmbimbeli ngaashi kombinga yegwilo muulunde lyaAdam, eyelu pethimbo lyaNoa, Jona nohi onene, nagamwe. Yo otaa ti wo kutya omuntu okwa holoka po a zi melunduluko, inaa shitwa kuKalunga shu ukilila. Ngawo otaa tungu esimaneko lyOohapu dhaKalunga? Naawiliki yoongeleka yamwe otaa popi kutya elalathano pondje yondjokana olyu uka, nenge taa ti nokuli omaushenge nenge okuhokana ombanda otayi vulu okukala yi li mondjila. Oto ti kutya otaa kumagidha aantu okulongitha Ombimbeli oyo omupukululi gwawo? Paushili, yo itaa landula nando oshiholelwa shOmwana gwaKalunga noshaayapostoli ye.—Mateus 15:18, 19; Aaroma 1:24-27.

12. (a) Omolwashike egalikano lyoyendji mboka ye na nokuli Ombimbeli itaali hokiwa kuKalunga? (b) Otu na okuninga etokolo lini po ngele aataaguluki yompango owina taa ethiwa okukala iilyo yedhina ewanawa mongeleka yawo?

¹² Opu na iilyo yoongeleka mbyoka yi na Ombimbeli nonokuli hayi yi konakona, ihe omikalo dhonkalamwenyo yawo otadhi holola kutya yo itayi yi longitha. Kaantu ya tya ngawo, Ombimbeli otayi ti: “Oyo otaa ti, ya tseya Kalunga aniwa, ihe miilonga yawo taye mu idhimbike.” (Titus 1:16; 2 Timoteus 3:5) Otashi holola shike ngele iilyo yoongeleka mbyoka tayi umbu oompeko, tayi kolwa nenge tayi longo iinima yimwe yi ili yepuko, tayi pitikwa okukala iilyo yedhina ewanawa mongeleka yawo? Olyo euliko kutya ehangano lyelongelokalunga lyawo inali hokiwa kuKalunga.—1 Aakorinto 5:11-13.

13. Etokolo lya kwata miiti lini po omuntu e na okuninga ngele a mono mo kutya omalongo gongeleka ye itaga tsu kumwe nOmbimbeli?

¹³ Ngele owa konakona oontopolwa dha tetekele dhembo ndika nowa dhiladhila kombinga yootekisti ndhoka dhi li mo, nena owi ilongo okutseya omalongo gopekota gOohapu dhaKalunga. Ihe ongiini ngele omalongo gongeleka yoye itaga tsu kumwe naango gOohapu dhaKalunga? Ano ngoye ou na uupyakadhi wa kwata miiti. Osho uupyakadhi okutokola ngele oto taamba ko uushili wOmbimbeli nenge oto u ekelehi molwomalongo ngoka inaaga za mOmbimbeli. Nokuli, shoka to ningi oshi na okukala shili etokolo lyoye mwene. Ihe ngoye u na okudhiladhila iinima nawa, oshoka etokolo lyoye otali ka guma edhina lyoye puKalunga netegameno lyoye lyomwenyo gwaaluhe moparadisa kombanda yevi.

YA YOOLOKA KO KUUYUNI

14. (a) Oshike shi li natango edhimbululo kelongelokalunga lyashili? (b) Omolwashike sha simana ngawo kutya aagalikani yashili ya gwanithe oshitegelelwa shika?

¹⁴ Natango edhimbululo kwaamboka aalongi palongelokalunga lyashili, olyo ngaashi Jesus a ti kutya “yaa shi yomuuyuni.” (Johannes 17:14) Otashi ti kutya aagalikani yashili oya yooloka ko kuuyuni wa yonuka nokiinima yawo. Jesus Kristus okwa tindi okuninga omupangeli gwopapolitika. (Johannes 6:15) Oto vulu okuuva ko molwashike eyoolokoko kuuyuni lya simana ngawo ngele to dhimbulukwa kutya Ombimbeli otayi ti Satana Ondiaboli oye omupangeli gwuuyuni. (Johannes 12:31; 2 Aakorinto 4:4) Esimano lyoshinima shika olyu ulikwa ishewe meyelithilo lyOmbimbeli: “Ano ngoka a hala okukala kuume kuuyuni, oye ta ningi omuniita naKalunga.”—Jakob 4:4.

15. (a) Oongeleka ndhoka u shi odhi li ngaa ‘dhaa shi dhomuuyuni’ shili? (b) Ou shi elongelokalunga ndyoka tali gwanitha oshitegelelwa shika?

¹⁵ Uushili otau holola kutya oongeleka momudhingoloko gwoye odha taamba ko oshinima shika komutima? Aakwambepo osho wo iilyo yaakwanegongalo oye li po “yaa shi yomuuyuni” shili? Nenge oya ningina mo thilu miinima yuuyuni yuukwashigwana, yopolitika noyoongundu tadhi kondjithathana? Kashi shi oshidhigu okuyamukula omapulo ngaka, oshoka iilonga yoongeleka oya tseyika apuhe. Kombinga onkwawo, oshi li wo oshipu okulandula iilonga yOonzapo dhaJehova. Ngawo oto ka mona kutya yo otaa landula shili oshiholelwa shaKristus noshaalanduli ye yotango mokuyooloka ko kuuyuni, kiinima yawo yopolitika nokomikalo dhawo dhokwiihola mwene, dhoonyata nodhekuni.—1 Johannes 2:15-17.

YE HOLATHANE

16. Omukalo gwa simana unene guni po mugwo aalongwa yashili yaKristus taa vulu okudhimbululwa?

¹⁶ Omukalo gumwe gwa simana unene mugwo aalongwa yashili yaKristus taa vulu okudhimbululwa, ogwo ohole ndjoka yo ye holathane. Jesus okwa ti: “Opo mpoka ayehe taye mú dhimbulula, one aalongwa yandje, ngele mu holathane.” (Johannes 13:35) Oongeleka ndhoka u shi, odhi na tuu ohole ndjika? Pashiholelwa, uuna oshilongo moka yo ye li tashi yi miita, ohaa ningi ngiini?

17. Omahangano gomalongelokalunga niilyo yago otaga gwanitha tuu oshitegelelwa shika okuhololelathana ohole?

¹⁷ Ou shi shi shoka olundji hashi ningwa po. Kelombwelo lyaalumentu yuuyuni, iilyo yomahangano gomalongelokalunga gi ili nogi ili ohayi kutha iilwitho e tayi dhimi po ooitaali ooyakwawo yoshilongo shilwe shi ili. Omukatolika ota dhipaga Omukatolika, Omuprotestande ota dhipaga Omuprotestande nOmumoslema ota dhipaga Omumoslema. Ngoye oto dhiladhila kutya iilonga ya tya ngaaka otayi tsu kumwe nOohapu dhaKalunga notayi holola shili ombepo yaKalunga?—1 Johannes 3:10-12.

18. Ongiini Oonzapo dhaJehova hadhi longo ngele tapu yiwa koshinima shokuhololelathana ohole?

¹⁸ Oonzapo dhaJehova ohadhi longo ngiini ngele tapu yiwa koshinima shokuhololelathana ohole? Dho ihadhi landula ondjila yomaitaalo guuyuni. Ihadhi dhimi po ooitaali ooyakwawo komahala gomalugodhi. Kadhi na ondjo okufundjaleka mokutya: “Ngame ondi hole Kalunga” omanga dho tadhi tondo omumwahe gwoshigwana shimwe, gwomuhoko gumwe nenge gwoludhi lwi ili. (1 Johannes 4:20, 21) Ihe dho ohadhi ulike wo ohole pamikalo dhilwe dhi ili. Ngiini? Omomukalo ngoka dho hadhi yakula ooyakwawo nomoonkambadhala dhohole onene okukwatha yalwe yi ilonge kombinga yaKalunga.—Aagalati 6:10.

ELONGELOKALUNGA LIMWE LYASHILI

19. Omolwashike shopandunge osho wo shopaManyolo kutya opu na owala elongelokalunga limwe lyashili?

¹⁹ Oshi li shopandunge kutya ku kale owala elongelokalunga limwe lyashili. Shika otashi tsu kumwe noshili kutya Kalunga kashili “ke shi Kalunga kevundakano, aawe, okombili.” (1 Aakorinto 14:33) Ombimbeli otayi ti lelalela oku na owala “eitaalo limwe.” (Aaefeso 4:5) Oolye ano taa ningi nena olutu lwaagalikani yashili?

20. (a) Pauyelele wuunzapo, oolye taa ulikwa kembo ndika oyo aagalikani yashili yonena? (b) Owe shi itaala wo? (c) Omukalo gwo opala unene guni po okwiilonga okutseya nawa Oonzapo dhaJehova?

²⁰ Itatu kakadhala okutya oyo Oonzapo dhaJehova. Mokwiishilipaleka ngoye mwene mwaashika, otatu ku hiya okwiilonga oku ya tseya nawa. Omukalo gwo opala unene oku shi ninga, omokukala po pokugongala kwawo mOshinyanga shUukwaniilwa shOonzapo dhaJehova. Oshoka Ombimbeli otayi holola kutya okulonga palongelokalunga lyashili otaku eta ombili onene ngashingeyi notaku egulula ondjila sigo omomwenyo gwaaluhe moparadisa kombanda yevi, ano otashi ka kala shi na ondilo onene kungoye oku shi konakona. (Deuteronomium 30:19, 20) Otatu ku hiya nomutima aguhe u shi ninge. Itula mo nombili ngashingeyi mekonakono.

[Picture on page 185]

Onalye aantu taye ku dhiladhilile ngele to popi nagumwe kombinga yaJehova nUukwaniilwa we?

[Pictures on page 186]

Omuntu oku na ngaa esimaneko kOohapu dhaKalunga ngele ita kala padho?

[Picture on page 188, 189]

Jesus okwa tindi okuninga omupangeli gwopapolitika

[Picture on page 190]

Otatu ku hiya nomutima aguhe okukala po pokugongala kwOonzapo dhaJehova