Oombepo Kadha Li nOmwenyo Kombanda yEvi E Tadhi Si
Oombepo oko dhi li! Moshilongo shoombepo ihaashi monika omu na oombepo oombwanawa noombwinayi. Mbela odho aantu mboka ya li nomwenyo kombanda yevi e taa si?
Aawe, hasho. Ngele omuntu a si, iha yi moshilongo shoombepo, ngaashi aantu oyendji haa dhiladhila. Otu shi shi ngiini mbela? Omolwashoka Ombimbeli osho tayi ti. Ombimbeli oyo embo lyoshili ndyoka lya za kuKalunga gumwe awike kashili, edhina lye Jehova. Jehova okwa shiti aantu; ye oku shi nawa shoka hashi ningwa po ngele taa si.—Eksodus 15:2, 3; 2 Timoteus 3:16.
Adam okwa za montsi yevi nokwa shuna montsi yevi
Ombimbeli otayi ti kutya Kalunga oku umbile Adam, omuntu gwotango, ‘mevi lyomevi.’ (Genesis 2:7) Kalunga okwe mu tula mOparadisa, oshikunino shaEden. Ando Adam okwa vulikile kompango yaJehova, andola ina sa; ando okwa kala nomwenyo kombanda yevi sigo onena. Ihe sho Adam a yono ompango yaKalunga owina, Kalunga okwa ti kuye: ‘Oto ka shuna mevi, we li fulwa mo, oshoka ongoye evi noto ka shituka evi.’—Genesis 3:19.
Shika otashi ti mbela ngiini? Adam okwa li peni mbela manga Jehova inee mu shita montsi yevi? Ke na mpoka a li. Ka li ombepo megulu ndjoka inaayi valwa. Ka li po. Ano sho Jehova a ti kutya Adam okwa li e na ‘okushuna mevi,’ ye okwa li a hala okutya Adam okwa li ta ka sa. Ina taagulukila moshilongo shoombepo. Peso, Adam okwa kala ishewe kee na omwenyo, kee po. Eso olyo okwaakala po kwomwenyo.
Ihe ongiini mbela kombinga yayalwe mboka ya sa? Nayo oye li wo mbela mokwaakala po? Ombimbeli otayi yamukula:
“Ayihe [aantu niinamwenyo] otayi yi kehala limwe. Ayihe oya za montsi yevi, naayihe otayi galukile montsi yevi.”—Omuuvithi 3:20, OB-1986.
“Oonakusa kaye shi sha.”—Omuuvithi 9:5.
“Okuhola kwawo nokutonda kwawo nuulaadhi wawo wa henuka po nale.”—Omuuvithi 9:6.
“Kamu na we oshilonga nenge owino nenge oondunge omuusi, to ka ya mo.”—Omuuvithi 9:10.
“[Omuntu] ota shuna mevi; olyo tuu esiku omadhiladhilo ge agehe ga hulu po.”—Epsalmi 146:4.
Aanamwenyo oyo owala taya vulu okulonga iilonga ya tya ngaaka
Ou wete mbela oshidhigu okuuva ko omishangwa ndhika? Ngele osho, dhiladhila kwaashino: Momaukwanegumbo ogendji, omusamane oha longele iimaliwa opo a sile oshimpwiyu egumbo lye. Ngele omusamane a si, olwindji uukwanegumbo we ohau mono iihuna. Nokuli omathimbo gamwe omukulukadhi naanona ihaya kala ye na iimaliwa ya gwana okulanda iikulya. Otashi vulika aatondi yomusamane haye ya ningi nayi. Ngashingeyi ipula nduno ngoye mwene: ‘Ngele omusamane ngoka oku na omwenyo moshilongo shoombepo, omolwashike itaa tsikile nokukwathela uukwanegumbo we? Omolwashike itaa gamene uukwanegumbo we kaantu aawinayi?’ Omolwashoka omishangwa odhi li mondjila. Omusamane ngoka ke na omwenyo, ita vulu okuninga sha.—Epsalmi 115:17.
Oonakusa itaya vulu okukwathela mboka ya sa ondjala noku ya gamena kaaya monithwe iihuna
Mbela shika otashi ti kutya oonakusa itaa ka galukila we momwenyo nandonando? Aawe, hasho. Otatu ka popya nale kombinga yeyumuko. Ihe shino otashi ti kutya oonakusa kaye shi shono to ningi. Itaya vulu oku ku mona, oku ku uva, nenge ya popye nangoye. Inashi pumbiwa u ya tile. Itaya vulu oku ku kwatha, noitaya vulu oku ku etela oshiponga.—Omuuvithi 9:4; Jesaja 26:14, NW.