Onakuyiwa Onkumithi

Satana noompwidhuli dhe itaya ka kala we ethimbo ele nokupukitha aantu. Jehova okwe yu umba mo nale megulu. (Ehololo 12:9) Monakuyiwa yi li popepi, Kalunga ota ka katukila ishewe Satana noompwidhuli dhe onkatu. Memoniko lya za kuKalunga, omuyapostoli Johannes okwa ti: “Ongame nda mono omuyengeli ta zi megulu, e na oshipatululo sholumbogo nelyenge enene moshikaha she. Oye nokwa kwata oshikoko, eyoka ndiyaka ekulu, oondyoka ondiaboli naSatana, nokwe mu manga, a kale mo omimvo dheyuvi limwe, okwe mu umbile molumbogo nokwe lu edhilile nokutula po oshihako kombanda ye, kaa hongolole we iigwana, sigo omimvo ndhoka dheyuvi tadhi hulu po.” (Ehololo 20:1-3) Hugunina, Ondiaboli noompwidhuli dhayo otaya ka hanagulwa po sigo aluhe.—Ehololo 20:10.

Aantu aawinayi kombanda yevi nayo otaya ka hulithwa po.—Epsalmi 37:9, 10; Lukas 13:5.

Oonakusa Otaya Ka Kala Ishewe nOmwenyo!

Konima ngele Satana noompwidhuli dhe ya hulithwa po, Jehova ote ke etela aantu omalaleko nuuyamba ogendji. Dhimbulukwa kutya oonakusa kaye na omwenyo nokaye po. Jesus okwa faathanitha eso nokukotha—oomposi oondhigu nopwaahe na okuyaguma. (Johannes 11:11-14) Okwe shi popi molwashoka okwa tseya kutya ethimbo otali ke ya sho mboka ya kotha meso taya ka penduthwa ya kale nomwenyo. Okwa ti: “Ethimbo tali ya, nena ayehe mboka ya kala moombila, otaa . . . holoka mo.”—Johannes 5:28, 29; faathanitha Iilonga 24:15.

Otaya ka yumuka ya kale nomwenyo huka kombanda yevi. Pehala lyomatseyitho kutya aantu oya sa, omahokololo omanyanyudhi otaga ka hokololelwa mboka ya yumudhwa! Itashi ka kala tuu enyanyu okuhambelela aaholike yetu okuza moombila!