Ehekeleko Kwaamboka Ya Polimana
“Iishitwa ayihe hayi fudhagana mumwe noyi na etheto lyokuvala sigo [ongashingeyi].” (Aaroma 8:22) Sho shika sha nyolwa oomvula 1 900 dha piti, okumona iihuna kwaantu okwa li okunene. Aantu oyendji oya li ya polimana. Omolwashoka Aakriste ya kumagidhwa: “Tseni omukumo mboka ya polimana.”—1 Aatessalonika 5:14, NW.
Nokuli uudhigu waantu nena uunene noonkondo, naantu oyendji ye vulithe shito oya polimana. Ihe shino oshi na mbela oku tu kumitha? Hasho nando, oshoka Ombimbeli otayi popi ethimbo ndika olyo “omasiku omahugunina” notayi li ithana “omathimbo omadhigu.” (2 Timoteus 3:1-5) Jesus Kristus okwa hunganeke kutya pomasiku gahugunina, “aantu yokombanda yevi [otaa ka kala] ye na ethininiko” na “aantu notaa [ka sa] ehaluko mokutila nomokutegelela mbyoka tayi ka adha evi alihe.”—Lukas 21:7-11, 25-27; Mateus 24:3-14.
Ngele aantu taa kala ethimbo ele ye na oshimpwiyu, ya tila, ya nika oluhodhi nenge ye na omaiyuvo galwe ga tya ngaaka omawinayi, olundji ohaya kala ya polimana. Okupolimana nenge okunika oluhodhi olunene otaku vulu okweetwa keso lyomuholike, ehengathano, ekanitho lyiilonga nenge omukithi ihaagu kodha. Aantu ohaa kala wo ya polimana ngele taa pendutha omadhiladhilo kutya yo kaye na oshilonga shasha, ngele ye uvite kutya itaa vulu sha noinaya ninga shoka yalwe ya li ya tegelela ye ya ningile. Kehe gumwe ota vulu okulamininwa po konkalo yuupyakadhi, ihe ngele gumwe ta pendutha omadhiladhilo gokwaahe na etegameno noita vulu okumona nkene e na okuza monkalo ombwinayi, otashi vulu okukala noshizemo shokugwa omapoli ga kwata miiti.
Methimbo lyonale aantu oya li ye na omaiyuvo ogo tuu ngoka. Job okwa hepekwa ye mwene komukithi nokoshiponga. Okwa li ta dhiladhila kutya Kalunga okwe mu thiga po, onkene a ti kutya omwenyo gwe ogwi itonditha okukala kwe. (Job 10:1; 29:2, 4, 5) Osha yela kutya Jakob okwa li a polimana sho a dhiladhila kutya omwanamati gwe okwa sa; okwa li inaa hala okuhupuluthwa nokwa li a hala okusa. (Genesis 37:33-35) Omukwaniilwa David okwa li e uvite e na ondjo yi na ko nasha nokuyona kwe kwa kwata miiti nokwa lili: “Omutenya aguhe [tandi] ende nda nika uuthigwa . . . Ongame nda loloka.”—Epsalmi 38:7, 9; 2 Aakorinto 7:5, 6.
Nena aantu oyendji oya polimana molwokwiivulitha yo yene mokukambadhala okulandula elandulathano ewinayi lyesiku kehe ndyoka li vule oonkondo dhawo dhopandunge, dhopamaiyuvo nodhopanyama. Osha yela kutya omaupyakadhi, pamwe nomadhiladhilo nomaiyuvo omawinayi, otayi vulu okuguma olutu notayi eta elunduluko ewinayi shi na ko nasha noochemi muuluyi, naashika otashi eta okupolimana.—Faathanitha Omayeletumbulo 14:30.
Ekwatho Ndyoka Ya Pumbwa
Epafroditus, Omukriste gwomethelemimvo lyotango gwokuFilippi, okwa li e na “omwenyo gwa ziyalala; sho [ookuume ke ye] mu kundana, a adhika kuuvu.” Epafroditus ngoka a adhika kuuvu konima sho ookuume ke ye mu tumu kuRoma nomakwatho gomuyapostoli Paulus, otashi vulika a li e uvite kutya ookuume ke ine ya ningila shoka ya li ya tegelela e ya ningile noye mu tala ko itaa vulu sha. (Aafilippi 2:25-27; 4:18) Omuyapostoli Paulus okwe mu kwathele ngiini?
Okwa tumu Epafroditus kegumbo pamwe nontumwafo yookuume ke Aafilippi ndjoka ya ti: “Taambeni ano [Epafroditus] mOmuwa nenyanyu alihe; naantu ngaamboka ya simanekeni.” (Aafilippi 2:28-30) Kutya Paulus okwe mu popi noku mu tumbaleka noonkondo nonokutya Aafilippi oye mu taamba ko nomutima aguhe nonohole, osha hekeleke shili Epafroditus nosha talaleke okugwa omapoli kwe.
Kapu na omalimbililo kutya ekumagidho lyOmbimbeli ‘okutsa mboka ya polimana omukumo’ ewanawa noonkondo. “Owa hala okutseya kutya yalwe oye na ko nasha nangoye mwene,” omukiintu ngoka ta hepekwa kokupolimana osho a ti. “Owa hala okuuva gumwe ta ti: ‘Ondi uvite ko; oto ka kala u li nawa.’”
Ngoka a polimana, olundji oye e na okuya ye mwene komuntu ngoka e na ohenda noku mu lombwela shoka tashi mu polimanitha. Omuntu nguka oku na okukala omupulakeni omwaanawa noku na eidhidhimiko olindji. Ke na okuganda ngoka a polimana nenge okupopya oohapu tadhi mu pangula, ngaashi okutya: ‘Ku na okukala ngawo,’ nenge: ‘Iikala mbyoka u na oya puka.’ Omaiyuvo gomuntu a polimana omankundi nomagandjo guusama ga tya ngaaka otage ke mu ningitha owala a kale i iyuvitile nayi unene shi vulithe nale.
Ngoka a polimana otashi vulika a kale e uvite kee na oshilonga shasha. (Jona 4:3) Ihe omuntu ou na okudhimbulukwa kutya shoka sha simana osho nkene Kalunga te ku dhiladhila. Aantu oya li ya tala ko Jesus Kristus “a fa oshinima showala,” ihe shika inashi lundulula ongushu ye yashili koshipala shaKalunga. (Jesaja 53:3) Kala nuushili kutya Kalunga oku ku hole wo, ngaashi naanaa e hole Omwana gwe omuholike.—Johannes 3:16.
Jesus okwa li e uvitile ohenda mboka ye li muudhigu nokwa kambadhala oku ya kwathela ya mone kutya uuntu wawo ou na oshilonga. (Mateus 9:36; 11:28-30; 14:14) Okwa yelitha kutya nokuli omatendenguti omashona gaa na oshilonga shasha, kuKalunga oge na oshilonga. “Kalunga ina dhimbwa nando olimwe lyomugo,” osho ye a ti. Aantu mboka haa kambadhala okulonga ehalo lye kaye na tuu oshilonga noonkondo kuye! Shi na ko nasha nayo Jesus okwa ti: “Nomafufu geni gokomutse oga yalulwa agehe.”—Lukas 12:6, 7.
Dhoshili, otashi vulika ngoka a polimana noonkondo, a gwilililwa po kuunkundi we nokomayono ge, shi li oshidhigu kuye okwiitaala kutya ye oku na oshilonga oshinene koshipala shaKalunga. Otashi vulika ta kala e uvite shili kutya ohole yaKalunga nesiloshimpwiyu ina gwana oku yi pewa. Oohapu dhaKalunga otadhi ti kutya ‘oomwenyo dhetu ohadhi tu tamaneke.’ Ihe shoka osho mbela tashi ulike kutya inatu gwana oku yi pewa? Aawe, hasho. Kalunga oku shi shi kutya aantu aalunde ohaa vulu okudhiladhila papuko nohayi ipangula nokuli yo yene. Ano Oohapu dhe otadhi ya hekeleke: “Kalunga oye e vule oomwenyo dhetu, niinima ayihe oku yi shi.”—1 Johannes 3:19, 20.
Eeno, Tate yetu gwomegulu omunahole oha mono oshindji shi vulithe poondjo dhetu nomapuko getu. Oku shi oonkalo ndhoka tadhi pupaleke epangulo, noku shi onkalamwenyo yetu ayihe, omainyengotompelo getu nomalalakano getu. Oku shi shi kutya tse otwa thigulula uulunde, uuvu neso nomolwashono tu na omaunkundi ogendji. Kutya tse otwa nika oluhodhi notwi igeyela tse yene, otashi iyulike sho shene kutya katwa li twa hala okuyona nokupuka sha pitilila. Ombimbeli otayi ti kutya tse otwa ‘gandjwa meyonuuko,’ kaaku shi kehalo lyetu yene. Ano Kalunga oku uvitile onkalo yetu ondhigu olukeno noku uvitile ohenda omayono getu noku na ko nasha nago.—Aaroma 5:12; 8:20.
“Omuwa oye omunalukeno nomunesilohenda,” osho twa shilipalekelwa. “Ongaashi uuzilo kokule nuuninginino, osho ta kaleke kokule natse omayonagulo getu. Oshoka oye e tu shi, tu umbwa nashike, e tu dhimbulukwa otse ontsi yevi.” (Epsalmi 103:8, 12, 14) Dhoshili, Jehova oye “Kalunga ketalaleko alihe, oonguka te tu talaleke muudhigu wetu auhe.”—2 Aakorinto 1:3, 4.
Ekwatho ndyoka mboka ya polimana ya pumbwa noonkondo, otaa vulu oku li mona mokuhedha popepi naKalunga kawo omunahenda nokokutaamba ko ehiyo lye ‘yu umbile omutenge gwawo kuye.’ Ye ota vulu shili ‘okutululula omwenyo momutima gwaamboka ya nyanyagulwa.’ (Epsalmi 55:23; Jesaja 57:15) Ano Oohapu dhaKalunga otadhi ladhipike aantu ya galikane sho tadhi ti: “Oshimpwiyu sheni shi . . . tsikeni [Jehova], oshoka oye te mú sile oshimpwiyu.” (1 Petrus 5:7) Eeno, aantu otaa vulu okuhedha kuKalunga okupitila megalikano nomeindilo nokunyanyukilwa “ombili yaKalunga yi vule uunongo auhe.”—Aafilippi 4:6, 7; Epsalmi 16:8, 9.
Omalunduluko taga longo momikalo dhonkalamwenyo yomuntu otaga vulu wo oku mu kwathela a sinde okupolimana. Okwiidheula kwopalutu, okulya iikulya tayi tungu, okumona ombepo ontalala, okuvululukwa sha gwana nokwaahatala oTV sha pitilila oya simana. Omukiintu gumwe okwa kwathele mboka ya li ya polimana moku ya ladhipika ye ke ende. Sho omukiintu ngoka a polimana a ti: “Ngame inandi hala ndi ke ende,” omukiintu okwa popi nombili ihe okwa mana mo a ti: “Eeno, oto yi.” Omukiintu okwa ti: ‘Otwe ende ookilometa hamano. Sho twa galuka, ye okwa li a vulwa, ihe okwa li e uvite hwepo unene. Ito vulu oku shi itaala kutya okwiidheula noonkondo ohaku kwathele manga inoo shi ninga ngoye mwene.’
Ihe oolumwe okusinda thiluthilu okupolimana ihashi vulika, nando ou kambadhale niinima ayihe mwa kwatelwa ekwatho lyopaunamiti. “Onda kambadhala okuninga shaashoka,” omukiintu gwoomvula dhopokati osho a popi, “ihe okupolimana inaku ya.” Ngaashi naanaa okwaaludha aaposi, oombolo nenge iilema methimbo lyongashingeyi olundji ihaaku vulika. Ihe mboka ya polimana otaa vulu okumona ehekeleko netegameno mokulesha aluhe Oohapu dhaKalunga, ndhoka tadhi gandja etegameno lya kola lyokwaaluka komauvu agehe gopantu taku kalelele.—Aaroma 12:12; 15:4.
Uuna Itaapu Ka Kala We Nando Ogumwe A Polimana
Sho Jesus a hokolola iinima iitilithi mbyoka tayi ka ningwa kombanda yevi momasiku gahugunina, okwa gwedha ko: “Mbika nge tayi tameke okuningwa, ikoleleni, ne mu yeluthe omitse dheni, oshoka ehupitho lyeni olya hedha popepi.” (Lukas 21:28) Jesus okwa li ta popi kombinga yehupitho okuya muuyuni uupe waKalunga wuuyuki, moka “iishitwa yo yene tayi ka mangululwa muupika [weyonuuko], yi ye memanguluko lyeadhimo lyaana yaKalunga.”—Aaroma 8:21.
Aantu itaa ka kala tuu ya pepelelwa po sho ya manguluka komitengi dhethimbo lyonale nokupenduka esiku kehe nomadhiladhilo ga yela nawa, noye na ehalo okutameka iilonga yesiku kehe! Itapu ka kala we ngoka ta piyaganekwa kokupolimana. Euvaneko lyoshili kaantu olyo kutya Kalunga “ota theta po omahodhi momeho gawo, neso kali kala we nenge oluhodhi nenge elilagano, nenge uuwehame kau kala mo we, oshoka shiyaka shotango osha hulu po.”—Ehololo 21:3, 4.
Kakele kaambyoka yu ulikwa shimwe shi ili, iitothwa mo ayihe yOmishangwa oya kuthwa mOmbimbeli yOshindonga.