Etegameno lyashili li na ko nasha noonakusa

OMUKIINTU gumwe e na oomvula 25 okwa nyola a ti: “Meme ngoka a putudha ndje okwa sa kokankela mo 1981. Osha li oshidhigu unene kungame nokomumwamememati sho meme a sa. Onda li ndi na oomvula 17, nomumwamememati okwa li e na oomvula 11. Onda li nde mu longola noonkondo. Molwaashoka onda li nda longwa kutya okwa ya megulu, onda li nda hala okwiidhipaga opo ndi ye ndi ka kale puye. Molwaashoka okwa li kuume kandje kopothingo.”

Ano otashi monika kaashi li pauyuuki sho eso li na oonkondo okudhipaga po omuntu ngoka wu hole. Nuuna tashi ningwa, ohashi kala oshidhigu noonkondo okuzimina kutya ito vulu we okupopya nomuholike gwoye ngoka, okuyola nenge okwiipapatela naye. Eyeme ndyoka ihali kuthwa po kokulombwelwa kutya omuholike gwoye okwa ya megulu.

Ihe Ombiimbeli otayi gandja etegameno lyi ili lela. Ngaashi twe shi mona nale, Omanyolo otagu ulike kutya otashi wapa okukala ishewe pamwe nanakusa gwoye omuholike monakuyiwa yi li popepi, hamegulu kaali shiwike, ihe oohuno kombanda yevi moonkalo dhombili nodhi li pauyuuki. Pethimbo ndyoka aantu otaya ka kala ye na etegameno lyokukala nuukolele wa gwanenena nolyokukala itaaya si we. Ihe yamwe otashi vulika taya ti: ‘Shika itashi wapa nando!’

Mbela oshike wa pumbwa opo shi ku itaalithe kutya etegameno ndika olyoshili? Opo wu itaale euvaneko lyontumba, owa pumbwa okukala nuushili kutya ngoka e li ninga oku na ehalo oku li gwanitha nota vulu oku shi ninga. Olye ano u uvaneka kutya oonakusa otaya ka kala ishewe nomwenyo?

Petameko lyomumvo 31 E.N., Jesus Kristus okwa li u uvaneke nuulaadhi a ti: “Ngashika naanaa He ta yumudha aasi nota gandja omwenyo, osho wo Omwana ota gandja omwenyo kumboka a hala. Inamu kuminwa oshinima shika; oshoka ethimbo otali ya, uuna oonakusa ayehe mboka ye li moombila, taa ka uva ewi lyandje [sha hala okutya, lyaJesus]. Oyo notaa ka za mo.” (Johannes 5:21, 28, 29) Ano Jesus Kristus oye u uvaneka kutya aantu omamiliyona mboka taya si ngashingeyi otaya ka kala ishewe nomwenyo kombanda yevi ndika notaya ka kala ye na etegameno okukala ko sigo aluhe moonkalo dhombili moparadisa. (Lukas 23:43; Johannes 3:16; 17:3; yelekanitha Episalomi 37:29 naMateus 5:5.) Molwaashoka Jesus oye a ninga euvaneko ndyoka, otatu vulu wo okuzimina kutya oku na ehalo oku li gwanitha. Ihe ote shi vulu ngaa mbela?

Konyala oomvula mbali konima yokuninga euvaneko ndyoka, Jesus okwa li u ulike momukalo gu na oshilonga kutya ye oku na ehalo okuyumudha aantu nosho wo kutya ota vulu oku shi ninga.

“Lasarus, za mo!”

Osha li lela oshiningwanima tashi gumu omutima gwomuntu. Lasarus okwa li te ehamenene. Aamwayina yaali aakiintu, Maria naMarta, oya li ya tumine Jesus etumwalaka ngoka a li ta taaguluka omulonga gwaJordan tali ti: “Omuwa, kuume koye omuholike ota alukwa.” (Johannes 11:3) Oya li ye shi kutya Jesus oku hole Lasarus. Mbela Jesus ka li ta ka kala a hala okutalela po kuume ke ngoka te ehama? Tashi kumitha, pehala lyokuya nziyanziya kuBetania, Jesus okwa li a kala natango omasiku gaali pehala mpoka a adhika.—Johannes 11:5, 6.

Lasarus okwa si owala konima sho etumwalaka kutya ote ehama lya tumwa. Jesus okwa li a tseya kutya uunake Lasarus a si nokwa li e na edhiladhilo okuninga po sha. Sho lwahugunina Jesus a thiki kuBetania, okwa adha kuume ke omuholike a ninga omasiku gane a sa. (Johannes 11:17, 39) Mbela Jesus okwa li ta vulu okuyumudha omuntu a kala a sa uule wethimbo li thike mpoka?

Sho Marta, omukiintu omunandjungu u uvu kutya Jesus okwe ya, okwa yi e ke mu tsakaneke. (Yelekanitha Lukas 10:38-42.) Jesus okwa li a gumwa koluhodhi lwe e te mu shilipaleke ta ti: “Omumwanyoko ota ka yumuka.” Sho Marta u ulike kutya okwi itaala eyumuko lyomonakuyiwa, Jesus okwe mu lombwele sha yela ta ti: “Ongame eyumuko nomwenyo. Oongoka i itaala ndje, ota kala e na omwenyo, nando ona se.”—Johannes 11:20-25.

Sho ya thiki pombila, Jesus okwe ya lombwele ya kuthe po emanya ndyoka lye edhila po. Opo nduno konima yokugalikana mokule, okwa ti: “Lasarus, za mo!”—Johannes 11:38-43.

Ayehe mboka ya li po oya li taya tala nawa mombila. Opo nduno omwa zi omuntu. Oompadhi dhe nomaako ge oya li ya mangwa nomalapi, noshipala she osha li sha mangwa nonasituke. Jesus okwe ya lombwele a ti: “Mu mangululeni, ne mu mu ethe, a ye.” Iimangitho mbyoka a li a mangwa nayo oya gwile pevi. Oye naanaa Lasarus, omulumentu ngoka a li a ninga uule womasiku gane a sa!—Johannes 11:44.

Mbela shika osha ningwa shili?

Ehokololo lyokuyumuka kwaLasarus ndyoka lya nyolwa mEvaangeli lyaJohannes oli li oshinima sha ningwa shili mondjokonona. Uuyelele walyo owa yela nawa, onkene itali vulu okukala ehokololo lyowala. Ngele omuntu to kala wa limbililwa oshili yalyo, nena owa limbililwa iikumithalonga ayihe yomOmbiimbeli, mwa kwatelwa eyumuko lyaJesus Kristus mwene. Nongele to tindi kutya Jesus okwa yumuka, nena oto idhimbike eitaalo lyopaKriste alihe.—1 Aakorinto 15:13-15.

Dhoshili, ngele owa zimina kutya Kalunga oko e li, nena ku na uupyakadhi wokwaahitaala eyumuko. Oku shi thaneka: Aantu otaya vulu okutala ko-TV omathano gaantu tayi imbi nenge taya popi nonando oya sa nale pwa pita oomvula odhindji. Oomvula ethele dha piti, oshinima sha tya ngaaka osha li ihaashi vulu okudhiladhilwa. Kaantu yamwe mboka ngashingeyi ya kala miitopolwa yokomikandi, uuteknologi wokuulika ko-TV omathano gaantu ya sa nale owu li oshinima itaashi vulu okudhiladhilwa notashi monika sha fa oshikumithalonga. Ngele aantu otaya vulu okulongitha omakotampango gopaunongononi ngoka ga tulwa po kOmushiti opo ya ninge po ethano lya tya ngaaka tali vulu okutalika nokuuvika, mbela Omushiti oye a kale itaa vulu okuninga oshindji shi vule mpoka? Mbela kashi li pandunge kutya Ngoka a shita omwenyo oku na oonkondo oku gu etulula po?

Oshikumithalonga shokuyumudha Lasarus osha koleke eitaalo lyaantu okwiitaala Jesus nosho wo eyumuko. (Johannes 11:41, 42; 12:9-11, 17-19) Otashi ulike wo komukalo tagu gumu omuntu komutima kutya Jehova nOmwana oye na ehalo okuyumudha aantu.

‘Kalunga ota ka kala nokuyuulukwa’

Momukalo moka Jesus a li i inyenge keso lyaLasarus otagu ulike kutya ye e li Omwana gwaKalunga oku na olukeno. Okuuva nayi kwe kombinga yoshinima shika otaku ulike sha yela kutya okwa halelela okuyumudha oonakusa. Otatu lesha taku ti: “Maria sho a thiki kehala ndyoka kwa li Jesus, okwe mu mono nokwa tsu oongolo poompadhi dhe e ta ti kuye: ‘Omuwa, ando owa li po, ando omumwameme ina sa.’ Ano Jesus sho e mu mono ta lili, nosho wo Aajuda mboka ye ya pamwe naye, okwa hendwa komutima noku uvite uudhigu meni lye. Oye okwa pula: ‘Omwe mu fumvike peni?’ Oyo oye mu yamukula: ‘Omuwa, ila u tale.’ Opo Jesus okwa lili. Nena Aajuda oya ti: ‘Tala, nkene kwa li e mu hole.’”—Johannes 11:32-36.

Olukeno lwaJesus talu zi komutima mpaka olwu ulikwa momautumbulilo gatatu: ‘okuhendwa komutima,’ ‘okuuva uudhigu meni’ nosho wo ‘okulila.’ Oohapu dhomelaka lyopetameko ndhoka dha longithwa okuhokolola oshiningwanima shika tashi gumu omuntu komutima otadhi ulike kutya molwaashoka Jesus okwa li a yematekwa unene keso lyakuume ke Lasarus nokokumona omumwayina gwaLasarus ta lili, naye okwa tameke okulila.a

Shoka oshindhindhilikwedhi osho kutya nale Jesus okwa yumudhile aantu yalwe yaali. Nokwa li a tokola lela oku shi ningila wo Lasarus. (Johannes 11:11, 23, 25) Ihe nonando ongaaka, okwa li a “lili.” Ano kuJesus okuyumudha omuntu kuusi kakwa li oshilonga showala. Olukeno lwe nokukala nohenda kwe mbyoka a li a holola poshiningwanima shika otayi ulike sha yela kutya okwa halelela okuhulitha po uudhigu mboka hawu etwa keso.

Molwaashoka Jesus oye ‘ondjelo yaKalunga mwene,’ ano otwa tegelela oshindji kuTate yetu gwomegulu. (Aahebeli 1:3) Omulumentu omudhiginini Job okwa li a popi kutya Jehova oku na ehalo okuyumudha aantu a ti: ‘Omuntu ngele okwa si, ota kala ishewe e na omwenyo? . . . Oto ka ithana ndje notandi ku itaale; oto ka yuulukwa omushitwa gwoye.’ (Job 14:14, 15) Oshitya shomelaka lyopetameko shoka sha tolokwa mpaka “oto ka yuulukwa” otashi ulike ondjuulukwe onene yaKalunga. (Genesis 31:30; Episalomi 84:2) Osha yela kutya Jehova oku na lela ehalo okuyumudha aantu.

Mbela euvaneko lyeyumuko otatu vulu oku li itaala lela? Ano kapu na omalimbililo kutya Jehova nOmwana oye na ehalo oku li gwanitha notaya vulu oku shi ninga. Mbela shika otashi ti shike kungoye? Otashi ti kutya owu na etegameno lyokukala wa hangana ishewe noonakusa yoye aaholike huka kombanda yevi, ihe omoonkalo dhi ili lelalela.

Jehova Kalunga ngoka petameko a li a tula aantu moshikunino oshiwanawa, oku uvaneke okweetulula Oparadisa kombanda yevi ndika kohi yepangelo lyUukwaniilwa we womegulu miikaha yaJesus Kristus ngoka a tumbalekwa. (Genesis 2:7-9; Mateus 6:10; Lukas 23:42, 43) Aantu otaya ka kala ye na etegameno lyokunyanyukilwa onkalamwenyo kaayi na ehulilo mOparadisa ndjika ye etululwa, kaapu na we uuwehame washa. (Ehololo 21:1-4; yelekanitha Job 33:25; Jesaja 35:5-7.) Itapu ka kala we uutondwe, okatongotongo, elongithonkondo nethininiko lyopamahupilo. Jehova Kalunga oonakusa ote ke ya yumudha okupitila muJesus Kristus ya kale kombanda yevi lya yogoka.

Ndika olyo etegameno ndyoka li niwe ngashingeyi komukiintu Omukriste ngoka a tumbulwa petameko lyoshitopolwa shika. Konima yoomvula dhontumba okuza sho yina a sa, Oonzapo dhaJehova odha li dhe mu kwathele a konakone Ombiimbeli nuukeka. Ota ti: “Sho nda li tandi ilongo kombinga yetegameno lyeyumuko, onda lili. Osha li shinyanyudha noonkondo okutseya kutya meme otandi ke mu mona ishewe.”

Ngele nangoye owa hala okumona ishewe aaholike yoye, Oonzapo dhaJehova otadhi ke ku kwathela nehalo wi ilonge nkene to vulu okukala wu na etegameno ndika lyashili. Oto vulu okuninga ekwatathano nadho pOshinyanga shUukwaniilwa shopopepi nangoye nenge okunyolela kuyimwe yomoondjukithi ndhoka dhi li pepandja 32, ndjoka yi li popepi nangoye.

[Enyolo lyopevi]

Omapulo ngoka tu na okwiipula

Sho kuume ke Lasarus a si, Jesus okwa li u ulike ngiini kutya Ye oku na ehalo okuyumudha aantu nota vulu oku shi ninga?

Omolwashike tatu vulu okuzimina kutya ehokololo lyOmbiimbeli li na ko nasha neyumuko lyaLasarus olyo oshinima sha ningwa shili mondjokonona?

Ongiini ehokololo lyomuJohannes ontopolwa 11 tali holola kutya Jesus okwa halelela okuhulitha po uudhigu mboka hawu etwa keso?

Oshike tashi ulike kutya Jehova Kalunga okwa halelela okuyumudha aantu?

[Oshimpungu pepandja 28]

Omanyolo ngoka taga hekeleke

Aakriste aadhiginini oya li ya popi lwiikando oyindji ngele taya yelitha nkene yi idhidhimikile oluhodhi lwawo ya ti: “Nandi ku lombwele enyolo lyOmbiimbeli ndyoka ndi hole.” Gamwe gomomanyolo ngaka otaga vulu wo oku ku kwathela ngele wa nika oluhodhi.

“Kalunga, . . . na hambelelwe! Oye Tate omunahenda, Kalunga, ngoka kuye haku zi [ehekeleko] alihe. Oye ngoka he tu [hekeleke] muudhigu wetu auhe.”—2 Aakorinto 1:3, 4, yelekanitha KB.

“Oto kamununa eke lyoye e to kutitha iinamwenyo ayihe kesilohenda lyoye.”—Episalomi 145:16.

“Ombepo yOMUWA Omupangeliawike oya lambele ndje, oshoka oye a gwayeke ndje, ndi uvithile oohepele onkundana ombwanawa, ndi aludhe mboka ye na omwenyo gwa nyanyagulwa . . . Okwa tumu ndje, ndi hekeleke ayehe mboka taa lili.”—Jesaja 61:1, 2.

“Ongame, eeno, ongame mwene handi mú hekeleke.”—Jesaja 51:12.

“Ngaashi yina ta hekeleke omwana, osho Ngame tandi ke mu hekeleka.”—Jesaja 66:13, KB.

“Etalaleko muuwehame wandje olyo omauvaneko goye taga pe ndje omwenyo. OMUWA, onda dhimbulukwa omapangulo goye gonale nonda mono ehekeleko. Esilohenda lyoye nali hekeleke ndje, ngaashi wu uvanekele ndje, omuntu gwoye.”—Episalomi 119:50, 52, 76.

“Ethimbo otali ya, uuna oonakusa ayehe mboka ye li moombila, taa ka uva ewi lye. Oyo notaa ka za mo moombila dhawo: mboka ya longo uuwanawa, otaa ka yumudhwa e taa kala ye na omwenyo.”—Johannes 5:28, 29.

[Ethano pepandja 26]

Olukeno ndoka Jesus a li e na sho a yumudha Lasarus olwu ulike kutya okwa halelela okuhulitha po uudhigu mboka hawu etwa keso

[Ethano pepandja 30]

Eyumuko lya kankamena kekuliloyambo lyaKristus Jesus, otali ke etela iigwana ayihe enyanyu