Ontopolwa 13

Molwashike Onkalamwenyo yomEtilokalunga Hayi Eta Elago

1. Omolwashike tatu vulu okutya kutya ondjila yaJehova ohayi eta elago?

JEHOVA oye ‘Kalunga omunelago’ nokwa hala ngoye u nyanyukilwe onkalamwenyo. (1 Timoteus 1:11) Mokweenda mondjila ye, ngoye oto vulu okwiimonena uuwanawa nokunyanyukilwa egundjilo enene notali kalelele, lya fa omulonga tagu tondoka aluhe omeya. Okweenda mondjila yaKalunga otaku inyengitha wo omuntu a longe aluhe iilonga yuuyuuki, “ngomakuthikuthi gomefuta.” Shika otashi eta elago lyashili.—Jesaja 48:17, 18.

2. Ongiini Aakriste taya vulu okukala ya nyanyukwa nonando omathimbo gamwe ohaya ningwa nayi?

² Aantu yamwe otashi vulika taya ti: ‘Aantu omathimbo gamwe ohaya mono iihuna molwashoka taya longo shoka shu uka.’ Oshoshili, naashika osho sha ningilwa aayapostoli yaJesus. Ihe nonando oya li ya hepekwa, yo oya li ya nyanyukwa noya tsikile ‘okuhokolola evaangeli lyaKristus.’ (Iilonga 5:40-42) Otatu vulu okwiilonga iiyilongomwa ya simana mwaashika. Shimwe osho kutya okukala kwetu nonkalamwenyo yometilokalunga itaku shilipaleke kutya otatu ka ningwa nawa aluhe. Omuyapostoli Paulus okwa nyola: “Ayehe mboka ya hala okukala pakutila Kalunga muKristus Jesus, otaa ka hepekwa.” (2 Timoteus 3:12) Etompelo lyaashika olyo kutya Satana nuuyuni we otaya pataneke mboka haya kala pamukalo gwometilokalunga. (Johannes 15:18, 19; 1 Petrus 5:8) Ihe elago lyashili inali ikwatelela kiinima yokombanda. Pehala lyaashono, lyo otali zi mokwiitaala kutya tse otatu longo shoka shi li mondjila nomolwaashono twa hokiwa kuKalunga.—Mateus 5:10-12; Jakob 1:2, 3; 1 Petrus 4:13, 14.

3. Ongiini elongelokalunga lyaJehova li na okunwetha mo onkalamwenyo yomuntu?

³ Opu na aantu mboka taya dhiladhila kutya yo otaya vulu okuhokiwa kuKalunga mokulonga iilonga yeigandjo mpaka naampeyaka ihe omathimbo galwe otaya vulu oku mu dhimbwa. Elongelokalunga lyashili lyaJehova Kalunga hasho li li ngaaka. Ohali nwetha mo eihumbato lyomuntu moowili adhihe ndhoka a penduka, esiku nesiku, omvula nomvula. Shika osho molwashoka lyi ithanwa ‘Ondjila.’ (Iilonga 19:9; Jesaja 30:21) Oyo ondjila yonkalamwenyo yometilokalunga ndjoka tayi tu pula tu popye notu longe tatu tsu kumwe nOohapu dhaKalunga.

4. Omolwashike tashi ku etele uuwanawa okuninga omalunduluko opo u kale paOndjila dhaKalunga?

⁴ Uuna aailongi yOmbimbeli aape taya mono kutya yo oya pumbwa okuninga omalunduluko gontumba opo ya nyanyudhe Jehova, yo otashi vulika tayi ipula: ‘Onkalamwenyo yometilokalunga oyi na shili mbela oshilonga?’ Oto vulu okukala nuushili kutya osho. Omolwashike? Omolwashoka “Kalunga oye ohole,” nonkee ano oondjila dhe odha dhiladhililwa oku tu kwatha. (1 Johannes 4:8) Kalunga oye wo omunongo nokwa tseya shoka oshiwanawa kutse. Molwashoka Jehova Kalunga oye omunankondoadhihe, ye ota vulu oku tu koleka opo tu gwanithe ehalo lyetu oku mu nyanyudha mokweetha ondjigilile ombwinayi. (Aafilippi 4:13) Natu tale omakotampango gamwe ga kwatelwa monkalamwenyo yometilokalunga nokumona nkene oku ga longitha taku eta elago.

UUYUUKI OHAU ETA ELAGO

5. Ombimbeli otayi ti shike kombinga yokufundja nokuyaka?

⁵ Jehova oye “Kalunga koshili.” (Epsalmi 31:5, NW) Kapu na omalimbililo, ngoye owa hala okulandula oshiholelwa she nokukala wa tseyika u li omuntu omunashili. Uuyuuki ohau eta okwaaishundula nomaiyuvo gokukala wa mbilipalelwa. Ihe molwashoka okwaahenuuyuuki oku li apuhe muuyuni mbuka wu udha uulunde, Aakriste oya pumbwa edhimbulukitho ndika: “Popyeni [oshili] okehe tuu nomukwawo . . . Omufuthi kaa yake we, aawe, na longe [nuudhiginini, NW] . . . opo a kale e na sha okugandjela oohepele.” (Aaefeso 4:25, 28) Aaniilonga Aakriste ohaya longo iilonga yuuyuuki mesiku. Ihaya kutha po iinima yomugandji gwiilonga gwawo, ngele ine ya pa epitikilo. Omulongeli gwaJehova oku na okukala ‘omuyuuki miinima ayihe,’ kutya nduno okiilonga, okosikola, nenge okegumbo. (Aaheberi 13:18) Shaangoka e na ondjigilile yokufundja nenge okuyaka ita vulu okuhokiwa kuKalunga.—Deuteronomium 5:19; Ehololo 21:8.

6. Ongiini uuyuuki womuntu omutilikalunga tau vulu okusimanekitha Jehova?

⁶ Okukala omuyuuki ohaku eta omalaleko nuuyamba ogendji. Selina omuselekadhi Omuafrika omukwanaluhepo ngoka e hole Jehova Kalunga nomakotampango ge yuuyuuki. Esiku limwe, okwa toola okatasa mu na okambo kombaanga niimaliwa oyindji. Mokulongitha embo lyoonomola dhoongodhi, ye okwa li a vulu okumona mwene gwako—omunasitola ngoka a li a yugwa. Omulumentu nguka ka li ta vulu okwiitaala omeho ge sho Selina, nonando okwa li te ehama, e mu talele po nokwe mu pe okatasa ke niinima yamo ayihe ya gwana po. “Uuyuuki wa tya ngaaka ou na okupewa ondjambi,” osho a ti nokwe mu pe iimaliwa yontumba. Ihe shoka sha simana unene, osho kutya omulumentu nguka okwa pandula elongelokalunga lyaSelina. Eeno, iilonga yuuyuuki ohayi simanekitha elongo lyOmbimbeli, ohayi simanekitha Jehova Kalunga, nohayi etele aalongeli ye aayuuki elago.—Titus 2:10; 1 Petrus 2:12.

OKUGANDJA OHAKU ETA ELAGO

7. Omolwashike sha puka okundombela?

⁷ Okukala ho gandja oshi na elago, omanga aanalwiho itaaya ka “thigulula uukwaniilwa waKalunga.” (1 Aakorinto 6:10, KB) Oludhi lumwe lwolwiho ndoka lu li apuhe olwo okundombela, hoka ku li onkambadhala okumona iimaliwa okupitila mokukanitha kwayalwe. Jehova ina hokwa mboka ye na “olwiho lweliko lyaa shi lyopauyuuki.” (1 Timoteus 3:8, NW) Nokuli mpoka okundombela ku li paveta nomuntu ota ndombela omolweinyanyudho, ye oha vulu okupikwa nokuhumitha komeho omukalo ngoka gwa yonagula onkalamwenyo yoyendji. Olundji okundombela ohaku eta uudhigu kuukwanegumbo womundombeli, ngoka tashi vulika ta hupu po niimaliwa iishona yokulanda iipumbiwa ngaashi iikulya noonguwo.—1 Timoteus 6:10.

8. Jesus okwa tula po ngiini oshiholelwa oshiwanawa shokugandja, nongiini tatu vulu okukala aagandji?

⁸ Molwokugandja kwawo kwohole, Aakriste ohaya mono enyanyu mokukwathela yalwe, unene tuu ooitaali ooyakwawo mboka ye li moluhepo. (Jakob 2:15, 16) Manga Jesus inee ya kombanda yevi, okwa mono okugandja kwaKalunga kaantu. (Iilonga 14:16, 17) Jesus ye mwene okwa li a gandja ethimbo lye, iitalendi ye, nonokuli omwenyo gwe molwaantu. Onkee ano a li a gwana okutya: “Okugandja ku na elago komeho gokutaamba.” (Iilonga 20:35) Jesus okwa pandula wo omuselekadhi ohepele ngoka a li e na ehalo lyokugandja nokwa tula mo uumaliwa uyali uukukutu moshiketha sheliko lyotempeli, oshoka okwa gandja “iipalutha ye ayihe.” (Markus 12:41-44) Aaisrael yonale nAakriste yomethelemimvo lyotango oya li iiholelwa yokugandja nenyanyu mokulongitha omaliko okuyambidhidha egongalo nosho wo iilonga yUukwaniilwa. (1 Ondjalulahokololo 29:9; 2 Aakorinto 9:11-14) Kakele kokuyambidhidha nomaliko molwomalalakano ngaka, Aakriste yonena ohaya tanga Kalunga nenyanyu nohaya longitha onkalamwenyo yawo miilonga ye. (Aaroma 12:1; Aaheberi 13:15) Jehova ohe ya yambeke molwokulongitha ethimbo lyawo, oonkondo dhawo nomaliko gawo, mwa kwatelwa iimaliwa yawo, okuyambidhidha elongelokalunga lyashili nokuhumitha komeho iilonga yomuuyuni auhe yokuuvitha onkundana ombwanawa yUukwaniilwa.—Omayeletumbulo 3:9, 10.

IINIMA YILWE MBYOKA TAYI INDJIPALITHA ELAGO

9. Omolwashike sha puka okunwa sha pitilila iikunwa yoalkoholi?

⁹ Opo Aakriste ya kale nelago, oye na wo ‘okugamena oonkondo dhawo dhokudhiladhila.’ (Omayeletumbulo 5:1, 2, NW) Shika otashi pula opo ya leshe noya tedhatedhe Oohapu dhaKalunga niinyolomwa iiwanawa yOmbimbeli. Ihe opu na iinima yi na okuyandwa. Pashiholelwa, okunwa sha pitilila iikunwa yoalkoholi otaku vulu okuningitha omuntu kaa vule we okupangela omadhiladhilo ge. Monkalo ya tya ngaaka, aantu oyendji ohaya kala monyata yiipala, ohaya longo iilonga yelongithonkondo nohaye etitha iiponga iidhipagi. Itashi kumitha ano sho Ombimbeli tayi ti kutya oonkolwe itadhi ka thigulula Uukwaniilwa waKalunga! (1 Aakorinto 6:10, KB) Molwashoka Aakriste yashili oya tokola toko okukala ye na “omadhiladhilo omawanawa,” yo ohaya yanda uunkolwe, naashika otashi ya kwatha yi indjipalithe elago mokati kawo.—Titus 2:2-6, NW.

10. (a) Omolwashike Aakriste ihaya longitha omakaya? (b) Omauwanawa gashike haga zi mokusinda oondjigilile oompiki?

¹⁰ Olutu lwa yela ohalu kwathele mokweeta elago. Ihe aantu oyendji oya pikwa kiinima hayi eta oshiponga. Pashiholelwa, dhiladhila kelongitho lyomakaya. Ehangano lyUukalinawa lyUuyuni otali kundaneke kutya okuhila omakaya “ohaku dhipaga aantu omamiliyona gatatu omvula kehe.” Otashi vulika shi li oshidhigu okweetha okuhila omakaya, oshoka oku ge etha otaku eta iizemo iiwinayi yopokathimbo. Mepingathano naashika, oyendji mboka ihaaya hili we omakaya oya mono kutya oye na uukolele uuwanawa niimaliwa oyindji yokugwanitha oompumbwe dhawo dhomegumbo. Eeno, okusinda ondjigilile yokuhila omakaya nenge yokupikwa kiinima yilwe hayi eta oshiponga otashi ka kwathela u kale nolutu lwa yogoka, eiyuvo lya yela nosho wo elago lyashili.—2 Aakorinto 7:1.

ELAGO MONDJOKANA

11. Oshike tashi pulwa opo u kale u na ondjokana yi shi okusimanekwa ndjoka yi li paveta notayi kalelele?

¹¹ Mboka ye li pamwe ye li omusamane nomukulukadhi oye na okushilipaleka kutya ondjokana yawo oyi li naanaa paveta. (Markus 12:17) Oye na wo okutala ko ondjokana yi li oshinakugwanithwa sha kwata miiti. Dhoshili, okutopoka otashi vulika ku kale kwa pumbiwa ngele taku tindwa owina okugandja eyambidhidho, ngele gumwe ta ningwa nayi sha vuka, nenge ngele ta mbandamekwa thiluthilu pambepo. (1 Timoteus 5:8; Aagalati 5:19-21) Ihe oohapu dhomuyapostoli Paulus mAakorinto yoTango 7:10-17 otadhi kumike ookuume kopandjokana ya kale pamwe. Dhoshili, ngele oya hala elago lyashili, yo kaye na okuyona ondjokana. Paulus okwa nyola: “Oondjokana nadhi [kale dhi shi okusimanekwa, NW] kwaayehe, nontala yoondjokana yi kale yaa na oshipwe; oshoka aahondeli naaholume Kalunga te ya pangula.” (Aaheberi 13:4) Uutumbulilo ‘ontala yoondjokana’ otau ulike kekwatathano lyopamilalo pokati komulumentu nomukiintu ya hokana paveta. Kapu na ekwatathano lilwe lyopamilalo, ngaashi okuhokana ombanda, tali vulu okuhokololwa li “shi okusimanekwa kwaayehe.” Niishewe, Ombimbeli otayi pangula ekwatathano lyopamilalo komeho gondjokana nosho wo uushenge.—Aaroma 1:26, 27; 1 Aakorinto 6:18.

12. Yimwe yomiiyimati iiwinayi yoluhondelo oyini?

¹² Oluhondelo otalu vulu okweeta enyanyu lyopanyama lyopokathimbo, ihe italu eta elago lyashili. Otalu yematitha Kalunga notalu vulu okweehameka eiyuvo lyomuntu. (1 Aatessalonika 4:3-5) Iilanduliko yinikitha oluhodhi yomilalo kondje yondjokana otashi vulika yi kale oAIDS nomikithi dhilwe hadhi taandelekwa pamilalo. “Osha li sha tengenekwa kutya omvula kehe aantu ye vule pomamiliyona 250 muuyuni auhe ohaya kwatwa koshinena, nomamiliyona konyala 50 okendongo,” ehokololoningomwa lyopaunamiti limwe osho tali ti. Opu na wo uupyakadhi womausimba inaaga halika. OInternational Planned Parenthood Federation otayi kundaneke kutya omvula kehe muuyuni auhe, aakadhona ye vulithe pomamiliyona 15 ye li pokati koomvula 15 no 19 ohaya ningi omala, noshititatu shomuyo ohashi kutha mo omala. Ekonakono limwe olyu ulike kutya moshilongo shimwe shomuAfrika, maakadhona aagundjuka ayehe mboka taya si, oopersenda 72 dhomaso gawo ohage etwa komaupyakadhi gokukutha mo ela. Aahondeli yamwe otashi vulika haya henuka omikithi nuusimba, ihe ihaya vulu okuhenuka okuyonuka pamaiyuvo. Oyendji ohayi ishundula nohayi itondo yo yene nokuli.

13. Omaupyakadhi geni natango hage etwa kokuyona ondjokana, noshike tashi ka adha mboka taya tsikile okukala aahondeli naayonindjokana?

¹³ Nonando okuyona ondjokana otaku vulu okudhiminwa po, kukuume kopandjokana ngoka kee na ondjo oko ekankameno lya kola lyopamanyolo lyokuhengana. (Mateus 5:32; yelekanitha Hosea 3:1-5.) Uuna onyata yiipala ya tya ngaaka tayi eta okuteka po kwondjokana, shika otashi vulu okuthiga po iiyadhi ya ya muule yopamaiyuvo kukuume kopandjokana ngoka kee na ondjo nokaanona. Molwuuwanawa wuukwanegumbo wopantu, Oohapu dhaKalunga otadhi ulike kutya ye ota ka pangula aahondeli naayonindjokana mboka inaayi iyela ombedhi. Kakele kaashono, otadhi ulike sha yela kutya mboka ye li monyata yiipala “itaa ka thigulula uukwaniilwa waKalunga.”—Aagalati 5:19, 21, KB.

“KAYE SHI OSHITOPOLWA SHUUYUNI”

14. (a) Omaludhi gamwe gelongelo lyiikalunga ogeni ngoka haga yandwa komuntu omutilikalunga? (b) Epukululo lini tali gandjwa muJohannes 17:14 naJesaja 2:4?

¹⁴ Mboka ya hala okunyanyudha Jehova nokunyanyukilwa omalaleko nuuyamba gUukwaniilwa ohaya yanda elongelo lyiikalunga lyoludhi kehe. Ombimbeli otayi ulike kutya osha puka okuninga iimenka noku yi galikana, mwa kwatelwa mbyoka yaKristus nenge yayina yaJesus, Maria. (Eksodus 20:4, 5; 1 Johannes 5:21) Ano Aakriste yashili ihaya simaneke omafano, omishigakano niimenka. Yo ohaya yanda wo omaludhi omakwawo gopamakoto gelongelo lyiikalunga, ngaashi okusimaneka omapandela nokwiimba omaimbilo ngoka taga simaneke iigwana. Uuna taya thininikwa oku shi ninga, ohaya dhimbulukwa oohapu dhaJesus e dhi lombwela Satana: “Omuwa Kalunga koye oye awike u na oku mu galikana noye awike u na oku mu longela.” (Mateus 4:8-10, OB-1986) Jesus okwa ti kutya aalanduli ye “kaye shi oshitopolwa shuuyuni.” (Johannes 17:14, NW) Shika otashi ti okukala kaaye na ombinga miinima yopapolotika nokukala ye na ombili metsokumwe naJesaja 2:4, ngoka ta ti: “Oye [Jehova Kalunga] ota pangula pokati kaapagani naapagani nota pukulula iilongo oyindji. Oyo notaa hambulula omagongamwele gawo omatemo nomagonga gawo iimwetho; nena itaa [ganeke] we oshikaha shokukondjithathana, nongaashi ihaa kala we okwiilonga uukwiita.”

15. Babilon Oshinene oshike, noshike aakonakoni yOmbimbeli aape oyendji haya ningi okuza mo musho?

¹⁵ Okukala ‘kaaye shi oshitopolwa shuuyuni’ otashi ti wo okweetha ekwatathano kehe ‘naBabilon Oshinene,’ uukwaniilwa womuuyuni auhe womalongelokalunga giifundja. Elongelokalunga inaali yela olya taandele okuza muBabilon shonale sigo tali kala nepangelo tali ehameke pambepo aantu yokombanda yevi alihe. ‘Babilon Oshinene’ osha kwatela mo omalongelokalunga agehe ngoka omalongo niilonga yago itaayi tsu kumwe nontseyo okutseya Kalunga. (Ehololo 17:1, 5, 15, yelekanitha OB-1986.) Kapu na omulongeli gwaJehova omudhiginini ta ka kutha ombinga miilonga yokulongela kumwe yoongeleka dhi ili nodhi ili nenge mokukala nekwatathano lyopambepo noshitopolwa kehe shaBabilon Oshinene. (Numeri 25:1-9; 2 Aakorinto 6:14) Omolwashono, aakonakoni yOmbimbeli aape oyendji otaya tumu oontumwafo dhokulaleka kehangano lyopalongelokalunga moka yo ye li. Shika oshe ye eta popepi naKalunga kashili, ngaashi sha hunganekwa: “Zii mo mokati kawo, ne mu iyoolole muyo, kwa ti Omuwa, ne inamu guma shono sha nyata; ongame tandi mú taamba.” (2 Aakorinto 6:17; Ehololo 18:4, 5) Okutaambwa kwa tya ngaaka kuTate yetu gwomegulu hako mbela wa hala noonkondo?

KONAKONA OMADHANO GIITUTHI GOKOMUMVO

16. Omolwashike Aakriste yashili ihaya dhana Okrismesa?

¹⁶ Onkalamwenyo yometilokalunga otayi tu mangulula kokudhana omasiku gefudho guuyuni hoka ku li olundji omutenge. Pashiholelwa, Ombimbeli itayi holola esiku lyolelalela moka Jesus a valwa. ‘Onda li ndi shi Jesus okwa valwa mo 25 Desemba!’ yamwe otashi vulika osho tayi igidha. Shika itashi wapa molwashoka ye okwa sa pethimbo lyokwenye kwomo 33 E.N. e na oomvula 33 1/2. Kakele kaashono, pethimbo lyokuvalwa kwe, aasita oya li “ya langela iimuna yawo uusiku kokuti kowala.” (Lukas 2:8) Moshilongo shaIsrael, pehulilo lyaDesemba olyo ethimbo lya talala nolyomvula moka oonzi hadhi lala miiholameno uusiku oku dhi gamena kombepo yokufu. Dhoshili, 25 Desemba olya li lyi ikalekelwa kAaroma li li esiku lyevalo lyoshikalunga shawo shetango. Omathelemimvo konima yokukala kwaJesus kombanda yevi, Aakriste ya shuna monima oya taamba ko esiku ndika okudhana evalo lyaKristus. Onkee ano, Aakriste yashili ihaya dhana Okrismesa nenge esiku lyefudho lilwe lyi ili lya kankamena komalongo giifundja gopamalongelokalunga. Molwashoka yo oyi igandjele Jehova oye awike, yo ihaya dhana omasiku gomafudho ngoka taga simaneke aantu aalunde nenge iigwana.

17. Omolwashike aantu aatilikalunga ihaya dhana omasiku gomavalo, nomolwashike aanona Aakriste ye li nokuli aanelago?

¹⁷ Ombimbeli otayi tumbula kondandalunde omadhano gomasiku gomavalo ge li owala gaali, naagehe gaali oga kwatela mo aantu mboka inaaya longela Kalunga. (Genesis 40:20-22; Mateus 14:6-11) Molwashoka Omanyolo itaga holola esiku lyevalo lyomulumentu a gwanenena Jesus Kristus, omolwashike ano tse tu na okugandja eitulomo lyi ikalekelwa komasiku gomavalo gaantu inaaya gwanenena? (Omuuvithi 7:1) Dhoshili, aavali aatilikalunga ihaya tegelele esiku lyi ikalekelwa opo yu ulikile aanona yawo ohole. Okakadhona Okakriste koomvula 13 oka ti: “Aakwanegumbo yaandjetu nangame ohatu nyanyukilwa iinima oyindji pamwe. . . . Ngame ondi hole noonkondo aakuluntu yandje, nuuna aanona yalwe taya pula kutya omolwashike ihaandi dhanene omasiku gomafudho, ohandi ya lombwele kutya ngame esiku kehe ohandi li dhana.” Omugundjuka Omukriste gwoomvula 17 okwa ti: “Megumbo lyaandjetu, ohamu gandjwa omagano uule womvula ayihe.” Ohashi eta enyanyu enene uuna omagano taga gandjwa inashi tegelelwa.

18. Edhano limwe alike lini lyokomvula Jesus a lombwele aalanduli ye ya dhane, notali tu dhimbulukitha shike?

¹⁸ Kwaamboka taya lalakanene onkalamwenyo yometilokalunga, opu na esiku limwe lyi ikalekelwa momvula kehe ndyoka li na okudhanwa. Olyo Uulalelo wOmuwa, olundji ohali ithanwa Edhimbuluko lyeso lyaKristus. Shi na ko nasha nalyo, Jesus okwa lombwele aalanduli ye: “Shino kaleni tamu shi ningi nokudhimbulukwa ndje.” (Lukas 22:19, 20, NW; 1 Aakorinto 11:23-25) Sho Jesus a dhiki uulalelo mbuka muusiku wo 14 Nisan, 33 E.N., okwa longitha oshikwiila inaashi ya efulika nomaviinu omatiligane, mbyoka tayi thaneke olutu lwe lwopantu kaalu na ondjo nosho wo ombinzi ye ya gwanenena. (Mateus 26:26-29) Omandhindhiliko ngaka ohaga longithwa kAakriste ya gwayekwa nombepo ondjapuki yaKalunga. Oya taambwa mehangano epe nomehangano lyUukwaniilwa, noye na etegameno lyomegulu. (Lukas 12:32; 22:20, 28-30, KB; Aaroma 8:16, 17; Ehololo 14:1-5) Nando ongaaka, omauwanawa ohaga monika kwaayehe mboka ye li po ongulohi ndjoka tayi tsu kumwe no 14 Nisan mokalindeli kOshijuda konale. Ohaya dhimbulukithwa ohole ndjoka yu ulikwa kuJehova Kalunga naJesus Kristus okupitila mekuliloyambo hali dhimi po oondjo ndyoka tali shi ningi tashi wapa opo mboka ya hokiwa kuKalunga ya mone omwenyo gwaaluhe.—Mateus 20:28; Johannes 3:16.

IILONGA NOMAINYANYUDHO

19. Eshongo lini Aakriste ya taalela shi na ko nasha niilonga mbyoka taya longo?

¹⁹ Aakriste yashili oye na oshinakugwanithwa shokulonga nuudhiginini nokusila oshimpwiyu oompumbwe dhawo. Ngele omitse dhuukwanegumbo tadhi shi ningi, otadhi kala dhi uvite ombili. (1 Aatessalonika 4:11, 12) Dhoshili, ngele iilonga yOmukriste otayi kondjithathana nOmbimbeli, shika otashi ke mu yuga enyanyu. Ihe omathimbo gamwe oshidhigu kOmukriste a mone iilonga mbyoka tayi tsu kumwe nomithikampango dhOmbimbeli. Pashiholelwa, aaniilonga yamwe ohaya pulwa ya kotokele aalandi. Mepingathano naashoka, aagandji yiilonga oyendji otaya ka ninga oshindji okumbilipaleka eiyuvo lyomulongi ngoka omuyuuki, molwashoka inaya hala okukanitha omuniilonga e shi okwiinekelwa. Ihe kutya nduno opu ningwe shike, ngoye oto vulu okukala nuushili kutya Kalunga ota ka laleka nuuyamba oonkambadhala dhoye okumona iilonga mbyoka tayi ku kaleke neiyuvo lya yogoka.—2 Aakorinto 4:2.

20. Omolwashike tu na okuhogolola nawa shi na ko nasha nomainyanyudho?

²⁰ Molwashoka Kalunga okwa hala aapiya ye ya kale ya nyanyukwa, nonando otu na okulonga nuudhiginini otwa pumbwa wo omathimbo gomainyanyudho nogokuvululukwa. (Markus 6:31; Omuuvithi 3:12, 13) Uuyuni waSatana otau humitha komeho omainyanyudho gokwaahenakalunga. Ihe opo tu hokiwe kuKalunga, otu na okuhogolola nawa omambo ngoka hatu lesha, ooprograma dhoradio noomusika ndhoka hatu pulakene, nookonseta, oofilima, iinyandwa, ooprograma dhokotelevisi noovidio ndhoka hatu tala. Ngele omainyanyudho ngoka twa hogolola methimbo lya piti otaga kondjithathana nomalondodho gomomanyolo ngaashi Deuteronomium 18:10-12, Epsalmi 11:5 (NW) nAaefeso 5:3-5, otatu ka nyanyudha Jehova notatu ka kala twa nyanyukwa ngele tatu ningi omalunduluko.

ESIMANEKO LYOMWENYO NOMBINZI

21. Ongiini okusimaneka omwenyo ku na okunwetha mo okutala ko kwetu okukutha mo ela, nosho wo oondjigilile dhetu neihumbato lyetu?

²¹ Opo tu nyanyukilwe elago lyashili, omwenyo gwomuntu otu na oku gu tala ko omuyapuki, ngaashi naanaa Jehova he gu tala ko. Oohapu dhe otadhi tu indike twaaha dhipage. (Mateus 19:16-18) Dhoshili, Ompango yaKalunga kuIsrael otayi ulike kutya ye oha tala ko okahanona inaaka valwa natango oko omwenyo gu na ondilo—kake shi sha shoka shi na okuhanagulwa po. (Eksodus 21:22, 23, NW) Shi na ko nasha naashono, tse katu na okutala ko omwenyo ngaashi sha kaashi na ongushu mokulongitha omakaya, okweehameka omalutu getu niingangamithi nenge oalkoholi, nenge okutula omwenyo gwetu moshiponga inaashi pumbiwa. Nokatu na wo okukutha ombinga momaipyakidhilo kehe taga tula omwenyo gwetu moshiponga nenge okudhina oompango ndhoka tadhi tu gamene, oshoka oku shi ninga otashi vulika shi tu fale mondjo yombinzi.—Deuteronomium 22:8.

22. (a) Oshike osho etaloko lyometilokalunga lyombinzi nelongitho lyayo? (b) Ombinzi awike yalye tayi hupitha shili omwenyo?

²² Jehova okwa lombwele Noa nuukwanegumbo we kutya ombinzi oyi lile po omwenyo. Onkee ano Kalunga e yi indike yaaha lye nando ombinzi. (Genesis 9:3, 4) Molwashoka tse otu li oluvalo lwawo, ompango ndjika oye tu kwatela mo atuhe. Jehova okwa lombwele Aaisrael kutya ombinzi oyi na okutilwahi mevi nokayi na okulongithwa momalalakano gaantu gopaumwene. (Deuteronomium 12:15, 16) Nompango yaKalunga yi na ko nasha nombinzi oya li ye endululwa sho Aakriste yomethelemimvo lyotango ya li ya lombwelwa: ‘Kaleni tamu yanda ombinzi.’ (Iilonga 15:28, 29) Molwokusimaneka uuyapuki womwenyo, aantu aatilikalunga ihaya zimine omatulombinzi, nonando yalwe onaya kale taye ya thininike kutya epango lya tya ngaaka otali ka hupitha oomwenyo dhawo. Omapingenopo gopaunamiti ogendji ngoka haga ziminwa kOonzapo dhaJehova, oga longithwa nomupondo noihage etele omuntu iiponga mbyoka hayi vulu okweetwa kokutulwa ombinzi. Aakriste oya tseya kutya ombinzi ya tika yaJesus oyo owala tayi hupitha shili omwenyo. Okwiitaala muyo otaku eta edhiminopo netimaumbwile lyomwenyo gwaaluhe.—Aaefeso 1:7.

23. Dhimwe dhomoondjambi dhonkalamwenyo yometilokalunga odhini?

²³ Osha yela kutya onkalamwenyo yometilokalunga otayi pula oonkambadhala. Otayi vulu okufala mokushekwa kiilyo yuukwanegumbo nenge kwaamboka ye ku shi. (Mateus 10:32-39; 1 Petrus 4:4) Ihe ondjambi yokukala nonkalamwenyo ya tya ngaaka oyi vule noonkondo emakelo kehe. Otayi fala meiyuvo lya yela notayi eta ekwatathano ewanawa naamboka taya longele Jehova pamwe nangoye. (Mateus 19:27, 29) Opo nduno, dhiladhila wo nkene okukala nomwenyo sigo aluhe muuyuni uupe waKalunga wuuyuuki taku ka kala. (Jesaja 65:17, 18) Noitashi eta tuu enyanyu enene mokuvulika komayele gOmbimbeli nokunyanyudha ano omutima gwaJehova! (Omayeletumbulo 27:11) Kapu na omalimbililo kutya onkalamwenyo yometilokalunga ohayi eta elago!—Epsalmi 128:1, 2.

KONAKONA ONTSEYO YOYE

Gamwe gomomatompelo molwashike onkalamwenyo yometilokalunga hayi eta elago ogeni?

Onkalamwenyo yometilokalunga otashi vulika tayi tu pula tu ninge omalunduluko geni?

Omolwashike wa hala okukala nonkalamwenyo yometilokalunga?

[Picture on page 124, 125]

Okukala nondjele shi na ko nasha nomaipyakidhilo gopambepo nomathimbo gomainyanyudho, otaku eta elago kwaamboka ye na onkalamwenyo yometilokalunga