Oshileshwa 11

Omalongo nOmikalo Ndhoka Inaadhi Hokiwa kuKalunga

Omalongo nomikalo dholudhi luni dha puka? (1)

Aakriste oye na mbela okwiitaala kutya Kalunga Omukwatatu? (2)

Omolwashike Aakriste yashili ihaya dhana Okrismesa, Opaasa nenge omasiku gomavalo? (3, 4)

Aasi otaya vulu mbela okweetela aanamwenyo oshiponga? (5)

Mbela Jesus okwa sile komushigakano? (6)

Okunyanyudha Kalunga osha simana ngiini? (7)

1. Hamalongo nomikalo adhihe omiwinayi. Ihe Kalunga ite ga hokwa ngele oga za momalongelokalunga giifundja nenge taga kondjitha omalongo gOmbimbeli.—Mateus 15:6.

2. Uukwatatu: Jehova mbela Omukwatatu—aantu yatatu muKalunga gumwe? Aawe! Jehova, He, oye ‘Kalunga awike kashili.’ (Johannes 17:3; Markus 12:29, yelekanitha NW.) Jesus oye Omwana Gwe omuvalwa gwotango, noku na okuvulika kuKalunga. (1 Aakorinto 11:3) He oku vule Omwana. (Johannes 14:28) Ombepo ondjapuki kayi shi omuntu; oyo oonkondo dhaKalunga tadhi longo.—Genesis 1:2; Iilonga 2:18.

3. Okrismesa nOpaasa: Jesus ina valwa muDesemba 25. Ye okwa valwa lwomuOktoba 1, ethimbo lyomumvo sho aasita haya kaleke omausita gawo miihwa uusiku. (Lukas 2:8-12) Jesus ina lombwela nando Aakriste ya dhane evalo lye. Pehala lyaashono, ye okwa lombwele aalongwa ye ya dhimbulukwe eso lye. (Lukas 22:19, 20) Okrismesa nomikalo dhayo oya za momalongelokalunga giifundja gonale. Omo wo mwa za omikalo dhOpaasa, ngaashi elongitho lyomayi nuulimba. Aakriste yonale inaya dhana Okrismesa nenge Opaasa, nAakriste yashili nena ihaye yi dhana wo.

4. Omasiku gOmavalo: Omadhano gomasiku gomavalo gaali ageke ga popiwa mOmbimbeli ga dhanwa kaantu mboka ya li ihaaya galikana Jehova. (Genesis 40:20-22; Markus 6:21, 22, 24-27) Aakriste yonale inaya dhana omasiku gomavalo. Omukalo gwokudhana omasiku gomavalo ogwa za momalongelokalunga giifundja gonale. Aakriste yashili ohaya gandja omagano nohaya nyanyukilwa okukala pamwe pomathimbo galwe momumvo.

5. Okutila Oonakusa: Oonakusa ihaya vulu okulonga sha nenge yu uve sha. Tse itatu vulu oku ya kwathela, nayo itaya vulu oku tu ehameka. (Epsalmi 146:4; Omuuvithi 9:5, 10) Omwenyo ohagu si; ihagu kala nomwenyo konima yeso. (Hesekiel 18:4) Ihe omathimbo gamwe aayengeli aakolokoshi, hayi ithanwa oompwidhuli, ohayi ifetha oombepo dhoonakusa. Omikalo kehe ndhoka dhi na ko nasha nokutila nenge okugalikana oonakusa odha puka.—Jesaja 8:19.

6. Omushigakano: Jesus ina sila komushigakano. Ye okwa sila kopaala nenge koshiti. Oshitya shOshigreka sha lundululwa “omushigakano” mOombimbeli odhindji okwa li tashi ti owala oshitetela shimwe shoshiti. Endhindhiliko lyomushigakano olya za momalongelokalunga giifundja gonale. Omushigakano inagu longithwa nenge gu galikanwe kAakriste yonale. Onkee ano, oto dhiladhila mbela kutya oshi li mondjila okulongitha omushigakano megalikano?—Deuteronomium 7:26; 1 Aakorinto 10:14.

7. Otashi vulika shi li oshidhigu unene okweetha po gamwe gomomalongo nomikalo ndhika. Aakwanezimo nookuume otashi vulika ya kambadhale oku ku itaalitha waaha lundulule omalongo ngoka wi itaala. Ihe okunyanyudha Kalunga osha simana unene shi vulithe okunyanyudha aantu.—Omayeletumbulo 29:25; Mateus 10:36, 37.

[Picture on page 22]

Kalunga ke shi Omukwatatu

[Picture on page 23]

Okrismesa nOpaasa oya za momalongelokalunga giifundja gonale

[Picture on page 23]

Kapu na etompelo lyokugalikana oonakusa nenge oku ya tila